Zákaryâ 4 - Bokyi Bible

Akat nyí o/ri kyi-kim ne Kyikwap ńkyí badatwôom Etyuryíkáng

¹ Orím mú onong mú o/mû o-pem m ne me o/chîbê o-ba-jwóbê mě éné wǎ m/mû n-rê ng,

² o-bí mě o/fu, wo amu a-ri ng ebóng. Me n-faa ǎ n/fu, mu n-ri ng kyikwap ńkyí badatwôom etyuryíkáng, ńkyí ba/chi ké gûl. Ké dyishí-kyikwap ánkyi ba/twôom dyicáng ńdyí badafé bakút-otyuryíkáng. Ké kyikwap-etyuryíkáng ánkyi, etyuryíkáng nyi káchâtkányi nyí ba/twôom, ne ba/mû ba/chi to byikit káchâtkányi ḿbyí badafé bacat káchâtkányi.

³ Byichí-ólif byifee byi/mû ányi ké bakô-kyikwap-etyuryíkáng ánkyi, kyibónge ké bukô bubónge, ńkyí kyibónge ké bukô ḿbú áku.

⁴ Ne me m-bí kâng orím mú onong ámu n/fu, bonchí, byěm ḿbyín byi/bwom ké ebóng.

⁵ Nyǐ o-bí mě o/fu, wo a*fí a-nyît ng*? Me n-faa ǎ n/fu, bonchí, n*fí n-nyît ng*. [

^10b Orím mú onong ámu o-sét mě o/fu, etyuryíkáng ányi káchâtkányi e/bwom ké achi káchâtkányi nyí Óburúkpâbí, nyí nyi a-ri ng ejíí emúmú.

¹¹ Ne me m-bí ǎ kâng n/fu, byichí byifee ḿbyí byi/bwom ké bakô-kyikwap-etyuryíkáng byi/byí nǎ.

¹² Byire-byichí-ólif byifee to ḿbyí mbyi ké bakô-ekunge nyí ba/chi ké gûl, nyí bakút-ólif mbe ba-byí i ké nyǐ, byi/byí nǎ.

¹³ Nyǐ o-bí mě o/fu, wo a*fí a-nyît ng*? Me n-faa ǎ n/fu, bonchí, n*fí n-nyît ng*.

¹⁴ Ne nyǐ o-sét mě o/fu, ḿbyín byi-chi i banyinchéng ashí afee ḿbé Osówo oo/cá, ne oo/pwó kámbé bakút ké ashí, o-jware kámbé o/fu, bakyú bǎmgbán ḿbé emen mú nyǐ mú mu Óburúkpâbí mú ejíí emúmú.]

Ocím mú Osówo o/ryí Zerubábel

⁶ Orím mú onong ámu o/sét mě o/fu, me nsét Zerubábel kyitwóm ńkyín ńkyí kyi/fím ne Óburúkpâbí. O/fu, wo a/chi a-kpógê, *chí ké bubwô ḿbú byití ekán* nang ké ḿbú busa ḿbú eyên wo eyén* nké a-kpógê ng ké bubwô ḿbú Busun ejí.

⁷ Byikit ḿbyí byida ǒ eku, ḿbyí byi/rêe wǎ eku nyí nyáám, byi/chi byi-rím ké bushú eyên. Wo a/chi a-bwât kiǐtí-kyise-kyifen ejí echi a-bi, ne ké nkéré mú a-kú a-twôom m nkuli kyikû-buká ké nkyí, banet ba/chi ba-wonge ba/fu, kyi/nwa, kyi/nwa.

⁸ Óburúkpâbí o/chîtwóm kyitwóm kyikíri kyi-kâm mě.

⁹ O/sét o/fu, Zerubábel oo/kpet kyikû-ekpe ńkyí kiǐtí-kyise-kyifen ejí echi, ne o/chi o-bi kánkyí kyi-man. Ké nkéré mú ńkyín kii/chi, banet ejí ba/chi ba-nyît ba/fu, me nké n/twóm ǒ n-kye kámbé.

^10a Asa aa/jwâa kámbé, ké nǎ, bǎmkpóngé ba*fí ba-câ ochéé óchee*. Nké mbé ba/chi ba-ri ké Zerubábel o/chi o-bi kiǐtí-kyise-kyifen ejí echi o-ca kashú, ne dyityém dyi/chi dyi-nyîn kámbé.