Rúman 7 - Bokyi Bible

Kyije kyi-kim ne Dyibé ebé

¹ Ké ntûntû, ǎ bwǎn-bané ejí, ben bamu ba-nyît ng dyishí-chwǒm ńkyí me mu m-bâ ebasét, ké ebóng, ben ashí amúmú bamu ba-nyît ng chwǒm kyi-kim ne byije. Byije mbyi ne busa ne onet ké kyikim-nkéré ńkyí mu okpó.

² Nkyi něen. Kyije kyi/fu, onyinyi mú oo/bé otyép o-man o-kyú ne otyép emen ké kyikim-nkéré ńkyí otyép emen o/tôong okpó. Nké â otyép emen o/kpú, o-fem ké kyije ńkyí kyi/níbî ǎ kyi-bât ne otyép emen.

³ Â onyi-otyép ámu kâng o/bé onyinchéng okíri ké nkéré otyép emen o/tôong okpó, nyǐ o-firi nchi byinam. Nké â otyép emen o/kpú, o-fem ké kyije. Baa*fu to o/chi kyinam* â o/bé onyinchéng okíri*.

⁴ Éné nké nkyi to ne ben, ǎ bwǎn-bané ejí. Â ké bukwóp ḿbú byije, ben to baa/kpú, ké ebóng, ben bamu kyicê-enyam-byiko nyí Karâs, ne kántîk, baa/já ǎ nyǐ mú Osówo o/jwóbê ǎ ké bukyû, eringe nyí be byi/chi byi-kyú banet ḿbé ba/kwárê ké bǎmkpóngé ḿbé Osówo echi.

⁵ Ké ebóng, ké nkéré mú be byi/kyú wǎ eringe nyí atyém eten nyi a-ryuu ng, ekabe nyí nyi e-cen n bě ne byibî echi e/mû shwanshwan, ké ebóng, byije byi/mû bě ké byiko, ne byi/mû byi-chi i bǎmkpóngé ḿbé bukyû kanong kanong.

⁶ Kántîk kâng, be bii/fem ké byije, ké ebóng, be byi/kpú ké bukwóp ḿbú byije, ké nkéré mú byi/mû byi/níbî bě byi-fé ké mgbokobá. Be byi*fí to byi-fâ Osówo ké bukwóp ḿbú kpákpá* ḿbú byije ḿbyí ba/sáng kyísí* nké byi-kú byi-fâ ǎ ké bukwóp ḿbú bufyîfî ḿbú Busun-Osówo.

Byije byi-chi i Banet ba-chi Byibî

⁷ Be byi-sét ng ebóng kâng. Byi-sét ng byi/fu, byije byiyén mbyi ne byibî ké byiko? Kyi*fí éné*. Nké byije nké byi/chi mě n-nyît kyibî. Ké ebóng, me m/mû mm*ba/chi n-nyît ńkyí badafu *datî dyityém eyên ké chwǒm-onet* â kyije kyi/mû kyi*da/sét kyi/fu, *datî dyityém eyên ké chwǒm-onet*.

⁸ Kyibî kyi/cen ké byije, kyi-ri bukwóp ḿbú kyi/tírîng mě n-nung ké akwóp nyí byěm-banet eryuu. Ké ebóng, â kyije kyi/mû kyi*fí* kyibî, ányi chwǒm ńkyí kii/kpú.

⁹ Â a/tî byije kú, me oyén ké nkéré obónge m/mû okpó. Nké ké nkéré byije byi/bê, kyibî kyi/jwóbê kyi-bwa ké dyikpen,

¹⁰ ne me to m-kpú. Ne byije ḿbyí byi/mû byi/chi byi-bâ mě ne dyikpen byi/bê ne bukyû.

¹¹ Kyibî kyi/cen ké byije, kyi-ri kiǐfáng ńkyí kyi/nîm mě. Ké bubwô ḿbú byije, kyibî kyi/ju mě.

¹² Ké bubwô ámbu kâng, Byije-Músis byi/fím ne Osówo, ne kyije nang kyirá nang kyirá to kyi/fím ne Osówo, kyi-sét ng ńkyí onet odachi ne kyi-chwáp ng to banet.

¹³ Ńkyín kyi/byí kyi/fu, chwǒm ńkyí nkyi kyi-chwáp ng banet nké kyi/cen mě ne bukyû? Kyi*fí éné*. Kyibî nké kyi/cen mě ne mbú. Kyibî kyi/kúng chwǒm ńkyí nkyi kyi-chwáp ng banet, kyi-cen mě ne bukyû, eringe nyí kyi/chi kyi-tông byiko emen wááng wǎ kyibî. Ké bubwô ḿbú byije kâng, kyibî kii/bên kyi-shwôm.

Afaníkong nyí nyi Bě ké Byiko

¹⁴ Be byimu byi-nyît ng byi/fu, byije byi/fím ne Osówo. Nké me n-chi i onet mú mu o-róng ng ké byibî, ne n-chi i to ósóng mú byibî.

¹⁵ Me n*fí n-nyît ng kyikû kyi-kim ne ńkyí me mu n-chi i*. Ké ebóng, me n*fí n-chi i ńkyí me mu n-ryuu ng n/fu, n-chi i*. Nké mu n-chi i ńkyí kyida mě esa kafâ.

¹⁶ Â n/chi ńkyí me n*fí n-ryuu ng n/fu, n-chi i* ńkyín kyi/tông kyi/fu, me m/bángê n/fu, byije mbyi byi-sét ng ntûntû.

¹⁷ *Chí me oyén chíchí kâng nké mu n-chi i chwǒm ńkyín* nké byibî ḿbyí mbyi mě ké kafâ nké mbyi byi-chi i.

¹⁸ Me mu n-nyît ng n/fu, kanong ka*fí ké dyityém ejí ńdyín*. Ké ebóng, nang ké okabe mu mě mú ndachi kanong, n*fí m-man n echi kánké*.

¹⁹ Me n*fí n-chi i kanong ńké mu n-ryuu ng n/fu, n-chi i* nké mu n-chi i kyibî ńkyí n*fí n-ryuu ng n/fu, n-chi i*.

²⁰ Â me mu n-chi i ńkyí me n*fí n-ryuu ng n/fu, n-chi i* ányi kyi/byí, *chí me oyén nké n/tôong n-chi i kánkyí* nké byibî ḿbyí mbyi mě ké byiko nké mbyi byi-chi i.

²¹ Ké bubwô ámbu kâng, me mu n-nyît ng n/fu, chwǒm ńkyín nkyi mě ké byiko. Â me mu n-ryuu ng n/fu, n-chi i kanong, bukwóp bu*fí mě ḿbú ndachi kánké* kyi-cibi ne kyibî echi*.

²² Dyityém ejí ndyi ké bunyîn-dyityém ne byije ḿbyí byi/fím ne Osówo.

²³ Nké me mu n-ri ng kyije kyikíri ńkyí kii/koo mě busa. Kyije ńkyí nkyi kyi-nwa ng ne kyije ńkyí dyityém ejí ndyi dyi-ryuu ng. Nkyi kyi-chi i mě n-firi onet-mgbokobá mú kyije ńkyí byibî, ńkyí kii/koo mě busa.

²⁴ Me n/firi onet-bafip. Yeě oda mě enyii ké abwô nyí dyityém ejí ńdyín ńdyí kyibî, ńdyí ndyi dyi-kúng ng mě dyi-da-kye bukyû.

²⁵ Asǎma akyú ne Osówo ké bubwô-Jisos Karâs, Otu Kyítá eten. Ńkyín kâng nké nkyi dyikpen ejí ńdyí mu n-kyú u. Ké byiko ḿbyí ejí me oyén, me m-man n efé Osówo ne dyityém ejí, nké enyam-byiko ejí nyi e-fâ kyije ńkyí nkyi kyi-chi i mě n-nung ké byibî echi.