Rúman 4 - Bokyi Bible

Kiǐshwô ńkyí Ébarahâm nkyi kyi-tông ng ńkyí Dyityém efé ne Osówo ndyi dyi-chi i

¹ Be byi-sét ng ebóng kâng kyi-kim ne bonchí eten mú kpákpá, mú o/fwon bě. Nyǐ o/ri ebóng.

² Â Osówo o/mû o/két mpan o-nwa ǎ ké byěm ḿbyí o/chi, nyǐ o/mû o/chi o-kyú ne chwǒm ńkyí odatông byiko. Nké nyǐ oo*man etông byiko ké bushú ḿbú Osówo*.

³ Ejá-Osówo nyí ba/sáng kyísí e/sét e/fu, Ébarahâm o/bángê ńkyí Osówo o/sét ǎ, ne ké bubwô ḿbú dyityém emen ńdyí o/fé ne Osówo nké Osówo o/koo ǎ wǎ onet mú onong.

⁴ Onet mú mu o-chi i bǎmkpóngé ba-kyâ ǎ akpuga. Oo*kúng akpuga ányi wǎ eyáré*. Nké o-kúng ng kányí wǎ chwǒm ńkyí nyǐ o/chi bǎmkpóngé ne ba-kye ǎ.

⁵ Nké onet mú o/fé dyityém ne Osówo, o-mîng ńdyí nyǐ o/fé ké chwǒm ńkyí odachi ne kyi-nyîn Osówo, mú o/bángê ké Osówo mú mu o-sét ng onet mú oo/chi kyibî o/fu, o*da/chi kyibî* dyityém ńdyí onet ámu o/fé ne Osówo nké Osówo mu o-kabe ng kyi-kim ne ndyí, ne o-két mpan o-nwa onet ámu.

⁶ Dyishí-chwǒm ńdyí Otu Dívit o/raa ké nkéré mú o/raa kyi-kim ne bunyîn-dyityém ḿbú onet mú Osówo mu o-koo ng ǎ wǎ onet mú onong, nang o*da/chi bǎmkpóngé ḿbé o/fu, banyîn Osówo* ndyi něen.

⁷ Bunyîn-dyityém mbu ne banet ḿbé Osówo oo/pwoo kámbé ké byibî-byěm ebe ḿbyí ba/chi. Ḿbé Osówo oo/cít byibî ebe.

⁸ Bunyîn-dyityém mbu ne onet mú Otu Kyítá oo*ba/chi o-pan byibî emen ḿbyí o/chi*.

⁹ Bunyîn-dyityém ḿbún ḿbú Otu Dívit o/raa kyi-kim ne mbú něen bu/já banet ḿbé mbe ba-cên n kámbé dyicên nké nke? Aa*wááng*. Bu/já to banet ḿbé ba*fí ba-cên n*. Ké ebóng, be bii/kó ké ejá-Osówo nyí ba/sáng kyísí ba/fu, Ébarahâm o/bángê ké ńkyí Osówo o/sét ǎ, ne ké bubwô ḿbú dyityém emen ńdyí o/fé ne Osówo nké Osówo o/koo ǎ wǎ onet mú onong.

¹⁰ Ńkyín kyi/chi ké nkéré orá. Kyi/chi ne ba-kûcên Ébarahâm aa, aa kyi/chi ké nkéré mú baa/cên ǎ. Kyi/chi ne ba-kû ǎ ecên, *chí ké nkéré mú baa/cên ǎ*.

¹¹ Ba/cên Ébarahâm ké nkéré mú ńkyín kii/chi. Ne dyicên emen dyi/mû ekap nyí edatông e/fu, ké bubwô ḿbú dyityém ńdyí Ébarahâm o/fé ne Osówo, Osówo o/bwóp kpá kashú o-koo ǎ wǎ onet mú onong, ne ba-kû ǎ ecên. Ne ké bubwô ámbu kâng, Ébarahâm mu wǎ bonchí mú kángkáng banet ḿbé ba/bángê ké Osówo, ne Osówo oo/koo kámbé wǎ banet ḿbé banong, nang ba*da/cên kámbé*.

¹² Nyǐ mu to bonchí mú banet ḿbé ba/cên. *Chí ké bubwô ḿbú ba/cên kámbé* nké ké bubwô ḿbú mbe ba-kyú u dyizong-dyikpen dyibónge ńdyí dyityém efé ne Osówo, ńdyí Ébarahâm mú bonchí eten o/kyú, ne ba-kû ǎ ecên.

Ké ebóng, Ébarahâm o/fé Dyityém ne Osówo, Nyǐ o/koo ńkyí Osówo o/ryí Ocím

¹³ Osówo o/ryí Ébarahâm ne kyikû-banet emen ocím o/fu, ejíí e/chi e-já kámbé. *Chí ké bubwô ḿbú Ébarahâm o/chi ńkyí byije byi/sét* nké Osówo o/ryí ǎ ocím* nké ké bubwô ḿbú o/bángê ké Osówo ne dyityém emen, ne Osówo o/koo ǎ wǎ onet mú onong.

¹⁴ Ké ebóng, â ńkyí Osówo mu o-ryí i ocím, mu o-yip ng o-kyâ banet ḿbé mbe ba-tî ng Byije-Músis, éné dyityém ńdyí onet mu o-fâ ne Osówo dyi*da/byí chwǒm*. Nang ocím to mú Osówo mu o-ryí i o*da/byí chwǒm*.

¹⁵ Byije mbyi byi-bâ ne busa-dyityém ḿbú Osówo. Nké kyikit ńkyí byije byi*fí* orông-byije o*fí*.

¹⁶ Osówo o/ryí ocím emen, ké ebóng, Ébarahâm o/mû o/fé dyityém ne nyǐ, eringe nyí ńkyí Osówo o/ryí ocím kyi/chi kyi-kyú kanong kanong ńkyí Osówo oo/kye kyikû-banet ńkyí Ébarahâm dyikáá. *Chí banet ḿbé mbe ba-chi i ńkyí byije byi/sét nké nke* nké ḿbé ba/bángê ké Osówo to, wǎ eringe nyí Ébarahâm o/bángê ne dyityém emen. Ké ebóng, Ébarahâm mu wǎ bonchí eten ashí amúmú.

¹⁷ Wǎ eringe nyí ejá-Osówo nyí ba/sáng kyísí e/sét e/fu, me nn/chi ǒ a-firi bonchí mú byikim-eshê chwóó. Ké bubwô ámbu, ocím eryí ámu o/nwa ké bushú ḿbú Osówo mú Ébarahâm o/bángê ne nyǐ. Osówo mú mu o-jwóbê ng banet ḿbé baa/kpú ba-bwa ké dyikpen, ne mú ejá emen edaman echi chwǒm ńkyí kyi/mû kyi*fí* kyi-byí.

¹⁸ Ébarahâm o/bángê ne dyityém emen ne o-tî achi ké nkéré mú achi etî ké chwǒm a/mû a*fí*. Ne ké bubwô ámbu kâng, o/firi bonchí mú byikim-eshê chwóó. Wǎ eringe nyí ejá-Osówo nyí ba/sáng kyísí e/sét e/fu, kyikû-banet eyên kyi/chi kyi-jê kanong kanong.

¹⁹ Ébarahâm o/mû o-kú o-câ chwǒm wǎ bajam-aje batánge. Nké dyityém emen ńdyí o/fé ne Osówo dyi*da/yángê* ké nkéré mú o/kabe kyi-kim ne enyam-byiko emen* nyí e/mû ee/kpú kpúkpú*. Nang ké nkéré mú o/kabe o/fu, Sirá o*da/man efwon wǎn*

²⁰ o*da/mîng dyityém emen ńdyí o/fé ne Osówo* ne o*da/kán ké dyishí ké ocím mú Osówo o/ryí*. Dyityém emen ńdyí o/fé ne Osówo dyi/kye ǎ busa, ne o/kye Osówo akpee.

²¹ Nyǐ o/mû o-nyît ng kanong kanong o/fu, Osówo o-man o-chi ńkyí o/ryí ocím.

²² Nkyí nké kyi/chi Osówo o-koo Ébarahâm wǎ onet mú onong ké bubwô ḿbú Ébarahâm o/fé dyityém ne nyǐ.

²³ Ejá nyí ba/fu něen ba/fu, Osówo o/koo ǎ wǎ onet mú onong, ba*da/sáng kányí kyísí ké bubwô ḿbú Ébarahâm nké nke*.

²⁴ Ba/sáng kányí to ba-tî bě be mú Osówo o/chi o-koo bě wǎ banet ḿbé banong. Ḿbé ba/bángê ké nyǐ mú o/jwóbê Jisos, Otu Kyítá eten ké bukyû.

²⁵ Osówo o/yip ǎ o-tî o/fu, okpú ké dyishí ńdyí byibî eten, ne Osówo o/jwóbê ǎ o-bwa ké dyikpen, eringe nyí odakét mpan o-nwa bě.