Zákaryâ 9 - Bokyi Bible

Mpan mú Osówo o/pan Eshê nyí e/fárâng ne Ézerel

¹ Kyitwóm ńkyí Óburúkpâbí o/twóm nkyi něen. Oo/tî busông ḿbú o/chi o-kye kyikim-esí ńkyí Hádarak ne oshê mú Damásákus. *Chí byikû-banet ḿbyí Ézerel nké nke byi/já Óburúkpâbí* oshê mú Damásákus o/já ǎ to.

² Oshê mú Hámat, mú o/ryí buti ne Hádarak o/já ǎ to, cibicibi ne eshê nyí Táya ne Sádon ne kángkáng byinyídíng ḿbyí banchi bampwô ebe.

³ Táya oo/bi byikit-mbâm o-wáp byiko emen o-fé ké kafâ, ne oo/wuri syílyíba ne gûl chwóó o-fé ké kafâ, mú o/firi nang nyá nang nyá wǎ ecing.

⁴ Nké Óburúkpâbí o/chi o-kúng kángkáng byěm ḿbyí mu ne mbyí. O/chi o-wuri esang emen o-pwó ké baya, ne o/chi o-shí oshê ámu nang kaǎnyín kaa*waa*.

⁵ Oshê mú Áshíkelon o/chi o-ri ńkyín, bushî bu-róng kámú. Oshê mú Gáza o/chi o-ri kánkyí kyi-bán kámú kanong kanong. Dyizong dyibónge nké kyi/chi kyi-chi Ékoron, achi nyí badatî a-waa ng kámbé kyísí. Otu mú Gáza o/chi o-kpú, ne banet ba/chi ba-jaa ké Áshíkelon.

⁶ Banet ḿbé ba/fím eshê chwápchwapchwáp ba/chi ba-kûkyú ké Áshídot. Óburúkpâbí oo/raa o/fu, nyǐ o/chi o-bwa ne bantông byiko-banet-Fyilíta ámbe kyísí kyísí.

⁷ Mbé baa*ba/chi ba-chîryí enyam nyí nyi ne baróng* nang byiryíng-ociring byikíri baa*ryí to*. Kángkáng banet ḿbé ba/chi ba-waa bakpó ba/chi ba-firi ké burwám-banet ejí, ne ba/chi ba-firi kyikim-oshê ké kyikû-banet ńkyí Júda. Ékoron e/chi e-firi ké burwám-banet ejí wǎ eringe nyí banet ḿbé Jébus ba/mû ba/chi ba-firi.

⁸ Me n/chi m-bám esí ejí, nyí mm*ba/chi m-bángê basúja ba-shwôm ké nyǐ*. Mm*ba/chi n-chîbángê bambên atyém-batu ba-cít banet ejí*. Me nn/ri eringe nyí banet ejí baa/ri busông.

Otu mú Nkéré mú mu o-bâ ké Kashú

⁹ Jêe n̂g, ǎ banet ḿbé Záyon. Ben banet ḿbé Jerúsélem, jwó n̂g ne bunyîn-dyityém ne ejá kyíbóng kyíbóng. Tún n̂ achi ba-ri, otu enen o-kú o-bâ o-kâm běn. Nyǐ mu o-bâ wǎ otu mú oo/kpógê byití, nké mu o-bâ wǎ onet mú o*fí kiǐtí*. O/yú ké kyisu-kaanyam-atû mu o-bâ.

¹⁰ Óburúkpâbí o/raa o/fu, n/chi n-fîm bamútu-byití ḿbé bubyî-orá budatut ba-byí ké Ézerel, n-kúng bubyî-orá ḿbú mbu ké Jerúsélem. N/chi m-bên báre ḿbé ba/kúng ba-nwa byití. Otu enen o/chi o-chi eshê e-firi ké bunyîn-dyityém ne barî. Nyǐ o/chi o-kyú otu mú ejíí emúmú, kyi-fím ké bukô-ejíí bubónge kyi-ribi ké ḿbú áku.

Osówo o/bwa ne Banet Emen Esim

¹¹ Óburúkpâbí o/raa o/fu, ké bubwô ḿbú ocím ejí mú n/ryí ne ben, mú n/kúlî kámú ké baróng ḿbé ba/chi byifen, n/chi n-chi banet enen ba-fem. N-chi i kámbé ba-byí ké dyibíng-búsóng ńdyí dyi*fí ne omu*.

¹² Ben mú bamu ba-kyú u wǎ básóng ké oshê-banet, mú ba-kú ba-tî ng achi nyí badafyi, fyi n̂g. Fyi n̂g ké kyikit enen ńkyí baa*ri to busông*. Me mu n-sét ng běn kántîk, n/fu, n/chi n-ré běn dyifwá kampén kafee ne banjware ké kángkáng afaníkong nyí baa/ri.

¹³ N/chi n-kúng Júda wǎ búre ḿbú súja, n-kúng Ézerel wǎ abán emen. N/chi n-kúng banet ḿbé Záyon wǎ kashwám n-nwa ne banet ḿbé Girîs.

¹⁴ Óburúkpâbí o/chi o-byí o-bwom kyíbóng, banet emen ba-bwom kyísí. O/chi o-ché abán emen nyí adakwáng wǎ kasabang. Óburúkpâbí mú o/rêe o-shwôm o/chi o-jwá ntán emen. O/chi o-cen ké afú nyí aryên, nyí nyi a-fím m busyísen. [

¹⁵ Óburúkpâbí mú o/rêe o-shwôm o/chi o-ku banet emen, ne mbé ba/chi ba-ju banet-bushwôn ebe. Ba/chi ba-wonge ké byití wǎ bambwôm bato, ne ba/chi ba-chi baróng ḿbé banet-bushwôn ebe ba-byí. Baróng ámbe ba/chi ba-sen wǎ baróng ḿbé badachi kyifen, ḿbé badabírî ké dyicáng ba-pwó ké kyikit-kyifen echi.]

¹⁶ Ké nkéré mú dyicí ándyi dii/fyi, Óburúkpâbí o/chi o-nyii banet emen wǎ eringe nyí mbâm ebû odanyii ebû emen ké afaníkong. Mbé ba/chi ba-san ké esí emen wǎ byibwáng ḿbyí byidasan, ḿbyí badalák ké etam-butu.

¹⁷ Esí emen e/chi e-nwa kanong kanong e-kûbát byiryíng. Bwǎsíng ba/chi ba-ryí esang-byichí emen ba-jwáp bato emen ba-firi shwaneshwane.