Rúman 15 - Bokyi Bible

Byikûchi Byěm ḿbyí byidanyîn Barî-Banet Dyityém

¹ Be mú dyityém eten ńdyí byi/fé ne Karâs ndyi shwaneshwane, kyi-nwa ng ńkyí byidachwáp banet ḿbé mbe kyeekyee, ba-chi byěm ḿbyí mbyi byi-sóng ng kámbé. Byi*dachi byi-chi byěm ḿbyí byida bě enyîn be bayén*.

² Nké nang yeě nang yeě ké burwám eten ochi orî-onet mú o/bángê ké Karâs ńkyí nkyi kanong ne nyǐ ne ńkyí kyi/chi kyi-nyîn ǎ dyityém, eringe nyí byidachi obánge emen o-firi shwanshwan.

³ Ké ebóng, Karâs, o*da/kyú dyikpen ńdyí dyida ǎ ekûnyîn nyǐ oyén*. Nké o/kyú wǎ eringe nyí ejá-Osówo nyí ba/sáng kyísí, nyí e/sét e/fu, edángé nyí e/fím ké ocím mú banet ḿbé ba/dángê ǒ ee/bwa mě me ké byiko.

⁴ Kángkáng byěm ḿbyí ba/sáng ké ejá-Osówo nyí ba/sáng kyísí ba/sáng kámbyí ba/fu, ba-tángê e bě be. Eringe nyí be byidakyú ne achi etî ké bubwô ḿbú dyityém ecíp ne busa efé ḿbyí ejá-Osówo nyí ba/sáng kyísí nyi e-kyâ bě.

⁵ Ne kyi/bát Osówo mú mu o-chi i bě byi-cíp dyityém, byi-já busa, ochi běn ba-kyú ké bunyîn-dyityém ne barî, ké kyiká-édúú nyí Jisos Karâs ekúng.

⁶ Eringe nyí ben ashí kángkáng ké kyikit kyibónge ne ejá ebónge ba/chi ba-kpee Osówo mú mu Osówo ne Bonchí mú Jisos Karâs, Otu Kyítá eten.

Bǎmpém ḿbé Banong ba/já to Banet ḿbé ba*fí Banet-Jûs*

⁷ Kû n̂g ekoo barî kâng ne bunyîn-dyityém wǎ eringe nyí Karâs oo/koo běn, eringe nyí banet ba/chi ba-kye Osówo akpee.

⁸ Ké ebóng, me mu n-sét ng běn n/fu, Karâs o/bírî o-firi ḿgbán mú banet-Jûs, eringe nyí odatông o/fu, Osówo o-chi i ńkyí o/ryí ocím o/fu, nyǐ o-chi i, ne eringe nyǐ odachi ocím mú Osówo o/ryí biǐtí-banchí eten ḿbé kpákpá o-kyú ntûntû,

⁹ ne eringe nyí odachi to banet ḿbé ba*fí banet-Jûs* ba-kye Osówo akpee ké bafip emen ḿbé mu o-ri ng banet. Wǎ eringe nyí ejá-Osówo nyí ba/sáng kyísí e/sét e/fu, ké bubwô ámbu, me n/chi n-kó ǒ asǎma ké burwám-banet ḿbé ba*fí banet-Jûs*. Me n/chi n-kwán ekwan m-kpee ǒ.

¹⁰ E-chîsét e/fu, jêe n̂g ne banet ḿbé Osówo o/cá kámbé, ǎ banet ḿbé ba*fí banet-Jûs*.

¹¹ E-chînye e-sét e/fu, kángkáng banet ḿbé ba*fí banet-Jûs* bakye Otu Kyítá akpee. Kángkáng banet bakpee ǎ.

¹² Azáya o-chîsét to o/fu, onet-kyikû-banet ńkyí Jésyi o/chi o-bâ. Osówo o/chi o-kúng ǎ butu o-kûtún banet ḿbé ba*fí banet-Jûs*. Ne ba/chi ba-tî achi ké bubwô emen.

¹³ Kyi/bát Osówo mú mu o-chi i bě byi-tî ng achi, ochi atyém enen a-sú ne kángkáng bunyîn-dyityém ké bubwô-dyityém enen ńdyí ba/fé ne nyǐ, eringe achi enen nyí bamu ba-tî ng a/chi a-kûce kashú ké busa ḿbú Busun-Osówo.

Pôl o/sét Kyikû ńkyí kyi/chi ne Nyǐ o-sáng, nang Chwǒm o*da/rôo*

¹⁴ Bwǎn-bané ejí, me oyén mu n-nyît ng ké ntûntû n/fu, atyém enen nyi kanong, ne bamu ba-nyît ng kanong kanong ńkyí ben badachi, ne ba-man n etángê barî.

¹⁵ Nké ké léta mún, me n*da/rôo nang chwǒm kyibónge kyi-kim ne byěm byikíri ḿbyí me nn/zîim běn*. Me n*da/rôo chwǒm nang kyibónge* ké bubwô-kiǐtí-bǎmkpóngé ḿbé Osówo oo/kye mě

¹⁶ o/fu, me nkyú ḿgbán mú Jisos Karâs* n-chi bǎmkpóngé n-kye banet ḿbé ba*fí banet-Jûs*. Me mu n-chi i bǎmkpóngé wǎ nchi kyifen-Osówo ké Bǎmpém ḿbé Banong ḿbé ba/fím ne Osówo, ḿbé me mu n-sét ng banet. Eringe nyí banet ḿbé ba*fí banet-Jûs* ba/chi ba-kyú wǎ kyifen ńkyí kyidanyîn Osówo dyityém, ńkyí Busun-Osówo boo/kúng kángkáng bu-kye Osówo.

¹⁷ Ké ocibi ne Jisos Karâs kâng, me n-man n etông byiko ké bǎmkpóngé ḿbé me nn/chi n-kye Osówo.

¹⁸ Me mm*ba/chi n-rôo chwǒm nang kyibónge* ne n-raa ng nké nke kyi-kim ne ńkyí Karâs oo/chi ké bubwô ejí, o/fu, me ntông banet ḿbé ba*fí banet-Jûs* bukwóp ḿbú badakûchi ńkyí Osówo o/sét, ké ejá ne ké byěm echi,

¹⁹ ké busa ḿbú ekap ne biǐtí-akat ne ké busa ḿbú Busun-Osówo. Ké bubwô ámbu kâng, ké kyikim-bucen kyimúmú ńkyí me n/cen kyi-fím ké Jerúsélem tete a-ribi Elyíryíkum, me nn/sét banet Bǎmpém ḿbé Banong kángkáng kyi-kim ne Karâs.

²⁰ Me kángkáng nkéré mu n-ryuu ng n/fu, n-sét ng banet Bǎmpém ḿbé Banong ké byikit ḿbyí banet ba*da/jwo ne kyi-kim ne Karâs* eringe nyí kii*ba/chi kyi-firi wǎ me m/bi kyise ké kyikit ńkyí onet okíri o/mû oo/wá o-sím kpá kyikû-ekpe o-fé kyísí*.

²¹ Wǎ eringe nyí ejá-Osówo nyí ba/sáng kyísí e/sét e/fu, banet ḿbé ba/mû ba*da/sét kámbé kyi-kim ne nyǐ* ba/chi ba-ri, ne banet to ḿbé ba/mû ba*da/jwo ne* ba/chi ba-nyît kyikû eringe nyí kyi/byí.

Pôl o/tî Okabe o/fu, Nyǐ o/chi o-ca Rûm

²² Ké bubwô ḿbún, me n*da/man ne ebê m-ba-ri běn*.

²³ Nké eringe nyí kántîk mm/man bǎmkpóngé ejí ké eshê ńnyín, ne ké bubwô ḿbú ké aje nyí aa/shwôm chwóó mu n-ryuu ng n/fu, m-bâ ng běn eri,

²⁴ mu n-kabe ng n/fu, n/chi n-chi éné kántîk. Nkyi kyi-nyîn n mě n/fu, n-ri ng běn, â n-kú n-shwôm m n-wâa Syipîn, eringe nyí ben ba/chi ba-chwáp mě n-ribi ké oshê ámu, ké nkéré nn/kyú ne ben ké kyikim-nkéré.

²⁵ Kántîk kâng, me n-kú n-wâa ng Jerúsélem, n-da-chi bǎmkpóngé n-kye banet-Osówo ḿbé mbe áku.

²⁶ Ké ebóng, banet-Osówo ḿbé mbe ké eshê nyí Masedónya ne Girîs baa/kabe mbé bayén ba/fu, mbé ba-kyâ eyáré-akpuga nyí badakúng ba-chwáp banet-byikpu ḿbé mbe ké burwám-banet-Osówo ḿbé mbe ké Jerúsélem.

²⁷ Mbé bayén nké ba/kabe ba/fu, mbé ba-chi i kánkyí. Nké ké ntûntû, mbé ba/mû ba-man ba-chwáp banet-kyikpu ámbe. Ké ebóng, banet ḿbé ba*fí banet-Jûs* ba/koo to eyáré nyí busun nyí Osówo o/kye banet-Jûs, ne ké bubwô ámbu to, banet ḿbé ba*fí banet-Jûs* ba-man ba-kye banet-Jûs kyicê-byěm ḿbyí ké ejíí, ḿbyí Osówo mu o-kyâ kámbé.

²⁸ Ké nkéré mú mm/man bǎmkpóngé ḿbén, n-kye kámbé kángkáng akpuga nyí baa/kye mě ba/fu, me nkye kámbé, me n/chi n-dim n-wâa Syipîn, ne n/chi n-ri běn ké nkéré mú n-kú n-shwôm m n-dim.

²⁹ Ké nkéré mm/bê n-kâm běn, me mu n-nyît ng n/fu, me n/chi n-kyú ne ben byi-koo ojware chwóó mú mu o-fím m ne Karâs.

³⁰ Me mu n-tîm m běn arông, ǎ bwǎn-bané ejí, n/fu, ké bubwô ḿbú Jisos, Otu Kyítá eten, ne ké ḿbú kyijé ńkyí Busun-Osówo mbu bu-kyâ, cibi n̂g ne me byi-fé nshwam ne atyém eten byi-kye Osówo o-chwáp mě.

³¹ Fé n̂g nshwam ba/fu, Osówo ochwáp mě n-fem ké abwô nyí banet ḿbé Judyâ, ḿbé ba*da/bángê ké Karâs*. Ba-fé to nshwam ba/fu, banet-Osówo ḿbé ké Jerúsélem bakyú ne kyijé ké bǎmkpóngé ejí ḿbé n/chi n-chi ké oshê ámu.

³² Eringe nyí me n/chi m-bâ kâng n-kâm běn ne bunyîn-dyityém chwóó, ne obê mú n/chi m-bâ m-ba-ri běn o/chi o-chi mě n-kyú ké bunyîn-dyityém, n-jáng, â Osówo o/bángê.

³³ Kyi/bát Osówo mú mu o-kyâ bě bunyîn-dyityém okyú ne ben ashí amúmú. Kyi/bát kyikyú éné.