Zákaryâ 10 - Bokyi Bible

Óburúkpâbí o/ryí Ocím o/fu, Nyǐ o/chi o-nyii Banet Emen

¹ Bí n̂g Óburúkpâbí o-kye běn omu ké nkéré mú ashí-kyifang. Óburúkpâbí nké mu o-twóm m ófíbí mú odana omu mú oryên ne mú odanyérê, o-chi byifát byi-kán byi-kye nang yeě nang yeě.

² Banet mbe ba-da ng ebí erím-bakye ne bansô epé, nké ejá nyí mbe ba-koo ng nyi byisédéng byísedeng ne e*da/byí chwǒm*. Banet bakíri ba/fu, mbé ba-man n esét kyikû-burê ḿbú onet odari, nké banet ámbe mbe ba-nîm m běn. Dyityém ńdyí mbe ba-fâ běn dyi*da/byí chwǒm*. Ké bubwô ámbu, banet mbe ba-yêe ng ké byikit wǎ etám-ebû nyí ee/tánê. Mbé ba/firi ké afaníkong, ké nǎ, ba*fí ne onet-dyishí*.

³ Óburúkpâbí o/raa o/fu, me kafâ nke ka-sa ng mě ne bacinbánet ámbe ḿbé mbe ba-tún n banet ejí, ne n/chi n-kye kámbé busông. Banet ḿbé Júda ba/já mě, ne me, Óburúkpâbí mú o/rêe o-shwôm, n/chi n-kûtún kámbé kanong. Mbé ba/chi ba-kyú bubyî-orá-byití ejí ḿbú mbu ne busa. [

⁴ Batu ne banet-ashí ne bannyân byití ba/chi ba-fím ké burwám ebe, ḿbé ba/chi ba-kûtún banet ejí.]

⁵ Banet ḿbé Júda ba/chi ba-kpógê byití wǎ basúja ḿbé badacím banet-bushwôn ebe ké byiká-oshê ba-fé ké biǐntóng. Mbé ba/chi ba-nwa byití, ké nǎ, Óburúkpâbí mu ne mbé, ne mbé ba/chi ba-kpógê nang banet-bushwôn ebe ḿbé badayú ké bubyî-orá.

⁶ Me n/chi n-chi banet ḿbé Júda ba-shwane. Me n/chi n-nyii banet ḿbé Ézerel n-koo. N/chi n-ri kámbé bafip, n-kúng kámbé kángkáng m-bwa ne mbé dyijê. Mbé ba/chi ba-firi wǎ me m/mû n*da/né kámbé*. Me n-chi i Osówo Óburúkpâbí ebe, ne n/chi n-jwo banshwam ebe.

⁷ Banet ḿbé Ézerel ba/chi ba-firi ne busa wǎ basúja, ba-kyú ké bunyîn-dyityém wǎ banet ḿbé mbe ba-jwáp ng bato. Bwǎn ebe ba/chi ba-zîim dyikpóge ebe ńdyín, ne kyi/chi kyi-nyîn kámbé ké bubwô ḿbú chwǒm ńkyí Óburúkpâbí oo/chi.

⁸ Me n/chi n-kó banet ejí m-kpaa kámbé n-tî kyikit kyibónge. Me n/chi n-ré kámbé dyifwá-búsóng ebe, n-chi kámbé ba-jê chwóó wǎ eringe nyí ba/mû.

⁹ Nang ké mm/pwó kámbé byiryibyiryi ké eshê, ba-kyú u ké byikit ámbyi ḿbyí tíbítíbí ba-zîim mě. Mbé ne bwǎn ebe ba/chi ba-waa bakpó, ba-bwa esim dyijê ashí amúmú nkéré obónge.

¹⁰ Me n/chi m-kpî kámbé ké Éjip ne ké Asyírya m-bwa esim ne mbé dyijê, m-ba-tî kámbé ké oshê ebe mú o/já kámbé. N/chi n-tî to kámbé ké Gyílet ne ké Lebánon, ne esí emúmú e/chi e-sú ne banet.

¹¹ Â mbé ba-kú ba-nyáng ng kace-afaníkong ebe, me Óburúkpâbí n/chi n-díp bunâng-kace, ne kace ńké Nâl ka/chi ka-núng. N/chi m-bwa ne bantông byiko-banet-Asyírya kyísí, ne kiǐtí-oshê-Éjip kii*ba/chi kyi-chîchi ne busa*.

¹² Me n/chi n-chi banet ejí ba-shwane. Mbé ba/chi ba-fé mě, ba-chi ńkyí ndasét kámbé. Óburúkpâbí nké o/raa.