Rúman 8 - Bokyi Bible

Dyikpen ekyú wǎ eringe nyí Busun-Osówo bu/sét

¹ Ké bubwô ámbu kâng, Osówo o*fí o-két ng mpan kántîk* o-bên banet ḿbé mbe ba-kyú u ké ocibi ne Jisos Karâs*.

² Ké ebóng, busa ḿbú Busun-Osówo ḿbú mbu bu-kyâ bě dyikpen ké ocibi ne Jisos Karâs boo/nyii bě ké abwô nyí busa ḿbú byibî ne bukyû.

³ Ńkyí Byije-Músis byi*da/man echi* Osówo o/chi, ké ebóng, atyém eten nyi kyeekyee. Osówo o/két mpan o-bên byibî ḿbyí bii/koo bě busa ké Wǎn emen mú o/twóm, mú o/bê wǎ onet, mú byibî bii/koo ǎ busa o/fu, nyǐ o-bâ ng efîm byibî.

⁴ Osówo o/chi ńkyín, eringe nyí be mú byimu byi-kyú u ké bukwóp ḿbú Busun-Osówo, *chí ké ḿbú eten* byi/chi byi-chi kángkáng ńkyí byije mbyi byi-ryuu ng byi/fu, nkyi kanong.

⁵ Ké ebóng, banet ḿbé mbe ba-kyú u wǎ eringe nyí atyém ebe nyi a-sét ng kámbé, ńkyí atyém ebe nyi a-ryuu ng kii/cít kámbé. Banet ḿbé mbe ba-kyú u wǎ eringe nyí Busun-Osówo mbu bu-sét ng kámbé, ńkyí Busun-Osówo mbu bu-ryuu ng kii/cít atyém ebe.

⁶ Ńkyí dyityém eyên ńdyí kyibî dyida ǒ ecít kyi-cen n ne bukyû. Ńkyí Busun-Osówo budacít dyityém eyên kyi-cen n ne dyikpen ne bunyîn-dyityém.

⁷ Ne onet kâng o-firi ng onet-bushwôn-Osówo, â dyityém emen ńdyí kyibî dyi/cít ǎ. Ké ebóng, onet ámu oo*chi ńkyí kyije-Osówo kyi/sét* ne ké ntûntû nyǐ oo*man echi ńkyí kyije-Osówo kyi/sét*.

⁸ Banet ḿbé mbe ba-chi i ńkyí atyém ebe nyi a-ryuu ng baa*man echi ńkyí kyidanyîn Osówo*.

⁹ Nké ben ba*fí ba-kyú u wǎ eringe nyí atyém enen nyi a-sét ng běn a/fu, bakyú*. Ben bamu ba-kyú u wǎ eringe nyí Busun-Osówo mbu bu-sét ng běn bu/fu, bakyú, â ké ntûntû Busun-Osówo mbu ké atyém enen. Nang yeě nké o*fí ne Busun ḿbú Karâs ké byiko* onet ámu oo*chi onet mú Karâs*.

¹⁰ Nké â Karâs mu ké atyém enen, nang ké enyam-byiko enen e/chi e-kpú ké bubwô ḿbú byibî, Busun-Osówo kâng bu-kyâ běn dyikpen enen, ké ebóng, Osówo oo/két mpan o-nwa běn.

¹¹ Â Busun ḿbú Osówo mú o/jwóbê Karâs ké bukyû mbu ké atyém enen, nyǐ kâng mú o/jwóbê Jisos ké bukyû o/chi o-kye enyam-byiko enen nyí edakpú dyikpen ké bubwô-Busun emen ḿbú mbu běn ké atyém.

¹² Be byi-man byi-kyú kâng wǎ eringe nyí Busun-Osówo mbu bu-sét ng bě. Bii*man byi-kyú wǎ eringe nyí atyém eten nyi a-ryuu ng a/fu, be byikyú*.

¹³ Ké ebóng â ben bamu ba-kyú u wǎ eringe nyí atyém enen nyi a-ryuu ng, ba/chi ba-kpú. Nké â bamu ba-kyú u ké bubwô ḿbú Busun-Osówo, ba-ju édúú enen nyí byibî echi, ba/chi ba-kpen.

¹⁴ Banet ḿbé mbe ba-mîng ng Busun-Osówo bu-tông kámbé kiǐfáng ba-chi i bwǎn-Osówo.

¹⁵ Ké ebóng, Busun-Osówo ḿbú Osówo oo/kye běn, boo*chi běn ba-firi ósóng* bu-chi i běn ba-kûshî*. Nké Busun-Osówo mbu bu-chi i běn ba-firi bwǎn ḿbé Osówo, ne ké busa ḿbú Busun-Osówo be byimu byi-kó ng Osówo byi/fu, Kyítá.

¹⁶ Busun-Osówo mbu bu-kúng ng byiko emen bu-cibi ng ne basun ḿbé eten, eringe nyí byidasét byi/fu, be byi-chi i bwǎn ḿbé Osówo.

¹⁷ Ké bubwô ḿbú byimu bwǎn emen, be byi/chi byi-koo banjware emen ḿbé o/tî banet emen. Ne byi/chi byi-cibi to ne Karâs, byi-koo ńkyí Osówo oo/tî ǎ. Ké ebóng, â be byi/ri afaníkong nyí Karâs o/ri, byi/chi byi-nung to ké busan emen ḿbú ragerage.

Be byi/chi byi-koo Busan ḿbú Ragerage

¹⁸ Me mu n-nyît ng ké ntûntû n/fu, afaníkong nyí byimu byi-ri ng ké kyikim-nkéré ńkyí kántîk a*da/fyi nang kaǎnyín ne busan ḿbú ragerage ḿbú Osówo o/chi o-tông bě*.

¹⁹ Ejíí emúmú nyí Osówo o/chi nyi e-ryuu ng kanong kanong, e-bám m e/fu, Osówo otông kányí bwǎn emen wááng.

²⁰ Ké ebóng, Osówo o/pan ejíí emúmú mpan o-bên kányí, o/fu, e*da/byí chwǒm* *chí ké bubwô ḿbú ejíí eyén* nké, ké ebóng, Osówo o/ryuu o/fu, kyikyú éné. Nang ké kyi/mû éné, Osówo o/tî okabe mún

²¹ o/fu, nyǐ o/chi o-nyii ejíí emúmú, eringe nyí ké nkuli kyikû, kángkáng byěm bii*ba/chi byi-fwoo* o-chi kámbyí byi-fem ké bukwóp ḿbú boo*nwa eri* byi-firi ké byiko ḿbyí bwǎn-Osówo.

²² Ké ebóng, be byimu byi-nyît ng byi/fu, tete kyi-ribi ké nkéré mú kántîk, ejíí emúmú nyi e-byâ ké busông, wǎ busông ḿbú onyinyi odari ké nkéré o-kú o-fwon n.

²³ Nké *chí byěm ḿbyí Osówo o/chi nké nke*. Be to mú byimu ne Busun-Osówo wǎ mbwôp kashú-eyáré nyí Osówo o/kye bě, byimu byi-byâ to dyityém dyítyem eringe nyí byimu byi-bám m Osówo byi/fu, ochi bě byi-firi bwǎn emen, o-chi bě kyirim eten kángkáng byi-fem.

²⁴ Ké ebóng, kyi/mû ké bubwô ḿbú achi etî nké Osówo o/nyii bě. Nké â be bii/ri ńkyí be byi/mû byimu byi-tî ng achi, ányi kyi/byí, be byi*fí to byi-tî ng achi ké nkyí nang kaǎnyín*. Ké ebóng, yeě mu o-tî ng achi ké chwǒm ńkyí mu o-ri ng.

²⁵ Nké â be byimu byi-tî ng achi ké chwǒm ńkyí byi*fí byi-ri ng* byi-cíp ng dyityém byi-kûbám kánkyí.

²⁶ Ké bukwóp ámbu bubónge, nang ké byimu kyeekyee, Busun-Osówo mbu bu-bâ ng bě echwáp. Ké ebóng, be byi*fí byi-nyît ng eringe nyí byi/mû byi/chi byi-kûfé nshwam*. Busun-Osówo buyén mbu bu-tîm m Osówo arông ké bubwô eten ne dyibyê ńdyí ejá nyí ee*nwa esét*.

²⁷ Ne Osówo mú mu o-ri ng atyém nyí banet mu o-nyît ng eringe nyí okabe mú Busun-Osówo mu. Ké ebóng, Busun-Osówo mbu ne Osówo bu-tîm m ǎ arông ké bubwô ḿbú banet-Osówo, ké bukwóp ḿbú Osówo mu o-ryuu ng.

²⁸ Be byimu byi-nyît ng byi/fu, Osówo mu o-chi i kángkáng byěm byi-nwa byi-kye banet ḿbé nyǐ mu o-jê ng kámbé. Banet ḿbé nyǐ oo/kó, eringe nyí odachi ńkyí nyǐ mu o-ryuu ng.

²⁹ Banet ḿbé Osówo oo/wá o-cá kámbé, oo/cá kámbé o-tî o/fu, bafiri wǎ Wǎn emen, eringe nyí Wǎn emen o/chi o-kyú mbwôp kashú ké burwám-bwǎn-bané chwóó.

³⁰ Ne ké bubwô ámbu kâng, Osówo o/kó banet ḿbé o/mû oo/cá kámbé o-tî. Ne banet ḿbé o/kó kámbé, o/két mpan o-nwa kámbé. Ne banet ḿbé nyǐ o/két mpan o-nwa kámbé, o/kye to kámbé kyicê-busan emen ḿbú ragerage.

Jisos Karâs mu o-tông ng eringe nyí Be byimu byi-jê ng Osówo

³¹ Ne kángkáng byěm ḿbyín ké dyityém, be byi-sét ng ebóng. Â Osówo mu mú eten, yeě odaman enwa ne be.

³² Nang Wǎn emen o*da/man eyip o-tî ké esim* nké o/yip ǎ o-chi kyifen ké dyishí eten ashí amúmú. Nyǐ o/yip Wǎn emen o-kye bě. Nyǐ oo*ba/chi o-yip kángkáng byěm o-kye bě dyikáá dí*.

³³ Yeě odaman ebât banet ḿbé Osówo o/cá kámbé kyiraa. Osówo oyén mu o-két ng mpan o/fu, ba*da/chi kyibî*.

³⁴ Onet mu kô kâng mú odaman ekét mpan o-bên kámbé dí. Jisos Karâs nké o/kpú. Nyǐ to nké Osówo o/jwóbê ǎ o-bwa ké dyikpen, ne mu ké kyicê-bubwô-etyebéng ḿbú Osówo. Nyǐ o/kyú ne Osówo mu o-tîm m ǎ arông ké bubwô eten.

³⁵ Yeě kâng mú oda bě eman epap ké kyijé ńkyí Karâs. Chwǒm kyi*fí ńkyí kyida bě eman epap ké kyijé ńkyí Karâs* nang byi-bwa byi-nung ké afaníkong* nang byěm byi-sóng bě* nang banet ba-kye bě busông* nang byimu esong* nang byimu kyikpu* nang byimu ké bukwóp ḿbú bukyû* nang bukyû bu-bwa bu-ju bě*.

³⁶ Wǎ eringe nyí ejá-Osówo nyí ba/sáng kyísí e/sét e/fu, ké dyishí eyên, be byi/firi ké bukwóp ḿbú bukyû ké kyirim-dyicí dyimúmú. Ba-kú ba-fâ bě bushî wǎ etám-ebû nyí ba-kú ba-wâa ng kányí edaju.

³⁷ Aa*wááng*. Ké kángkáng byěm ḿbyín, be bii/kpógê ké bubwô ḿbú nyǐ mú byimu byi-jê ng ǎ.

³⁸ Ké ebóng, me mu n-nyît ng ké ntûntû n/fu, chwǒm kyi*fí ńkyí kyida bě eman epap* ké kyijé emen*. Nang bukyû nang dyikpen nang byibî-barím nang bací nang bakye nang nkéré mú kántîk nang mú mu o-bâ ké kashú

³⁹ nang oshê mú kyíbóng nang oshê-bakúsí, chwǒm kyi*fí nang kyibónge* ké kángkáng byěm ḿbyí Osówo o/chi* ńkyí kyi/chi kyi-man bě epap ké kyijé ńkyí Osówo* ńkyí nkyi ńkyí eten ké bubwô ḿbú Jisos Karâs, Otu Kyítá eten*.