Zákaryâ 8 - Bokyi Bible

Óburúkpâbí o/ryí Ocím o/fu, Nyǐ o-bwa ng ne Jerúsélem wǎ eringe nyí o/mû

¹ Óburúkpâbí mú o/rêe o-shwôm o/sét mě kyitwóm ńkyín.

² O/fu, me mu n-ryuu ng n/fu, n-chwáp ng Jerúsélem ké bubwô ḿbú kyijé ńkyí banet emen mbe ba-jang ng mě ejê, kyijé ánkyi ńkyí kii/chi mě n-sa kafâ ne banet-bushwôn emen.

³ Me n/chi m-bwa dyijê ké Jerúsélem, oshê ejí mú o/já mě, n-da-kyú ké mǔ. Ba/chi ba-kûkó kámú Oshê mú o/fé Dyityém ne Me, ne kaku ńké Óburúkpâbí mú o/rêe o-shwôm, ba/chi ba-kûkó kánké Kaku-Ociring.

⁴ Banyinchéng ne banyinyi ḿbé baa/kâa, ba-kú ba-cen n ké echí, ba/chi ba-chîkpet ekyú ké otyém-oshê.

⁵ Byiká-oshê byi/chi kyi-chîsú ne bwǎn-banyinchéng ne ḿbé banyinyi, ḿbé badachi acáá.

⁶ Ńkyín kyi-rángê e wǎ chwǒm ńkyí kii*nwa echi* ké achi nyí banet-oshê ḿbé ba/waa ké kafâ, nké ne me kii*sóng echi*.

⁷ Me n/chi n-nyii banet ejí n-koo ké esí nyí ba/kúng kámbé ba-dim ne mbé,

⁸ ne n/chi m-bwa ne mbé esim ké kyicê ńkyí esû nyi e-byí i, ne ńkyí nyi e-ríbî ng, ba-ba-kyú ké Jerúsélem. Mbé ba/chi ba-kyú banet ejí, ne me to n-kyú Osówo ebe, n-kûtún kámbé acît aa*chi* kángkáng nkéré.

⁹ Kám m̂ dyityém. Kántîk, ba-kú ba-jwo ng bachíchí-byiraa ámbyi byibónge ḿbyí bamkpábé ḿbé badasét byiraa ejí ba/mû ba/sét běn ké nkéré mú ba/mû ba-fâ kyikû-ekpe nyí ba/bwât kiǐtí-kyise-kyifen ejí echi ba-bi.

¹⁰ Ne nkéré ámu o-fyi, onet o/mû o*fí mú o/mû odaman eyámê onet* nang enyam* ne onet to o/mû o*fí mú odaman efem ké abwô nyí banet-bushwôn emen*. Me n/chi banet ba-bírî bunwa ne barî.

¹¹ Nké kántîk, me n-kú n-chi i banet ḿbé oshê mún, ḿbé ba/waa bakpó, byěm ké bukwóp bukíri.

¹² Mbé ba/chi ba-kûkwón byíkwôn ebe ké bunyîn-dyityém. Byichí ebe byi/chi byi-zím byirim, ne esí ebe e-bát ng byiryíng, ne omu o/chi o-na o-kwárê. Me n/chi n-kye banet ḿbé oshê ejí, ḿbé ba/waa bakpó, kángkáng banjware ḿbén.

¹³ Banet ḿbé Júda ne Ézerel, ké nkéré mú o/shwôm ké esim, bacinbánet baa/shú barî ba/fu, kyi/bát busông ḿbú bu/róng Júda ne Ézerel buróng běn to. Nké me n/chi n-nyii běn, ne banet ámbe ba/chi ba-raa kâng ne barî ba/fu, kyi/bát bakoo dyizong-banjware ḿbé Júda ne Ézerel nké ba/koo. Ké bubwô ámbu, kâm m̂ dyityém, *da n̂g echi ba-shî*.

¹⁴ Óburúkpâbí mú o/rêe o-shwôm o/raa o/fu, ké nkéré mú banchí enen ḿbé kpákpá ba/chi kafâ ka-sa mě, me n/kabe n/fu, n-kyâ kámbé busông, ne n/chi kánkyí n*da/yángê dyityém ejí*.

¹⁵ Nké kántîk, n-kú n-tî ng okabe mú ndajware banet ḿbé Jerúsélem ne Júda. Ké bubwô ámbu, *da n̂g echi ba-shî*.

¹⁶ Nyín byěm ḿbyí ben ba-man ba-chi. Kû n̂g esét barî ntûntû. Ké esuk, két n̂g mpan mú baa*ryí acît* dyizong-mpan ńdyí dyidabê ne bunyîn-dyityém.

¹⁷ *Da n̂g ekyé akwóp nyí badanémê barî*. *Da n̂g esét kyisédéng ba-sem mě*. Kyisédéng ne acît eryí ne anwa enwa byi-sa ng mě kafâ.

¹⁸ Óburúkpâbí mú o/rêe o-shwôn o/sét mě kyitwóm ńkyín

¹⁹ o/fu, esong nyí bamu ba-cíp ng ké etukáku enyii ne etánge ne káchâtkányi ne diǐkpú nyí kángkáng dyije e/chi e-bírî ací nyí dyijêe ne bunyîn-dyityém ḿbú banet ḿbé Júda. Ntûntû ne bunyîn-dyityém byi-man byi-jê běn.

²⁰ Óburúkpâbí mú o/rêe o-shwôm o/raa o/fu, nkéré mu o-bâ mú banet ba/chi ba-fím ké eshê [chwóó] ba-bâ Jerúsélem.

²¹ Banet ḿbé ba/fím oshê obónge ba/chi ba-sét ḿbé ba/fím oshê okíri ba/fu, byi-kú byi-dim m byi-da-kye Óburúkpâbí mú o/rêe o-shwôm ofê, byi-fé nshwam byi-kye ǎ o-jware bě. Bâ n̂g ne be ké kyikû. [

²² Bujê]-banet chwóó ne eshê nyí nyi ne busa ba/chi ba-bâ ké Jerúsélem ba-ba-kye Óburúkpâbí mú o/rêe o-shwôm ofê, ba-fé nshwam ba-kye ǎ ba/fu, ojware kámbé.

²³ Ké nkéré ámu, bacinbánet ashí diǐkpú ba/chi ba-bâ ba-kâm onet-Jûs obónge ba-sét ǎ ba/fu, byimu byi-ryuu ng byi/fu, byi-koo ng to kanong eyên, ké nǎ, bii/jwo ba/fu, Osówo mu ne wo.