Tátus 1 - Bokyi Bible

^1-4 Me Pôl mú mu ḿgbán-Osówo ne onet-kyitwóm-Jisos Karâs nké mu n-sáng ng léta mún n-kye Tátus mú mu ochíchí-wǎn ejí ké dyityém efé ne Osówo ńdyí byimu kyikit kyibónge. Kyi/bát Osówo Bonchí eten ne Jisos Karâs Onet-Onyii eten bakye ǒ ochwâp ne bunyîn-dyityém. Me Osówo o/cá mě, o-twóm mě o/fu, nchwáp banet ḿbé Osówo o/cá kámbé, ba-fé dyityém ne nyǐ, n-tángê kámbé ntûntû mú ékwâbashi nyí Karâs, mú o/jêem busi ké achi eten etî nyí byimu byi-tî ng byi/fu, byi-koo ng dyikpen ńdyí ne banyá. Osówo mú oo*sét kyisédéng* o/ryí bě ocím mú oda bě ekye dyikpen ńdyín, ne nkéré o-kûkpet, ne o/tông ocím eryí ámu wááng ké ochíchí-nkéré mú o/kwárê ne nyǐ, ké kyitwóm emen. O/kye mě me kyitwóm ánkyi, ne me mu n-sét ng kánkyí ké busa ḿbú Osówo mú mu Onet-Onyii.

Bǎmkpóngé ḿbé Tátus o/chi ké Kyirît

⁵ Me m/mîng ǒ ké Kyirît, eringe nyí adanap byěm ḿbyí byi/tôong ḿbyí badachi a-tî kerededet, a-fîm to banet-ashí ḿbé ékwâbashi nyí Karâs a-tî ké oshê nang orá. Zîim byiraa ejí ḿbyí n/sét ǒ n/fu,

⁶ onet-dyishí-ékwâbashi oo*man o-kyú ne ébîn*. O-man o-kyú ne onyi obónge. Bwǎn emen ba-man ba-kyú banet ḿbé ba/bángê ké Karâs, ne baa*man ba-kyú banet ḿbé badakúng kámbé wǎ bankakafem* nang wǎ bannê byitwóm*.

⁷ Ké nǎ, ké bubwô ḿbú nyǐ mu onet-dyishí mú bǎmkpóngé-Osówo, nyǐ oo*man o-kyú ne ébîn*. Nyǐ oo*man o-kyú ntông byiko* nang nchi kiikuku* nang mbwôm bato* nang nnwa anwa* nang nshwam byěm*.

⁸ O-man o-kyú onet mú mu o-koo ng banet ké kyise emen ne bunyîn-dyityém, ne o-man o-kyú ne kyijé ne chwǒm ńkyí nkyi kanong. O-man o-kûníbî byiko emen. Oo*man o-ryí acît*. O-man o-kyú onet mú onong ké bushú ḿbú Osówo. Ne o-man o-kyú wǎ onet mú ba/tángê ǎ dyishí.

⁹ O-man o-bwom kíngkíng ké kyitwóm ńkyí onet odaman efé dyityém, ńkyí kyi/tyeem ne ńkyí ékwâbashi nyí Karâs nyi e-tángê e. Ké bukwóp ḿbún, nyǐ o/chi o-man efé barî-banet ḿbé áku busa ké byěm ḿbyí ntûntû etángê, ne o-tông to eringe banet ḿbé mbe ba-né ng kyitwóm ba/róng.

¹⁰ Ké nǎ, banet mbe chwóó ḿbé mbe ba-bírî ng bunwa ne Osówo, ne mbe ba-nîm m to banet bakíri ne byěm ḿbyí byi*da/byí chwǒm* aciringaciring banet ḿbé ba/mîng ékwâbashi nyí banet-Jûs abeabe ba-nung ké nyí Karâs.

¹¹ Kyi-nwa ng ńkyí adachi kámbé ba-mîng byiraa ebe ámbyi eraa. Ké ebóng, mbé mbe ba-bên n byikû-abóng byikíri ké byěm etángê ḿbyí ba/mû baa*ba/chi ba-tángê* eringe nyí mbé badachi akpuga ńkyí nkyi chwǒm-éshwân.

¹² Kyi/mû onet-Kyirît oyén mú o/mû mkpábé ebe nké o/sét ńkyín o/fu, banet-Kyirît kángkáng nkéré ba-chi i bansêt byisédéng ne byibî-enyam ne banet-adare ḿbé badaryí byiryíng byírying.

¹³ Ńkyí nyǐ o/sét nkyi ntûntû. Ké bubwô ḿbún, wo a-man a-raa ne mbé kanong kanong, eringe nyí mbé badakyú ne dyityém efé ne Karâs ńdyí nyangenyange,

¹⁴ baa*bángê to ké biǐshwô ḿbyí kpákpá ḿbyí banet-Jûs* ne ké byije ḿbyí ejíí ḿbyí banet ḿbé baa/né ntûntû ba/chi*.

¹⁵ Kángkáng byěm mbyi kpárám ké bushú-banet ḿbé mbe kpárám. Nké chwǒm kyi*fí ńkyí nkyi kpárám ké bushú-banet-byěm-eciring* ne ḿbé ba*fí ba-bángê e ké Osówo* ké nǎ, atyém ebe ne okabe bii/bên ké byěm-eciring.

¹⁶ Mbé mbe ba-sét ng ba/fu, mbé mbe ba-nyît ng Osówo, nké édúú ebe nyi e-tông ng e/fu, kyi*fí ké kafâ*. Mbé ba-sa ng kafâ, ne baa*chi ńkyí ba/fu, bachi*. Mbé ba*da/kwárê mú badachi chwǒm nang kyibónge ńkyí kyinong*.