Rúman 9 - Bokyi Bible

Banet ḿbé Osówo o/cá Kámbé

¹ Ńkyí me mu n-sét ng nkyi ntûntû. N*fí n-sét ng kyisédéng* me Karâs nké o/já mě. Dyityém ejí ńdyí ndyi ké busa ḿbú Busun-Osówo ndyi dyi-sét ng mě to dyi/fu, me n*fí n-sét ng kyisédéng*.

² Bafip ejí ba/jê kanong kanong, ne bubân ḿbú mu n-jwo ng ké dyityém, ké bubwô-banet ejí, banet-oshê ejí, bu*fí bu-man n*.

³ Ké dyishí ebe, me oyén mu n-ryuu ng n/fu, Osówo oyén oshú mě, o-pap mě ne Karâs.

⁴ Mbé nké Osówo o/cá kámbé. O/chi kámbé ba-firi bwǎn emen, o-kye kámbé kyicê-busan emen ḿbú ragerage. Nyǐ o/ryí ocím kampén chwóó ne mbé o-sem byiko emen, ne o-kye kámbé Byije-Músis. Mbé nké mbe ba-fâ Osówo ké bukwóp ḿbú ntûntû. Mbé baa/koo byěm ḿbyí Osówo o/ryí ocím.

⁵ Mbé ba/fím ké kyikû-banet ńkyí biǐtí-banchí eten ḿbé kpákpá. Ne Karâs wǎ onet o/fím ké kyikû-banet ebe. Kyi/bát Osówo mú mu o-tún n kángkáng banet okoo akpee ne banyá ne banyá. Kyi/bát kyikyú éné.

⁶ Me n*fí n-sét ng n/fu, ocím mú Osówo o/ryí oo/bên*. Ké ebóng, *chí kángkáng banet-Ézerel nké mbe banet ḿbé Osówo o/cá kámbé*.

⁷ *Chí nang kángkáng banet ḿbé ba/fím ké kyikû ńkyí Ébarahâm nké mbe bwǎn ḿbé Osówo*. Osówo o/raa ne Ébarahâm o/fu, kyikû-banet ńkyí Ázik mú wǎn eyên nké kyi/chi kyi-kyú ńkyí eyên.

⁸ Ńkyín kyi/byí něen kyi/fu, *chí kángkáng bwǎn ḿbé Ébarahâm* nké ba/chi ba-kúng kámbé wǎ bwǎn-Osówo*. Nké bwǎn ḿbé ba/fwon kámbé ké bubwô ḿbú ocím mú Osówo o/ryí nké mbe bwǎn ḿbé kyikû-banet ńkyí Osówo.

⁹ Ké ebóng, ejá nyí Osówo o/ryí ocím nyi něen. Osówo o/fu, ké nkéré mú nkéré oo/kwárê, me n/chi m-bwa esim, ne Sirá o/chi o-fwon wǎn-onyinchéng.

¹⁰ Ne kyi*da/man éné*. Ké ebóng, bwǎn-banyinchéng ashí afee ḿbé Rebéka o/fwon ba/mû ne bonchí obónge, Ázik mú bonchí eten mú kpákpá.

^11-12 Ké bubwô ḿbú okabe mú Osówo odace kashú, ké eringe nyí wǎn obónge mú Osówo oyén o/cá, Osówo o/raa ne Rebéka o/fu, wǎn mú okínkán o/chi o-kyú ḿgbán mú nche emen. Osówo o/raa ńkyín ne ba-kûfwon bwǎn ámbe, ne bwǎn ámbe ba-kûchi chwǒm ńkyí kyinong, nang ńkyí kii*nwa*. Ńkyí kyi/chi kâng kyi/mû ké bubwô ḿbú Osówo o/kó wǎn obónge, o-mîng mú obónge. Kyi/mû kyi*fí ké bubwô-chwǒm ńkyí nang wǎn obónge o/chi*.

¹³ Wǎ eringe nyí ejá-Osówo nyí ba/sáng kyísí e/fu, Jekôp o/mû o-jê ng mě, nké Éso o/mû o-sa ng mě kafâ.

¹⁴ Be byi-sét ng ebóng kâng. Byi-sét ng byi/fu, Osówo mu o-ryí i acît? Kyi*fí éné*.

¹⁵ Ké ebóng, Osówo o/raa ne Músis o/fu, â kyi/nyîn mě n/fu, n-ri ng onet bafip, n-ri ng. Â n/fu, onet mu o-kpú u mě byiko, o-kpú u mě.

¹⁶ Ké bubwô ámbu kâng, kyi*fí ké bubwô ḿbú chwǒm ńkyí onet o/chi* nang ké ńkyí mu o-ryuu ng*. Nké nkyi ké bafip ḿbé Osówo mu o-tông ng.

¹⁷ Ké ebóng, ejá-Osówo nyí ba/sáng kyísí e/raa ne otu obónge mú Éjip e/fu, me n/kúng ǒ butu ké bubwô-ochíchí-chwǒm ńkyín, n/fu, n-yip ng ǒ n-tông busa ejí, n-chi ejíí emúmú e-nyît dyizîn ejí.

¹⁸ Ké bubwô ḿbún kâng, Osówo mu o-ri ng bafip ne onet nang orá mú o/nyîn ǎ, o-chi onet nang orá mú kyi/nyîn ǎ o-firi nshwan dyishí.

Osówo mu o-két ng Mpan o-bên Banet, o-ri ng to Kámbé Bafip

¹⁹ Onet obónge kâng ké burwám enen o/chi o-raa ne me o/fu, â nkyi éné, Osówo o-cen n nǎ ne o-sét o/fu, onet oo/chi kyibî. Ké ebóng, yeě odaman ené okabe mú Osówo.

²⁰ Nké wo amu ebóng dyizong-onet, ǎ ocín ejí, mú adaman ené ńkyí Osówo o/fu, nyǐ o-chi i. Katí kaa*man ebí onet mú o/mee kánké ka/fu, ebóng kyi/chi ne a-mee mě něen*.

²¹ Onet mú mu o-mee ng butí mu ne busa ḿbú odayip bumee o-chi nang ebóng chwǒm ńkyí kyi/nyîn ǎ. O-man n eyip okpí-bumee obónge o-chi butí bufee, kabónge o-tî ké ochíchí-chwǒm mú kiǐtí, kabónge ńké badayip ba-chi nang ebóng nang ebóng.

²² Nkyi eringe ebónge ne ńkyí Osówo oo/chi. O/mû mu o-ryuu ng o/fu, nyǐ o-tông ng busa-dyityém emen, o-chi banet ba-nyît busa emen. Nyǐ o/cíp dyityém kâng ké ofit eryí ne banet ḿbé ba/mû ba/cen ǎ ne busa-dyityém, ḿbé nyǐ o/mû oo/kpá byiko ḿbyí odaju kámbé.

²³ Ne o/mû mu o-ryuu ng to o/fu, nyǐ o-tông ng kiǐtí-busan emen ḿbú ragerage, ḿbú o/pwó bě be mú oo/ri bě bafip ké byiko. Be mú oo/nap bě o-tî, eringe nyí byidakoo busan emen ḿbú ragerage.

²⁴ Ké ebóng, be nké byimu banet ḿbé nyǐ o/kó. *Chí ké burwám-banet-Jûs nké nke* o/kó to ké burwám-banet ḿbé ba*fí banet-Jûs*.

²⁵ Nyín ńkyí nyǐ o/raa ké nwet mú Hozáya o/fu, banet ḿbé ba/mû ba*fí banet ejí* n/chi n-kó kámbé banet ejí. Oshê mú o/mû o*fí o-jê ng mě* n/chi n-kó kámú oshê ejí mú oda mě ejang ejê.

²⁶ Ne ké ochíchí-kyikit ńkyí m/mû n/sét kámbé n/fu, ben baa*chi banet ejí* ányi nké ba/chi ba-kó kámbé bwǎn ḿbé Osówo mú mu okpó.

²⁷ Ne Azáya o/raa ne bafip kyi-kim ne Ézerel o/fu, nang banet-Ézerel ba/mû ba/bwa ba-jê wǎ éshíshě nyí ké bukô-baya, boǒnyín-banet ké burwám ebe nké Osówo o/chi o-nyii.

²⁸ Ké ebóng, kii*bwon to ne Osówo o-tóbê kángkáng byěm emen* ne ejíí emúmú*.

²⁹ Nkyi wǎ eringe nyí Azáya o/mû oo/sét kpá o/fu, â Otu Kyítá mú kángkáng busa o/mû o*da bě emîng kyicê-kyikû-banet* be byi/mû byi/chi byi-firi wǎ oshê mú badakó Sódom. Be byi/mû byi/chi byi-kyú wǎ oshê mú badakó Gomóra.

Bǎmpém ḿbé Banong ba/já to Banet-Ézerel

³⁰ Ńkyí byimu byi-sét ng nkyi něen. Banet ḿbé ba*fí banet-Jûs* ba/mû ba*fí ba-kan n mbé bayén ba/fu, mbé ba-chi i Osówo o-két mpan o-nwa kámbé*. Nké Osówo o/két mpan o-nwa kámbé, ké ebóng, ba/fé dyityém ne nyǐ.

³¹ Ké bukwóp bukíri kâng, banet ḿbé Osówo o/cá kámbé ba/mû mbe ba-kyé ng kyije ńkyí kyi/chi kyi-chi kámbé ne Osówo o-két mpan o-nwa kámbé, nké ba*da/ri kánkyí*.

³² Ebóng ba*da/ri kánkyí*. Ba*da/ri* ké ebóng, busa ebe kángkáng bu/mû ké byěm ḿbyí ba/mû ba-chi i, bu/mû bu*fí ké dyityém efé ne Osówo*. Mbé ba/kpán ké buká ḿbú mbu bu-chi i banet ba-kpán n ácíring.

³³ Ḿbú ejá-Osówo nyí ba/sáng kyísí e/sét kyi-kim ne mbú e/fu, fwôo n̂g atông ba-jwo, me n/tî buká ké oshê mú badakó Záyon ḿbú bu/chi bu-chi banet ba-kûkpán ácíring. Buká ḿbú bu/chi bu-chi kámbé ba-myii. Nké nang yeě nké o/bángê ne nyǐ oo*mîng ǎ o-waa abwô dyikáá*.