Zákaryâ 1 - Bokyi Bible

Óburúkpâbí o/kó Banet Emen o/fu, babwa Esim ba-kâm ǎ

¹ Ké otukáku mú etukáku nyíryinyi nyí nnyinyěng-dyije ńdyí Otu Daráyas o/mû otu mú Pésha, Óburúkpâbí o/twóm kyitwóm ńkyín kyi-kâm Zákaryâ mú mkpábé mú odasét byiraa-Osówo, mú wǎn-Berekyâ, mú bonchí emen mú kánkán o/mû o-bángê e Édo.

² Óburúkpâbí mú o/rêe o-shwôm o/sét Zákaryâ o/fu, osét banet ḿbé Júda ne Ézerel o/fu, me, Óburúkpâbí m/mû n/sa kafâ kanong kanong ne banchí enen ḿbé kpákpá,

³ nké kántîk, me mu n-sét ng běn n/fu, bwa n̂g esim ba-kâm mě, ne me to n/chi m-bwa esim n-kâm běn.

⁴ *Da n̂g ekyú wǎ banchí enen ḿbé kpákpá*. Ké nkéré mú o/shwôm ké esim chwóó, bamkpábé ḿbé badasét byiraa ejí ba/sét kámbé kyitwóm ejí, ba/fu, ba*dachi ba-chîkyú kyibî-dyikpen ńdyí byibî echi*. Nké mbé ba*da/fwôo atông ba-jwo mě* ba-chi nang ńkyí n/sét kámbé*.

⁵ Banchí enen ḿbé kpákpá ne bamkpábé ámbe ḿbé badasét byiraa ejí ba*fí to bakpó*.

⁶ Ké ocím mú bamkpábé ḿbé badasét byiraa ejí, ḿbé bǎmgbán ejí, me n/kye banchí enen ḿbé kpákpá byije, n-kuri kámbé ekó, nké mbé ba/né kámbyí, ba-ri to busông ké bubwô ámbu. Ne byiko byi-kpú kámbé kâng ba-mîng byibî echi, ba-bángê ba/fu, me Óburúkpâbí mú o/rêe o-shwôm nn/kye kámbé busông ḿbú bu/kwárê ne mbé wǎ eringe nyí me m/mû n/tî n/fu, n-kyâ kámbé.

Akat nyí Zákaryâ o/ri kyi-kim ne Bubyî-Orá

⁷ Ké nnyinyěng-dyije ńdyí Otu Daráyas o/ryí butu, ké ací bujam ne anyii nyí etukáku diǐkpú ne din, ké otukáku mú Shébat, Óburúkpâbí o/sét mě kyitwóm ké chwǒm-akat ńkyí n/ri ne buchú.

⁸ Me n/ri orím mú onong mú Óburúkpâbí ké o/yú ké kabyî-orá ńké shíshét. O/mû o/bwom ké otyém-byichí ḿbyí badakó myítil, ké owo, ne bubyî-orá bukíri ḿbú shíshét ne byibît byibît ne kpárádádát bu/mû bu/bwom ǎ ké kyikû.

⁹ Me m/bí orím ámu n/fu, bonchí, bubyî-orá ḿbún bu/byí nǎ. Nyǐ o-faa mě o/fu, me n/chi n-tông ǒ eringe nyí bu/byí.

¹⁰ Óburúkpâbí nké o/twóm kámbú o/fu, buca bu-da-kpúrî ejíí bu-ri.

¹¹ Bubyî-orá ámbu bu-sét orím mú onong ámu bu/fu, be bii/cen byi-kpúrî ejíí emúmú ne bii/ri byi/fu, ejíí emúmú e/firi ké bunyîn-dyityém.

¹² Ne orím mú onong ámu o-raa o/fu, Óburúkpâbí mú o/rêe o-shwôm, wo kafâ kaa/sa ǒ ne Jerúsélem ne eshê nyí Júda ké bajam-aje bachât esim diǐkpú kántîk. Kyi-chî ng erí nǎ ne wo a-ri kámbé bafip.

¹³ Óburúkpâbí o-faa orím mú onong ámu ne ejá nyí edakye bunyîn-dyityém,

¹⁴ ne orím ámu o-sét mě o/fu, me nsét ńkyí Óburúkpâbí mú o/rêe o-shwôm o/sét, o/fu, me mu ne kiǐtí-kyijé ne okére ké dyityém kyi-kim ne oshê-Jerúsélem mú o/já mě,

¹⁵ ne kafâ nke ka-sa ng mě kanong kanong ne eshê nyí nyi ké bunyîn-dyityém, afaníkong a*fí kámbé*. Ké nǎ, ké nkéré mú me m/mû n-níbî ng kafâ ńké ka/mû ka-sa ng mě ne banet ejí, eshê ányi e/chi busông ḿbú banet ejí bu-jê bu-shwôm.

¹⁶ Ké bubwô ámbu, me mm/bwa esim ké Jerúsélem eringe nyí ndari oshê ámu bafip. Ba/chi ba-bwât kiǐtí-kyise-kyifen ejí echi ne oshê ba-bi.

¹⁷ Orím mú onong ámu o/sét mě to o/fu, me nsét n/fu, Óburúkpâbí mú o/rêe o-shwôm o/raa o/fu, eshê emen e/chi e-chîjá byěm ḿbyí nyi e-ryuu ng, ne nyǐ o/chi o-chîchwáp Jerúsélem, o-kúng oshê ámu o-firi mú emen.

Akat nyí o/ri kyi-kim ne Etwóm-Mpong

¹⁸ Ké akat akíri, me n/ri etwóm-mpong enyii.

¹⁹ M-bí orím mú onong mú o/mû o-pem m ne me n/fu, etwóm-mpong ńnyín e/byí nǎ. Nyǐ o-faa mě o/fu, e/bwom ké eshê nyí ké ejíí nyí ee/chi banet ḿbé Júda ne Ézerel ne Jerúsélem ba-pwôo byiryibyiryi.

²⁰ Ne Óburúkpâbí kâng o-tông mě banet-bǎmkpóngé ashí anyii ne áma ké abwô.

²¹ Me m-bí n/fu, banet ḿbén ba/bê ebóng echi. Nyǐ o/faa mě o/fu, mbé baa/bê eshê nyí e/kpógê esí nyí Júda e-pwó banet byiryibyiryi bushî efé ba-kpógê kányí.