Rúman 14 - Bokyi Bible

*Da n̂g epan Barî-Banet Mpan ké Byiko*

¹ Koo n̂g onet mú dyityém emen ńdyí o/fé ne Karâs dyi*fí shwaneshwane* ba-fé ké burwám enen. Nké *da n̂g echi ba-kán ké dyishí ne nyǐ kyi-kim ne ńkyí odachi ne ńkyí oo*chi*.

² Dyityém efé ké Karâs ńdyí onet okíri dyi-bángê e ǎ o-kûryí nang ebóng chwǒm. Nké onet mú dyityém emen ńdyí o/fé ne Karâs dyi*fí shwaneshwane* oo*ryí enyam nang ebónge*.

³ Onet mú oo*ciring byiryíng nang byibónge* o*dachi o-kûciring onet mú odacá byiryíng*. Onet to mú oo*ryí enyam nang ebónge* o*dachi o-kûciring onet mú mu o-ryí i nang ebóng nang ebóng* ké ebóng, Osówo oo/koo onet ámu mú mu o-ryí i kángkáng byěm.

⁴ Ben ebóng dyizong-banet ḿbé badapan ḿgbán mú onet okíri mpan. Bonchí emen oyén nké odaman esét, nang mu o-chi i kanong, nang o*fí o-chi i kanong*. Ne ḿgbán ámu o-man o-chi kanong, ké ebóng, Otu Kyítá o-man n ǎ echi o-chi kanong.

⁵ Onet obónge o-kabe ng o/fu, dyicí ndyi dyibónge ńdyí ndyi kiǐtí dyi-shwôm ací nyí áku kángkáng. Onet okíri o-bwa o-kabe o/fu, ací kángkáng nyi eringe ebónge. Nang yeě nang yeě okyú ne okabe mú ntûntû o/fu, ńkyí nyǐ mu o-kabe ng nkyi ntûntû.

⁶ Nang yeě nké mu o-kúng ng dyicí dyibónge o/fu, ndyi kiǐtí dyi-shwôm, mu o-chi i kánkyí ké ofê mú Otu Kyítá. Nang yeě nké mu o-ryí i nang ebóng chwǒm nang ebóng chwǒm, mu o-chi i kánkyí ké ofê mú Otu Kyítá, ké ebóng, onet ámu mu o-kó ng Osówo asǎma ké byiryíng ámbyi. Nang yeě nké o/né byěm byikíri eryí mu o-chi i kánkyí ké ofê mú Otu Kyítá, ne mu o-kó ng Osówo asǎma.

⁷ Ké ebóng, onet o*fí mú mu o-kpen n o-kyâ byiko emen kǎnchí*. Nang onet o/kpú to, o*da/kpú o-kye byiko emen kǎnchí*.

⁸ Â be byi/kpen, byimu byi-kpen n eringe nyí byidafé Otu Kyítá. Nang byi/bwa byi-kpú to, byimu byi-kpú u eringe nyí byidafé Otu Kyítá. Nang byimu byi-kpú u, nang byimu byi-kpen n kâng, Otu Kyítá nké o/já bě.

⁹ Ké ebóng, Karâs o/kpú, o-jwóbê o-bwa ké dyikpen, eringe nyí odakyú Otu Kyítá mú banet bakpó ne bakúsí.

¹⁰ Ben kâng, ebóng bamu ba-pan n barî-banet bampan ké byiko. Ne ben, ebóng bamu ba-ciring ng barî-banet. Be kángkáng byi/chi byi-bwom ké bushú ḿbú Osówo o-pan bě mpan.

¹¹ Ké ebóng, wǎ eringe nyí ejá-Osówo nyí ba/sáng kyísí e/sét e/fu, Otu Kyítá o/fu, ké nǎ, me mu m-kpen n kángkáng nkéré, nang yeě nang yeě o-man o-tím arông kyísí ké bushú ejí. Ne nang yeě nang yeě o/chi o-sét o/fu me n-chi i Osówo.

¹² Nang yeě nang yeě ké burwám eten kâng o/chi o-sét kyi-kim ne byiko emen ké bushú ḿbú Osówo.

*Da n̂g echi Barî-Banet Enen ḿbé ba/bángê ké Karâs ba-róng ké Kyibî*

¹³ Kántîk kâng, byimîng barî bampan epan ké byiko. Nké ńkyí ben ba/chi ba-kabe ba-chi nkyi něen. *Da n̂g echi barî-banet enen ḿbé ba/bángê ké Karâs ba-róng ké kyibî*.

¹⁴ Ocibi ejí ne Jisos, Otu Kyítá mu o-chi i mě n-nyît ké ntûntû n/fu, chwǒm kyi*fí ńkyí onet odaciring*. Nké â onet o/bángê o/fu, nyǐ o-ciring ng chwǒm, chwǒm ánkyi kâng kyi-firi ng kyibî-chwǒm ké bushú emen.

¹⁵ Â ben bamu ba-chi i barî-banet enen ba-kûsa kafâ ké byiryíng enen ḿbyí bamu ba-ryí i, ńkyí bamu ba-chi i éné kyi*fí to kyi-fím m ké kyijé*. *Da n̂g echi ba-mîng byiryíng ḿbyí bamu ba-ryí i byi-bên onet mú Karâs o/kpú ké dyishí emen*.

¹⁶ *Da n̂g ebángê chwǒm ńkyí ben ba/fu, nkyi kanong kyi-koo kyibî-dyizîn*.

¹⁷ Ké ebóng, Butu ḿbú Osówo bu*da/kim ne byiryíng eryí ne bato ejwáp*. Nké bu/kim ne kanong echi ne bunyîn-byityém ne ojêe ké kafâ-dyityém eyên ḿbyí Busun-Osówo mbu bu-kyâ.

¹⁸ Ne nang yeě nké mu o-fâ Karâs ké bukwóp ḿbún, Osówo o-kyú u ké bunyîn-dyityém ne nyǐ, banet to ba-kpee ng ǎ.

¹⁹ Ké bubwô ḿbún kâng, be kángkáng nkéré byi-man byi-tî achi ké byěm echi ḿbyí byidabê ne bunyîn-dyityém ne ḿbyí byidachi barî-banet ba-jê ké dyityém ebe ńdyí ba/fé ne Karâs.

²⁰ *Da n̂g ebên ńkyí Osówo oo/chi ké bubwô ḿbú byiryíng*. Onet o-man n eryí nang ebóng byiryíng, nké kii*nwa ńkyí onet odaryí chwǒm ńkyí kyidachi onet okíri o-róng ké kyibî*.

²¹ Ochíchí-chwǒm ńkyí badachi nkyi něen. *Da n̂g eryí enyam* ba-jwáp nang bato* nang chwǒm kyikíri echi ńkyí kyidachi orî-onet eyên o-róng ké kyibî*.

²² Tî n̂g ńkyí ben ba/bángê kyi-kim ne chwǒm ńkyín kâng kyi-waa ne ben bayén, ne ne Osówo to. Bunyîn-dyityém mbu ne onet mú mu o-nyît ng o/fu, nyǐ o*fí o-chi i kyibî* â mu o-chi i chwǒm ńkyí dyityém emen dyi/sét ǎ*.

²³ Nké â dyityém emen ndyi ǎ kabekabe ké chwǒm ńkyí mu o-ryí i, Osówo o-pan n ǎ kyibî-mpan, â o/ryí kánkyí. Ké ebóng, édúú emen e*da/kim ne dyityém emen ńdyí o/fé ne Osówo*. Ne â be byi/chi chwǒm ńkyí kyi*da/kim ne dyityém efé ne Osówo* chwǒm ánkyi kyi-kyú u kyibî.