Zákaryâ 12 - Bokyi Bible

Onyii mú Óburúkpâbí o/chi o-nyii Jerúsélem

¹ Nyín kyitwóm ńkyí kyi/fím ne Óburúkpâbí kyi-kim ne Ézerel, Óburúkpâbí mú o/paam bubóng, o-fé byikwap ḿbyí byidaníbî esí, o-kye banet dyikpen. O/raa o/fu,

² me n/chi n-chi Jerúsélem o-kyú wǎ mmîk-bato. Eshê nyí e/wáp Jerúsélem e-fé ké kafâ e/chi e-jwáp bato ámbe e-kpet ecíng wǎ bambwôm bato. Ne â ba/wâng Jerúsélem, eshê-Júda nyí áku, nyí e/waa, ba/chi ba-wâng kányí to.

³ Nké ké nkéré mú nkéré ámu oo/fyi, n/chi n-chi Jerúsélem o-firi wǎ buká ḿbú buryên. Oshê nang orá nké o/kan o/fu, mǔ o-yip ng buká ámbu kyíbóng, o/chi o-némê. Kángkáng eshê nyí ké ejíí e/chi e-cibi kyikit kyibónge e-kye Jerúsélem bunwa.

⁴ Ké nkéré ámu, n/chi n-fé bubyî-orá ebe bushî, n-chi banet ḿbé mbe ba-yú u kámbú ba-kpet efún. Me n/chi m-bwom n-kûbám banet ḿbé Júda, nké n/chi n-sé bubyî-orá ḿbú banet-bushwôn ebe achi.

⁵ Ké nkéré ámu, byikû-banet ḿbyí Júda byi/chi byi-raa ne barî byi/fu, Osówo Óburúkpâbí mú o/rêe o-shwôm mu o-kyâ banet emen ḿbé mbe ba-kyú u ké Jerúsélem busa.

⁶ Ké nkéré ámu, me n/chi n-chi byikû-banet ḿbyí Júda byi-firi wǎ okwâ mú odamang ké kafâ-kyizinge ne mú odamang ké kyifát-nkurung mú oo/bwam. Mbé ba/chi ba-ju kángkáng eshê nyí e/fárâng kámbé. Banet ḿbé Jerúsélem ba-waa ng ké kafâ-oshê, chwǒm kii*ta kámbé*.

⁷ Me Óburúkpâbí n/chi m-bwóp kpá kashú n-chi basúja ḿbé Júda ba-kpógê, eringe nyí ofê mú kyikû-banet ńkyí Otu Dívit ne banet ḿbé Jerúsélem ba/chi ba-koo oo*ba/chi o-rêe o-shwôm mú banet ḿbé Júda ḿbé áku*.

⁸ Ké nkéré ámu, Óburúkpâbí o/chi o-ku banet ḿbé mbe ba-kyú u ké Jerúsélem eringe nyí nang banet ḿbé mbe kyeekyee ba-shwôm ba/chi ba-firi ne busa wǎ ḿbú Otu Dívit o/mû ne mbú. Bwǎn ḿbé Otu Dívit ba/chi ba-tông kámbé kiǐfáng wǎ orím mú onong mú Óburúkpâbí, wǎ Osówo oyén.

⁹ Ké nkéré ámu, n/chi n-ju oshê nang orá mú o/kan o/fu, mǔ o-kyâ Jerúsélem bunwa.

¹⁰ Me n/chi n-chi bwǎn ḿbé Otu Dívit ne banet ḿbé Jerúsélem ba-sú ne dyityém ńdyí badari banet bafip ne ńdyí badakûfé nshwam. Mbé ba/chi ba-bírî achi ba-tún onet mú mbé baa/kpet ba-ju, ne ba/chi ba-tii ǎ wǎ eringe nyí banet badatii ncen-wǎn mú odakpú. Ba/chi ba-tii kyi-sa kámbé wǎ banet ḿbé ókpá-wǎn-onyinchéng o/kpú kámbé.

¹¹ Ké nkéré ámu, bukyû ḿbú ba/chi ba-tii ké Jerúsélem bu/chi bu-jê wǎ ḿbú ba/tii Hadadíman ké ndege-esí mú Megído.

^12-14 Kyikû-banet nang kyirá ké esí ńnyín kyi/chi kyi-tii nkyí kyiyén, kyikû-banet ńkyí Otu Dívit ne ńkyí Nátan ne ńkyí Lyíva ne ńkyí Shímye ne kángkáng byikû-banet ḿbyí áku. Kyikû-banet nang kyirá kyi/chi kyi-tii nkyí kyiyén, ne banyinchéng ḿbé ké kyikû-banet nang kyirá baa*ba/chi ba-kyú ne banyinyi ba-tii kyikit kyibónge*.