Tátus 3 - Bokyi Bible

Édúú nyí Banet ḿbé ba/bángê ké Karâs

¹ Zîim banet eyên a/fu, bakûjwâa byiko ebe kyísí ba-kye batu-ashí ne banet-ashí, ba-kûkye kámbé ofê, ne bakpá to byiko ḿbyí badachi nang ebóng chwǒm ńkyí nkyi kanong.

² Sét kámbé a/fu, ba*dachi ba-raa kyibî kyi-kim ne onet nang obónge*. Nké bakûkyú ké bunyîn-dyityém ne dyityém ecángê ne banet, ne bakûtông kángkáng banet édúú nyí degere kángkáng nkéré.

³ Ké nǎ, be bayén ké nkéré obónge byi/mû enyam-banet, ofê-onet o/mû o*fí bě* ne byi/mû byi*fí byi-chi i ńkyí nkyi kanong*. Be byi/mû básóng ḿbé byibî-byěm ḿbyí atyém eten nyi a-ryuu ng ne ḿbé kángkáng azong-byěm-bunyîn-dyityém ḿbyí ké ejíí ńnyín. Be byi/kúng akpen eten byi-tî ké kyibî eryuu ké byiko-banet ne orêm echi ké byěm-banet. Byi/sa banet bakíri kafâ, ne mbé to ba/sa bě kafâ.

⁴ Nké ké nkéré mú dyityém ecángê ne kyijé ḿbyí Osówo mú Onet-Onyii eten byi/byí wááng,

⁵ nyǐ o/nyii bě. Kyi/mû kyi*fí ké bubwô-bǎmkpóngé ḿbé banong ḿbé bii/chi*. Nké kyi/mû ké bubwô-bafip emen ḿbé o/ri bě nké o/nyii bě ké bubwô-osoo mú Busun-Osówo ḿbú mbu bu-bwât ng bě bu-fwon, bu-kyâ bě dyikpen ńdyí dyifyîfî.

⁶ Osówo o/fé bě Busun emen chwóó ké byiko, ké bubwô-Jisos Karâs, Onet-Onyii eten,

⁷ eringe nyí ké bubwô-ochwâp emen, Osówo odakét mpan o-nwa bě, ne byi-já dyikpen ńdyí ne banyá, ńdyí byimu byi-tî ng achi.

⁸ Ńkyín nkyi kyiraa ńkyí ntûntû. Me mu n-ryuu ng ǒ n/fu, fé etíngetínge-busa ké byěm ḿbyín, eringe nyí banet ḿbé ba/bángê ké Karâs ba/chi ba-tî nkéré ebe ké bǎmkpóngé ḿbé banong echi. Byěm ḿbyín mbyi byinong, ne byi-chwáp ng to kámbé.

⁹ Nké *dakûkán enyam-okân ké dyishí* a-kûzîim nang kiintintang-otáng-azîn-banet eten ḿbé kpákpá* nang ashwôn eshwôn* nang anwa kyi-kim ne Byije-Músis*. Mbyí bii*chwáp* ne byi*da/byí chwǒm*.

¹⁰ Kuri onet mú mu o-cen n ne dyipap ekó kampén nang kafee, ne â a/chi éné kâng, *dachîkyú ne abwô ké chwǒm nang kyibónge kyi-kim ne nyǐ*.

¹¹ Wo amu a-nyît ng a/fu, dyizong-onet ándyi dii/bên, ne byibî emen mbyi byi-tông ng byi/fu, nyǐ o*fí o-chi i ńkyí nkyi kanong*.

Nkuli Kyikû-Byiraa

¹² Ké nkéré mú nn/twóm Atémyis nang Tyíkyíkus kyikit eyên, kan byiko a-bâ a-kâm mě ké Nyikopólyis, ké nǎ, n/kabe n/fu, n-kyú u ányi burwom bumúmú.

¹³ Kan byiko a-chwáp Zénas mú lóya ne Apólos ba-kpet bucen ebe ḿbú mbe ba-dim m. Ri to a/fu, mbe ne kángkáng byěm ḿbyí mbe ba-ryuu ng.

¹⁴ Chi banet eten ba-kwâa eringe nyí badatî nkéré ebe ké bǎmkpóngé ḿbé banong echi, eringe badajá bachíchí-byěm ḿbyí mbe ba-ryuu ng. Ba*dachi ba-kyú byibî-akpen*.

¹⁵ Kángkáng banet ḿbé mbe ne me ba/ta ǒ kyiraa. Ta bacín eten ḿbé ké dyityém efé ne Karâs kyiraa. Ochwâp mú Osówo okyú ne ben kángkáng.