Zákaryâ 2 - Bokyi Bible

Akat nyí o/ri kyi-kim ne Orí-Byěm ekan

¹ Ké akat akíri, me n/ri onyinchéng obónge ne orí mú badakan byěm ké bubwô.

² M-bí onyinchéng ámu n/fu, wo amu a-wâa ng nyá. Nyǐ o-faa o/fu, mu n-wâa ng n-da-kan Jerúsélem n-ri eringe nyí o/rêe baryên o-kwóp to butang.

³ Ne n-ri kâng orím mú onong mú o/mû o-pem m ne me o-tín o-bâ kashú, orím mú onong okíri o-bâ o-kâm ǎ.

⁴ Orím mú onong mú mbwôp kashú o-raa ne mú obónge o/fu, zóngê ochéé a-da-sét mú wǎn-kyisat ámu ne orí mú badakan byěm a/fu, banet ne bampong ba/chi ba-jang ejê chwóó ké Jerúsélem ńkyí kyi/chi kyi-chi kámú o-rêe o-shwôm mú baa*man ebi ekpe ba-wáp kámú ba-fé ké kafâ*.

⁵ Óburúkpâbí oo/ryí ocím o/fu, nyǐ oyén o/chi o-kyú ekpe nyí okwâ, nyí e/chi e-wâng oshê e-ku kámú, ne nyǐ o/chi o-kyú ányi ne kángkáng busa ḿbú busan emen ḿbú ragerage.

Óburúkpâbí o/kó Banet ḿbé ba/kám Kámbé wǎ Básóng o/fu, babwa Esim Dyijê

^6-7 Óburúkpâbí o/sét banet emen o/fu, me m/pwó běn byiryibyiryi ké byikit. Nké kántîk, ben mú bamu ba-kyú u ké eshê-banet wǎ básóng, chêe n̂g ké Bábyílon ba-bwa esim dyijê ké Jerúsélem.

⁸ Nang yeě nké o/ta běn ányi o/ta chwǒm ńkyí kyi/jang mě ejap ké dyityém. Ne Óburúkpâbí kâng o-sét mě kyitwóm ńkyín o/fu, me nda-sét eshê nyí ee/kpógê banet emen, o/fu,

⁹ Óburúkpâbí oyén o/chi o-nwa ne ben, ne banet ḿbé ké nkéré obónge ba/mû básóng enen ba/chi ba-kpógê běn. Ké nkéré mú ńkyín kii/chi, nang yeě o/chi o-nyît o/fu, Óburúkpâbí mú o/rêe o-shwôm nké o/twóm mě.

¹⁰ Óburúkpâbí o/raa o/fu, banet ḿbé Jerúsélem, kwán n̂ ekwan nyí bunyîn-dyityém. Me n-kú m-bâ m-ba-kyú ne ben.

¹¹ Ké nkéré ámu, eshê chwóó e/chi e-bâ e-kâm Óburúkpâbí e-firi banet emen. Nyǐ o/chi o-kyú ne ben, ne ben ba/chi ba-nyît ba/fu, nyǐ nké o/twóm mě oshê enen.

¹² Júda o/chi o-chîkyú kiǐtí-chwǒm ńkyí kyi/já Óburúkpâbí ké esí-ociring emen, ne Jerúsélem o/chi o-kyú oshê mú oda ǎ ejê o-shwôm eshê kángkáng.

¹³ Nang yeě nang yeě ocíbî pyêp ké bushú ḿbú Óburúkpâbí, ké nǎ, nyǐ o-kú o-fím m ké kyikit-ociring emen ńkyí mu o-kyú u o-bâ.