Rúman 2 - Bokyi Bible

Osówo o/chi o-pan Kángkáng Banet Mpan

¹ Ben, ǎ bacín ejí, nang bamu ebóng dyizong-banet, ba*fí ne bukwóp nang bubónge* ḿbú badapan barî-banet mpan ké byiko*. Ké ebóng, â ba/sét barî-banet ba/fu, mbé baa*nwa* nké ben to bamu ba-chi i azong-byibî-byěm abónge nyí mbé mbe ba-chi i, ányi bamu ba-két ng mpan mú oda běn ebên ben bayén.

² Be byimu byi-nyît ng byi/fu, Osówo mu o-chi i ńkyí kyi/kwárê ké nkéré mu o-pan n banet mpan ḿbé mbe ba-chi i azong-byibî-byěm ányi wǎ ńnyín.

³ Nké ben bayén, ǎ bacín ejí, bamu ba-chi i bachíchí-byěm ḿbyín ḿbyí bamu ba-pan n barî-banet ḿbé áku mpan ké byiko. Ben ké ntûntû baa*man efem busông ḿbú Osówo*.

⁴ Ben bamu ba-kúng ng Osówo ké achi dángé, ké ebóng, o/jang ecángê dyityém, ne o*fí o-kyâ běn busông ochéé óchee* ké ofit mú mu o-ryí i ne ben chwóó*. Ké ntûntû, ben bamu ba-nyît ng ba/fu, Osówo o/cángê dyityém, ké ebóng, mu o-kan n o/fu, nyǐ o-chi i běn ba-saa byiko ba-mîng byibî enen echi.

⁵ Ké bubwô ḿbú ben bamu ba-jang ng eshwane ashí kâng, ben bamu ba-chi i busông ḿbú enen bu-bwa bu-jê bu-shwôm ké Dyicí ńdyí Osówo o/chi o-tông busa-dyityém emen, o-pan banet mpan ké bukwóp ḿbú bu/kwárê.

⁶ Ké ebóng, Osówo o/chi o-kye nang yeě nang yeě eyáré nyí e/kwárê ké ńkyí nyǐ oo/chi.

⁷ Kyicê-banet mbe ba-câ kashú ne byěm ḿbyí byinong echi, ba-kyé ng Osówo ba/fu, okye kámbé akpee ne ofê ne dyityém ńdyí baa*kpú to*. Mbé nké Osówo o/chi o-kye kámbé dyikpen ńdyí ne banyá.

⁸ Banet bakíri mbe ba-ryuu ng ba/fu, mbé ba-chi i ńkyí nkyi kyi-nyîn n kámbé nké nke. Ba-mîng ng ńkyí nkyi kanong, ba-kúng ńkyí kii*nwa*. Osówo o/chi o-pwó azong-banet ányi busa-dyityém ne kafâ esa emen ké byiko.

⁹ Osówo o/chi o-kye kángkáng banet ḿbé mbe ba-chi i byibî-byěm afaníkong ne bubân. O-bwóp ng kpá kashú ne banet-Jûs, ne o-byí to ne banet ḿbé ba*fí banet-Jûs*.

¹⁰ Nké Osówo o/chi o-kye kángkáng banet ḿbé mbe ba-chi i ńkyí nkyi kanong akpee ne ofê ne bunyîn-dyityém. O-bwóp ng kashú ne banet-Jûs ne o-byí to ne banet ḿbé ba*fí banet-Jûs*.

¹¹ Ké ebóng, kángkáng banet mbe eringe ebónge ké bushú ḿbú Osówo.

¹² Banet ḿbé ba*fí banet-Jûs* ba*fí ne Byije-Músis*. Nang ké mbe ba-chi i byibî, ba-kpú u, kyi*fí ké bubwô-Byije-Músis*. Banet-Jûs kâng mbe ne Byije-Músis. Ne mbe ba-chi i byibî ké bukwóp ḿbú Byije-Músis byi/sét, ne Osówo mu o-két ng mpan o-bên kámbé kyi-kim ne byije ámbyi.

¹³ Ké ebóng, *chí ké bubwô ḿbú Byije-Músis ejwo nké Osówo mu o-két ng mpan o-nwa banet*. Nké nkyi ké bubwô ḿbú byěm echi wǎ eringe Byije-Músis byi/sét.

¹⁴ Banet ḿbé ba*fí banet-Jûs* ba*fí ne Byije-Músis*. Nké nang nkéré orá nké dyityém ebe dyi/sét kámbé dyi/fu, bachi ńkyí Byije-Músis byi/sét, mbé mbe ba-tông ng ba/fu, mbé mbe ba-nyît ng ńkyí banet badachi ne ńkyí baa*chi*. Nang ké ba*fí ne Byije-Músis*.

¹⁵ Édúú ebe nyi e-tông ng e/fu, Osówo o/sáng ńkyí Byije-Músis byi/sét byi/fu, banet bachi ké atyém ebe. Atyém ebe nyi a-tông ng to a/fu, ńkyín nkyi ntûntû, ké ebóng, okabe ebe ntáng okíri mu o-sét ng kámbé o/fu, ba/chi kyibî, ntáng okíri o-fu, ba/chi kyinong.

¹⁶ Wǎ eringe nyí Bǎmpém ḿbé Banong ḿbé mu n-sét ng banet ba/sét ba/fu, něen nké kyi/chi kyi-chi ké Dyicí ándyi ńdyí Osówo, ké bubwô ḿbú Jisos Karâs, o/chi o-pan ekabe nyí nyi ké atyém-banet mpan.

Ńkyí Byije-Músis byi/sét kyi-kim ne Banet-Jûs

¹⁷ Kyi-kim kántîk ne ben, ǎ banet-Jûs. Ben bamu ba-kó ng byiko enen ba/fu, ben ba-chi i banet-Jûs. Busa enen kángkáng mbu ké Byije-Músis, ne bamu ba-kíbî ng abwô ké kakim ba/fu, Osówo mú enen nké nke.

¹⁸ Ben bamu ba-nyît ng ńkyí Osówo mu o-ryuu ng o/fu, ben bachi, ne byije bii/tángê běn, eringe nyí badanyît ńkyí nkyi kanong.

¹⁹ Ben bamu ba-sét ng ne atyém enen ba/fu, be nké byimu byi-tông ng bansêe achi bukwóp. Be nké byimu kiinwángé ńkyí banet ḿbé mbe ké kyifip.

²⁰ Be nké byimu byi-tángê e banet ḿbé atyém ebe nyi kyeekyee, byi-tángê e to bwǎsíng. Ben bamu ba-bángê e ba/fu, ké bubwô ḿbú ben bamu ne Byije-Músis, ben bamu ba-nyît ng kángkáng byěm kerededet, ne ńkyí ben bamu ba-sét ng nkyi ochíchí-ntûntû.

²¹ Ben bamu ba-tángê e banet ḿbé áku, ebóng baa*tángê byiko enen*. Ben bamu ba-sét ng banet ba/fu, *da n̂g echi ba-jii kajii* nké ben bayén bamu ba-jii ng.

²² Bamu ba-sét ng banet ba/fu, *da n̂g echi ba-chi kyinam* nké ben bayén bamu ba-chi i byinam. Ben ba/fu, erím-bakye ee*nyîn běn* nké bamu ba-da ng ejii bujii ké byise ḿbyí ba/tî erím-bakye.

²³ Ben bamu ba-tông ng byiko ba/fu, ben bamu ne Byije-Osówo, nké bamu ba-fâ Osówo éshwân ké byije emen ḿbyí bamu ba-bên n.

²⁴ Ké ebóng, ejá-Osówo nyí ba/sáng kyísí e/sét e/fu, ké bubwô enen, ǎ banet-Jûs, nké banet ḿbé ba*fí banet-Jûs* ba-kú ba-raa ng byibî-byěm ba-bât Osówo.

²⁵ Â ben bamu ba-chi i ńkyí Byije-Osówo byi/sét, dyicên enen ńdyí bamu ba-cên n dyi/chi dyi-chwáp běn. Nké â bamu ba-né ng echi ńkyí Byije-Osówo byi/sét, dyicên enen dyi*da/byí chwǒm*.

²⁶ Â onet mú o*fí onet-Jûs* mú ba*da ǎ ecên* o/chi ńkyí Byije-Osówo byi/sét ǎ, kyi-cen n nǎ ne Osówo oo*ba/chi o-kúng onet ámu wǎ onet mú ba/cên ǎ dyicên*.

²⁷ Ben kâng, ǎ banet-Jûs, banet ḿbé ba*fí banet-Jûs* ba/chi ba-pan mpan o-bên běn, ké ebóng, ben mú bamu ba-cên n, ne bamu to ne Byije-Osówo ḿbyí ba/sáng kyísí, nké bamu ba-bên n kámbyí. Mbé ḿbé ba*fí banet-Jûs kâng* mbe ba-chi i ńkyí Byije-Osówo byi/sét, nang ké ba*fí ba-cên n dyicên*.

²⁸ Â a/tún achi kâng, yeě mu ochíchí-onet-Jûs mú ba/cên ǎ ké ntûntû. *Chí onet mú mu onet-Jûs ké kiintaa ńkyí kyíjí* mú ba/yip kyikwâm ba-cên ǎ*.

²⁹ Nké ochíchí-onet-Jûs, ányi onet mú mu onet-Jûs ké dyityém, ányi onet mú baa/cên dyityém emen, ńkyí nkyi bǎmkpóngé ḿbé Busun-Osówo, *chí ḿbé Byije-Músis ḿbyí ba/sáng kyísí*. Onet ámu mu o-koo ng akpee ne Osówo, *chí ne banet*.