Rúman 5 - Bokyi Bible

Osówo oo/két Mpan o-nwa Bě

¹ Kántîk kâng, mú Osówo oo/két mpan o-nwa bě ké bubwô ḿbú be byi/fé dyityém ne nyǐ, be byi/firi ké bunyîn-dyityém ne Osówo ké bubwô ḿbú Jisos Karâs, Otu Kyítá eten.

² Ké bubwô ḿbú be byi/fé dyityém ne Karâs, Karâs oo/chi bě byi-kú byi-nung ng ké kanong ńké Osówo ńké byimu ne nké kántîk. Be byi-kú byi-jêe ng kâng ké achi nyí byimu byi-tî ng byi/fu, byi/chi byi-nung to ké busan-Osówo ḿbú ragerage.

³ Nké be byi-kú byi-jêe ng to ké afaníkong eten nyí byimu byi-ri ng, ké ebóng, be byimu byi-nyît ng byi/fu, afaníkong a-cen n ne ofit eryí.

⁴ Ne ofit eryí o-chi i bě byi-firi banet ḿbé ba/kwárê ké bushú ḿbú Osówo, ne okwáre ámu o-cen n ne achi etî.

⁵ Achi etî ńnyín aa*ba/chi a-tánê bě kyísí dyikáá* ké ebóng, Osówo oo/chi kyijé emen kyi-nung ké atyém eten ké bubwô ḿbú Busun-Osówo ḿbú mbu eyáré eten nyí Osówo mu o-kyâ bě.

⁶ Ké ebóng, ké nkéré be byi/mû byi/tôong byi*fí ne busa ḿbú byidachwáp byiko eten* Karâs o/kpú ké dyishí eten mú byimu byibî-banet. O/kpú ké ochíchí-nkéré mú Osówo o/tî.

⁷ Kyi-sóng ng! ńkyí onet odakpú ké dyishí ńdyí onet mú mu o-tî ng byije. Kyi-man n ekyú ba/fu, onet o-man n ebángê o/fu, nyǐ o-kpú u ké dyishí ńdyí onet mú mu o-chi i kanong ne barî-banet.

⁸ Nké Osówo oo/tông bě kiǐtí-kyijé ńkyí be byimu byi-jê ng ǎ. Kyi/mû ké nkéré mú be byi/mû byi/tôong banchi byibî nké Karâs o/kpú ké dyishí eten.

⁹ Ké bukyû emen, Osówo oo/két mpan o-nwa bě. Â nkyi éné ké ntûntû kâng, Karâs o/chi o-nyii bě ké busa-dyityém ḿbú Osówo.

¹⁰ Be byi/mû banet-bushwôn ḿbé Osówo, nké Osówo o/chi bě byi-firi bacín emen ké bubwô-bukyû ḿbú Wǎn emen. Kántîk mú byi/firi bacín emen, nyǐ ké ntûntû o-nyii ng bě ké bubwô-dyikpen ńdyí Karâs.

¹¹ Nké kyi*da/man éné*. Osówo oo/chi bě byimu byi-jêe ng ké bubwô ḿbú Jisos Karâs, Otu Kyítá eten mú oo/chi bě kántîk byi-firi bacín ḿbé Osówo.

Pôl o/kan Ádam ne Karâs

¹² Kyibî kyi/bê ké ejíí ké bubwô ḿbú onet obónge, ne ké bubwô ḿbú o/chi kyibî, nyǐ o/kpú. Ké bubwô ámbu, bukyû boo/ta kángkáng banet ḿbé ké ejíí, ké ebóng, kángkáng banet baa/róng ké byibî.

¹³ Byibî byi/mû kpá ké ejíí ne Osówo o-kûkye Músis byije. Nké ké kyikit ńkyí byije byi*fí* Osówo o*da/tóbê kyi-kim ne byibî*.

¹⁴ Nké kyi-fím ké nkéré mú Ádam tete kyi-ribi ké nkéré mú Músis, kángkáng banet ba/mû ké busa ḿbú bukyû, nang banet ḿbé ba/mû ba*da/chi kyibî wǎ ńkyí Ádam o/chi* ńkyí o/né ejá nyí Osówo o/sét ǎ*. Ádam ké bukwóp bukíri o/mû wǎ ekap nyí onet mú o/mû o/chi o-bâ.

¹⁵ Nké mbé ashí afee ba*fí eringe ebónge* ké ebóng, eyáré nyí Osówo mu o-kyâ dyikáá e*fí wǎ kyibî ńkyí Ádam*. Nkyi ntûntû ńkyí ba/fu, banet chwóó ba/kpú ké bubwô ḿbú kyibî ńkyí onet ámu obónge. Nké kanong ńké Osówo nke ne busa ka-shwôm, ne nkyi éné to ne eyáré nyí o/kye banet chwóó ké bubwô-kanong ńké onet obónge, ányi Jisos Karâs.

¹⁶ Eyáré nyí Osówo ne kyibî ńkyí Ádam byi/yángê. Ké nkéré Ádam o/chi kyibî ánkyi kyibónge, Osówo o/pan ǎ mpan o/fu, o/chi kyibî. Nké ké nkéré banet chwóó ba/chi byibî chwóó, Osówo o-tông kámbé kanong emen o-raa o/fu, ben ba*da/chi kyibî*. Osówo mu o-kyâ banet ńkyí kyi/mû kyi*da/kwárê ne mbé* ńkyí o/fu, ben ba*da/chi kyibî*.

¹⁷ Nkyi ntûntû ba/fu, ké bubwô-kyibî ńkyí onet obónge, kángkáng banet ba/kpet ekyú ké busa ḿbú bukyû ké bubwô ḿbú onet ámu obónge. Nké ńkyí onet obónge mú odabángê Jisos Karâs o/chi kyi/rêe kyi-shwôm. Kángkáng banet ḿbé mbe ba-koo ng kanong ńké Osówo ńké ka/jê, ne eyáré nyí dyikáá nyí Osówo o/két mpan o-nwa kámbé, ba/chi ba-kyú ne busa ké dyikpen, ké bubwô-Karâs.

¹⁸ Ké bubwô ámbu kâng, wǎ eringe nyí mpan o/bên kángkáng banet, ké ebóng, onet obónge o/chi kyibî, ké bukwóp ámbu bubónge, Osówo oo/két mpan o-nwa kángkáng banet, o-chi kámbé ba-kpen, ké ebóng, onet obónge o/chi ńkyí kyi/kwárê ké bushú ḿbú emen.

¹⁹ Ne wǎ eringe nyí banet ba/pín ba-firi banchi byibî, ké ebóng, onet obónge o/né ńkyí Osówo o/sét ǎ, ké bukwóp ámbu bubónge, Osówo mu o-két ng mpan o-nwa banet, ké ebóng, onet obónge o/chi ńkyí Osówo o/sét ǎ.

²⁰ Byije-Músis byi/bê oběng, eringe nyí byibî byidakûjê byi-câ kashú, nké â byibî byi/jê chwóó, kanong ńké Osówo ka-jê ng ka-shwôm kampén kampén.

²¹ Ké bubwô ámbu kâng, kyibî kyi/mû ne busa, ké ebóng, banet ba/mû ba-man ba-kpú. Ké eringe ányi ebónge to, bukwóp ḿbú Osówo mu o-tông ng kanong emen mbu ne busa, ké ebóng, Osówo mu o-két ng mpan o-nwa banet, o-chi i bě byi-nung ké dyikpen ńdyí ne banyá ké bubwô-Jisos Karâs, Otu Kyítá eten.