Rúman 3 - Bokyi Bible

¹ Ebóng chwǒm kâng ńkyí banet-Jûs ba/shwôm banet ḿbé ba*fí banet-Jûs*. Mpún mu kô mú onet odaryí? â ba/cên ǎ?

² Kyi-chwáp ng ké ntûntû, ké akwóp amúmú. Ké mbwôp kashú-bukwóp, Osówo o/kye banet-Jûs kyitwóm emen o/fu, batî.

³ Nkyi ntûntû ba/fu, kyicê-banet-Jûs ba/mû ba*da/tî kyitwóm-Osówo kanong*. Ńkyín kyi*da/byí kyi/fu, Osówo to oo*man etî ocím emen mú o/ryí*.

⁴ Ké ntûntû, kyi*fí éné*. Â nang kángkáng banet mbe ba-sét ng kyisédéng, Osówo o-man o-sét ntûntû, wǎ eringe nyí ejá-Osówo nyí ba/sáng kyísí e/sét e/fu, nang nkéré orá nké wo a/raa, ǎ Osówo, nang yeě nang yeě o-man o-nyît ké ntûntû o/fu, wo amu a-sét ng ntûntû. Wo a-man a-kpógê banet ḿbé mbe ba-sét ng byiraa ba-bât ng ǒ ké mpan.

⁵ Nké banet bakíri mbe ba-kán n ké dyishí ba/fu, ké nkéré mú be bii/chi chwǒm ńkyí kii*nwa* banet ba-man n eri ba/fu, ńkyí Osówo mu o-chi i nkyi kanong. Be byi-sét ng ebóng. Be byi-sét ng byi/fu, Osówo mu o-chi i ńkyí kii*nwa*? ké nkéré o-kú o-kyâ bě busông?

⁶ Kyi*fí éné*. Me mu n-raa ng nyín wǎ eringe nyí banet mbe ba-raa ng. Â Osówo mu o-ryí i acît, o-cen n nǎ ne o-pan ejíí emúmú mpan.

⁷ Nké ebóng kyi/bên ké kafâ, â kyisédéng ejí ńkyí mu n-sét ng nkyi kyi-chi i banet ba-kûri busan-Osówo ḿbú ragerage, ké ochi mú nkyi kyi-chi i banet ba-kûri ntûntû mú Osówo wááng ba-shwôm. Kyi-cen n nǎ kâng ne Osówo o-chî mě ekye busông wǎ nchi byibî.

⁸ Ebóng be bii*raa kâng byi/fu, mîng n̂g byi-chi kyibî, eringe nyí kyinong kyidabê*. Banet bakíri ké ntûntû baa/kye mě edángé ba/fu, me n/kérê nǎ ne n-raa dyizong-kyiraa ńdyí n/raa něen. Osówo o/chi o-két mpan o-bên kámbé wǎ eringe kyi/kwárê ne mbé.

Onet o*fí mú mu Kanong ké Bushú ḿbú Osówo*

⁹ Kántîk kâng, be banet-Jûs kyi/nwa bě kyi-shwôm banet ḿbé ba*fí banet-Jûs*? Kyi*fí éné*. Me nn/tông n/fu, banet-Jûs ne ḿbé ba*fí banet-Jûs* mbé ashí kángkáng mbe ké busa ḿbú byibî.

¹⁰ Wǎ eringe nyí ejá-Osówo nyí ba/sáng kyísí e/sét e/fu, onet o*fí mú mu kanong ké bushú ḿbú Osówo*.

¹¹ Onet o*fí mú mu o-nyît ng kyikû* kyi-kim ne ńkyí nkyi ntûntû* nang mú mu o-kyé ng o/fu, nyǐ o-kyú u ne Osówo*.

¹² Kángkáng banet baa/pín kashú ebe, ba-bírî Osówo esim. Ba*fí to wǎ chwǒm*. Onet o*fí nang obónge* mú mu o-chi i kanong*. Nang kaanet ka*fí*.

¹³ Ecím ebe nyi wǎ dyikun ńdyí ndyi ocím fúú. Bubyíbabang ebe mbu bu-sét ng byibî-byisédéng. Ne byibî-byiraa ḿbyí byi/bên wǎ dyífa-efyi mbyi byi-byí i kámbé ké byibî-ocím.

¹⁴ Byibî-byishû bii/sú kámbé ké ocím.

¹⁵ Banet enémê ne oju byi-wá ng kámbé byi-shwôm.

¹⁶ Nang nyá nké ba/ce, ba-mîng ng ekap nyí byěm ebên ne bafip ké byikit ámbyi.

¹⁷ Mbé ba*da/nyît ne kiǐfáng ńkyí bunyîn-dyityém*

¹⁸ nang ńkyí Osówo eshî*.

¹⁹ Nké be byimu byi-nyît ng byi/fu, nang ebóng chwǒm ńkyí ba/sáng ké Byije-Músis kyi-ta ng banet ḿbé ba/sáng byije ámbyi ba-tî kámbé. Ba/sáng byije ba-tî, eringe nyí banet baa*ba/chi ba-fu ba/fu, mbé ba*da/nyît* ne kyi-tông to kyi/fu, Osówo o/chi o-pan kángkáng banet ḿbé ké ejíí mpan.

²⁰ Ké ebóng, onet o*fí mú Osówo odakét mpan o-nwa ǎ* ké bubwô ḿbú mu o-chi i ńkyí Byije-Músis byi/sét*. Bǎmkpóngé ḿbé Byije-Músis mbyi byi-chi i mbe něen, ba/fu, onet onyît o/fu, nyǐ oo/chi kyibî.

Eringe nyí Osówo mu o-két ng Mpan o-nwa Banet

²¹ Nké kántîk, Osówo oo/tông bě bukwóp ḿbú nyǐ mu o-két ng mpan o-nwa banet. Bukwóp ámbu bu*da/kim ne byije*. Nwet-Byije-Músis ne bamkpábé ḿbé badasét byiraa-Osówo ba/sét kyi-kim ne bukwóp ḿbún.

²² Osówo mu o-két ng mpan o-nwa banet ké bubwô ḿbú dyityém efé ne Jisos Karâs. Osówo mu o-chi i ńkyín ne nang yeě nang yeě mú o/bángê ké Karâs ne dyityém emen, ké ebóng, kángkáng banet mbe eringe ebónge ké bushú emen.

²³ Kángkáng banet baa/róng ké byibî, ne ba/firi tíbítíbí ké bushú ḿbú Osówo mú mu o-nyii ng banet.

²⁴ Nké ké bubwô ḿbú eyáré nyí kanong emen ńké Osówo o/kye banet dyikáá, Osówo mu o-két ng mpan o-nwa banet ké bubwô ḿbú Jisos Karâs mú mu o-chi i banet ba-fem ké byibî.

²⁵ Osówo o/yip Jisos Karâs o-chi kyifen, eringe nyí ké bubwô ḿbú bukyû emen, nyǐ o/chi o-firi bukwóp ḿbú Osówo o/chi o-kûpwoo banet ké byibî, ké bubwô ḿbú dyityém efé ne nyǐ. Osówo o/chi ńkyín, eringe nyǐ odatông kanong emen. Ké nkéré mú o/shwôm ké esim, Osówo o/mû o/ryí ofit, ne o*da/tóbê kyi-kim ne byibî ḿbyí banet ba/chi*.

²⁶ Nké kántîk, ké nkéré mú kántîk, Osówo o-kú o-tóbê ng kyi-kim ne byibî ḿbyí banet, eringe nyí odatông kanong emen. Ké bukwóp ḿbún, Osówo mu o-tông ng o/fu, nyǐ oyén mu kanong, ne nyǐ mu o-két ng mpan o-nwa nang yeě nang yeě mú o/bángê ké Jisos ne dyityém emen.

²⁷ Be byi-tông ng byiko ké ebóng kâng. Chwǒm kyi*fí nang kyibónge* ńkyí onet odatông byiko*. Ké kyibónge, Osówo o*da/két mpan o-nwa onet* ké bubwô ḿbú mu o-tî ng Byije-Músis* nké nkyi ké bubwô ḿbú mu o-bángê e ké Jisos ne dyityém emen.

²⁸ Ké ebóng, be byimu byi-nyît ng ké ntûntû byi/fu, Osówo mu o-két ng mpan o-nwa onet ké bubwô ḿbú dyityém efé ne Jisos nké nke. *Chí ké bubwô ḿbú mu o-chi i ńkyí Byije-Músis byi/sét*.

²⁹ Ké byifee, Osówo mu mú banet-Jûs nké nke? O*fí mú banet ḿbé ba*fí banet-Jûs*? Kyi*fí éné*.

³⁰ Osówo mu obónge mú o/já banet-Jûs me ḿbé ba*fí banet-Jûs*. Ne mu o-két ng mpan o-nwa banet-Jûs ne ḿbé ba*fí banet-Jûs* ké bubwô ḿbú dyityém ebe efé ké Jisos Karâs.

³¹ Ńkyín kyi/byí kyi/fu, be byipwó Byije-Músis? ké ebóng, Osówo mu o-két ng mpan o-nwa banet ké bubwô ḿbú dyityém efé ne Jisos? Aa*wááng*. Kyi*fí éné*. Ké bukwóp bukíri, be byimu byi-tî ng Byije-Músis ké bukwóp ḿbú bu/kwárê ne mbyí.