Tátus 2 - Bokyi Bible

Byiraa-Ékwâbashi nyí Karâs ḿbyí Ntûntû

¹ Nké wo a-man a-tángê ńkyí byi/bángê ne byiraa-Osówo ḿbyí ntûntû.

² Sét bakínkán-banyinchéng a/fu, bakyú ne ofê, ba-kyú to achi wááng, ba-kûníbî to byiko ebe. Bakyú nyangenyange ké dyityém ebe ńdyí ba/fé ne Karâs ne ké kyijé ne ké dyityém ecíp.

³ Ké dyizong-bukwóp bubónge to, sét bakínkán-banyinyi a/fu, bakûníbî byiko ebe wǎ eringe nyí banyinyi ḿbé mbe ba-kyú u dyikpen ńdyí dyinong badakyú. Mbé baa*man ba-kyú bansêt byisédéng ba-bât banet* ba-kyú nang básóng-bato*. Ba-man ba-tángê ńkyí nkyi kanong,

⁴ eringe nyí badatángê ásé a-kyú ne kyijé ne batyép ebe ne bwǎn ebe,

⁵ eringe nyí badaníbî byiko ebe ba-kyú kpárám, ne eringe nyí badakyú banyi ḿbé banong ḿbé mbe ba-jwo ng batyép ebe kyiraa, eringe nyí onet nang obónge oo*raa kyibî kyi-kim ne kyitwóm ńkyí kyi/fím ne Osówo*.

⁶ Ké dyizong-bukwóp bubónge, tírîng byisat ba-kûníbî byiko ebe.

⁷ Wo oyén a-man a-tông kyiká-bucen ké kángkáng byěm ḿbyí byinong. Kyú ne ntûntû, a-bwom kíngkíng ké byěm eyên ḿbyí amu a-tángê e.

⁸ Kûkúng ejá nyí enong nyí baa*man ebîn kányí* eringe nyí éshwân edawuri banet-bushwôn eyên, ké nǎ, baa*ba/chi ba-já kyibî-chwǒm nang kyibónge ńkyí badaraa kyi-kim ne be*.

⁹ Básóng bakûkye banchí ebe ofê ne bunyîn-dyityém ké kángkáng byěm. Mbé baa*man ba-kûraa* â banchí ebe ba/raa*

¹⁰ ba-jii nang banchí ebe byěm*. Nké mbé ba-man ba-kûtông ba/fu, mbé mbe kanong, ba-fâ banchí ebe kángkáng nkéré, eringe nyí badabê ne akpee ké byěm etángê kyi-kim ne Osówo mú mu Onet-Onyii eten ké kángkáng byěm ḿbyí mbé mbe ba-chi i.

¹¹ Ké ebóng, Osówo oo/tông dyityém emen ecángê wááng, eringe nyí odanyii kángkáng banet.

¹² Dyityém emen ecángê ándyi ndyi dyi-kyâ bě bacê dyi/fu, be byimîng ekyú ké dyikpen ńdyí bii*fé Osówo* ne dyityém etî ké byěm ḿbyí ké ejíí ńnyín. Be byikûkyú ké dyikpen ńdyí byidaníbî byiko eten kanong kanong, ńdyí ndyi dángdáng, ńdyí byidakûfé Osówo ké ejíí ńnyín.

¹³ Eringe nyí be byimu něen, byi-bám m dyicí ńdyí dyinong ńdyí byimu byi-tî ng achi ké ndyí, ké nkéré mú busan ḿbú ragerage ḿbú kiǐtí-Osówo eten ne Onet-Onyii eten to Jisos Karâs bu/chi bu-byí.

¹⁴ Nyǐ o/kye kyitông emen ké dyishí eten, eringe nyí oda bě epá ké kángkáng azong-byibî-byěm, ne o-chi bě byi-firi banet ḿbé kpárádádát, byi-já ǎ nyǐ kǎnchí, ne byimu ne okabe shwaneshwane byi/fu, byi-chi i byěm ḿbyí byinong.

¹⁵ Tángê byěm ḿbyín, a-tírîng banet ḿbé mbe ba-fwôo ng atông ba-jwo ǒ, a-bîn to bakíri. *Dachi a-bángê onet nang obónge ké burwám ebe o-tún ǒ fúú*.