Zákaryâ 6 - Bokyi Bible

Akat nyí o/ri kyi-kim ne Bamútu Banyii

¹ Me n/chîri akat akíri. Nkéré mún, n/ri bamútu banyii ḿbé bubyî-orá budatut ké mbe ba-byí i ba-bâ ké otyém ne otyém mú eku-biǐré ḿbyí borôn efee nyí e/nyâam.

² Bubyî-orá ḿbú shíshét nké bu/mû bu-tut ng mútu mú mbwôp kashú, ḿbú pyampyam bu-tut ng mú nnyinyěng,

³ ké bamútu bachât, bubyî-orá ḿbú kpárádádát nké bu/mû bu-tut ng kámú, ne ké banyii, bubyî-orá ḿbú byibît byibît nké bu/mû bu-tut ng kámú.

⁴ Me m-bí orím mú onong ámu n/fu, bonchí, bamútu ḿbén ba/byí nǎ.

⁵ Nyǐ o-faa mě o/fu, ba-chi i afú nyí adatugi anyii, nyí aa/fím kántîk kántîk ké bushú ḿbú Óburúkpâbí mú o/já ejíí emúmú a-bâ.

⁶ Mútu mú bubyî-orá ḿbú pyampyam mbu bu-tut ng o/mû mu o-jâ bushûyû ké Bábyílon. Bubyî-orá ḿbú kpárádádát bu/mû mbu ba-jâ ké kyicê ńkyí esû edaríbî e-jâ, ne bubyî-orá ḿbú byibît byibît bu/mû mbu bu-jâ ké oshê mú mu busyísen.

⁷ Ńdyí bubyî-orá ḿbú byibît byibît bu-byí i bu-bâ, bu/mû mbu bu-dûu ng bu/fu, mbú bu-da ng etún ejíí mbú bu-ri. Orím mú onong ámu o-sét kámbú o/fu, ca n̂g ba-da-tún ejíí ba-ri, ne bu-dim bu-da-chi éné.

⁸ Ne orím mú onong ámu o-wonge kâng o-kó mě o/fu, bubyî-orá ḿbú bu/bírî bushûyû ké Bábyílon boo/chee kafâ esa ńké Óburúkpâbí.

Óburúkpâbí o/kye Busa o/fu, bacít Jóshwa Etam-Butu

⁹ Óburúkpâbí o/sét mě kyitwóm ńkyín.

¹⁰ O/fu, kúng eyáré nyí Hedyâ ne Tobyíja ne Jedáya, mú ba/mû ba/kám kámbé ké byití wǎ básóng, ba/kye a-ca ochéé óchee ne nyǐ ké kyise ńkyí Josáya mú wǎn-Zefanyâ. Kángkáng banyinchéng ḿbén baa/fím ké kyikit ńkyí ba/mû ba/kám kámbé ba-dim ne mbé wǎ básóng ké Bábyílon ba-fyi.

¹¹ Yip gûl ne syílyíba mú ba/kye a-chi etam-butu, a-yip kányí a-cít Jóshwa mú wǎn-Jehózádak, mú otu-nchi kyifen-Osówo.

¹² Sét ǎ a/fu, Óburúkpâbí mú o/rêe o-shwôm o/sét o/fu, onyinchéng mú mbe ba-kó ng ǎ Kyire-Kyichí o/chi o-kán ké kyikit ńkyí mu o-kyú u, ne o/chi o-bwât kiǐtí-kyise-kyifen echi ńkyí Óburúkpâbí o-bi.

¹³ Nyǐ nké o/chi o-bi kánkyí, ne o/chi o-koo ofê mú o/kwárê ne otu, ne o/chi o-kûtún banet emen. Nchi kyifen-Osówo o/chi o-bwom o-kim ne kakyúng-butu emen, ne mbé ashí afee ba/chi ba-chi bǎmkpóngé ké bunyîn-dyityém ne barî.

¹⁴ Etam-butu ányi e/chi e-bwom wǎ chwǒm-dyizǐm ké kiǐtí-kyise-kyifen echi ńkyí Óburúkpâbí, ké ofê mú [Hedyâ] ne Tobyíja ne Jedáya ne [Josáya.]

¹⁵ Banet ḿbé mbe ba-kyú u tíbítíbí ba/chi ba-bâ ba-ba-chwáp ba-bwât kiǐtí-kyise-kyifen echi ńkyí Óburúkpâbí ba-bi. Ne ké nkéré mú baa/bi kánkyí, ben ba/chi ba-nyît ba/fu, Óburúkpâbí mú o/rêe o-shwôm nké o/twóm mě kyikit emen. Ńkyín kyi/chi kyi-chi â ben ba/tî byije ḿbyí Osówo Óburúkpâbí enen kanong kanong.