Zefanyâ 3 - Bokyi Bible

Byibî ne Onyii ḿbyí Jerúsélem

¹ Jerúsélem o/firi ké busông, oshê ámu mú o/bên dyityém, mú mu o-bírî ng bunwa ne Óburúkpâbí, o-cít ng banet ḿbé emen nyǐ oyén.

² Oshê ámu o*da/fwôo ne atông o-jwo Óburúkpâbí* o-jwo nang dyishí ńdyí mu o-tángê e kámú*. O*da/fé dyityém emen ne Óburúkpâbí* o-bí nang ochwâp emen*.

³ Banet-ashí emen mbe wǎ ekpang nyí e-kú e-fém m. Bampan esuk emen mbe wǎ bubyî-dyikán ḿbú budajang echwá, ḿbú esong e-kú e-nwa ng kámbú, ḿbú boo*mîng kyikúú-enyam kyi-cé dyicí*.

⁴ Bamkpábé ḿbé badasét byiraa-Osówo baa*kúng byěm róró* ne ba-nîm m banet. Banchi kyifen-Osówo ba-bên n byěm-ociring, ba-pín n byije-Osówo eringe nyí byidakwárê ne édúú ebe.

⁵ Nké Óburúkpâbí o/tôong ké oshê ámu. Nyǐ o-chi i ńkyí nkyi kanong, oo*chi ńkyí kii*nwa*. Dyicófóróng dyi*fí* ńdyí oo*bê ne banet emen ne ntûntû*. Nang ké mu o-chi i éné, byibî-banet ḿbyí mbyi ké oshê ámu mbe ba-ryí i acît ba-câ kashú éshwân ee*chi kámbé*.

⁶ Óburúkpâbí o/raa o/fu, me mm/bên byirim-eshê byikíri kángkáng, ḿbyí banshâng bakye. Mm/bên eshê ebe m-mîng ekpe-byise ne biǐnyáám-byise ebe byi-waa biǐbwô-byise. Banet baa/chêe ké eshê ebe, byiká-oshê bii/waa kafâ dyikáá, onet o*fí mú o/waa*.

⁷ Me m/mû n/kabe n/fu, ké nkéré ámu, banet ejí ba/mû ba/chi ba-kye mě ofê ba-jwo dyishí ńdyí n/tángê kámbé, n/fu, [baa*ba/chi ba-ráp] byěm ḿbyí n/tángê kámbé*. Nké ka*da/bwon ne ba-kpet echi byibî ḿbyí ba/mû ba-chi i*.

⁸ Óburúkpâbí o/raa o/fu, bwom m̂ kpá, ba-bám dyicí ńdyí n/chi m-bwom ké esuk n-sét eshê byibî ebe. Me nn/tî dyityém ejí ńdyí n/chi m-kpaa eshê ne batu n-tî kyikit kyibónge eringe n/chi n-chi kámbé ba-nyît busa ḿbú kafâ esa ejí. N/chi n-kúng okwâ mú kafâ esa ejí n-shí ejíí emúmú.

⁹ Â n/chi éné kâng, n/chi n-yángê banshâng bakye, ne mbé ba/chi ba-kûfé nshwam ba-kyâ mě nké nke, baa*fé to ba-kye bakye*. Mbé kángkáng ba/chi ba-kûchi ńkyí ndasét kámbé.

¹⁰ Nang ké Sudân mú tíbítíbí, banet ejí ḿbé baa/pwôo byiryibyiryi ba/chi ba-fím áku ba-bâ ne eyáré ba-ba-kye mě.

¹¹ Ké nkéré ámu, ben banet ejí, éshwân ee*ba/chi e-chî běn echi ba/fu, ben ba/bírî bunwa ne me*. Me n/chi n-fîm nang yeě mú mu o-tông ng byiko, ne ben baa*ba/chi ba-chîbwom ké kaku-ociring ejí ba-bírî bunwa ne me*.

¹² Me n/chi m-mîng kyicê-banet ḿbé mbe ba-tî ng byiko ebe kyísí kyísí ba-fâ mě ké kaku ánke, ḿbé ba/chi ba-bâ ba-kâm mě ba/fu, me nchwáp kámbé.

¹³ Banet ḿbé Ézerel ḿbé ba/chi ba-fem baa*chi to onet okíri kyibî* baa*sét to byisédéng* nang banet baa*nîm to*. Mbé ba/chi ba-já ńkyí mbe ba-ryuu ng, chwǒm kii*ta kámbé* ne baa*shî to onet*.

Okwan-Bunyîn-Dyityém

¹⁴ Zefanyâ o/kwán okwan o/fu, banet ḿbé Ézerel, kwán n̂ ekwan ne ejá kyíbóng kyíbóng ké bunyîn-dyityém. Jerúsélem, jêe ne dyityém eyên kángkáng.

¹⁵ Óburúkpâbí oo/kye běn busông enen bu-man. Oo/fîm kángkáng banet-bushwôn enen. Óburúkpâbí mú mu Otu mú Ézerel mu ne ben. Bukwóp bu*fí to ḿbú ben badachîshî*.

¹⁶ Nkéré mu o-bâ mú banet ba/chi ba-sét Jerúsélem ba/fu, oshê mú Záyon, *dachi a-chîshî* *da n̂g epwó abwô enen*.

¹⁷ Óburúkpâbí mú mu Osówo enen mu ne ben. Busa emen mbu bu-chi i běn ba-kpógê ng. Kyi/chi kyi-kûnyîn Óburúkpâbí ké bubwô enen, ne ké kyijé emen, [o/chi o-kye běn dyikpen ńdyí dyifyîfî.] O/chi o-kwán ekwan o-jêe ké bubwô enen. [

¹⁸ O/chi o-kûjêe wǎ banet ḿbé mbe ké dyijî-kyifen. Óburúkpâbí o/raa o/fu, me mm/mîng efé bushî ḿbú busông ne nn/fîm éshwân enen].

¹⁹ Nkéré mu o-bâ mú n/chi n-kye banet ḿbé mbe ba-cít ng běn busông. N/chi n-nyii kángkáng bankwa-banet n-koo, m-bwa esim dyijê ne banet ḿbé baa/kúng kámbé ba-jâ eshê ekíri wǎ básóng. N/chi n-bírî éshwân ebe e-firi ofê, ne ejíí emúmú e/chi e-kye kámbé akpee.

²⁰ Nkéré mu o-bâ mú n/chi m-bwa dyijê ne banet enen ḿbé baa/pwó kámbé byiryibyiryi. N/chi n-chi dyizîn enen dyi-firi kiǐtí ké ejíí emúmú, n-chî běn echi ba-já nang ebóng ńkyí bamu ba-ryuu ng. Ne ben bayén ba/chi ba-ri kánkyí. Óburúkpâbí nké o/raa.