Rúman 13 - Bokyi Bible

Ofê mú Banet-Ashí-Oshê

¹ Nang yeě nang yeě o-man o-fé banet-ashí-oshê, ké ebóng, Osówo nké mu o-kyâ onet busa ḿbú odafiri onet-dyishí-oshê, ne kángkáng banet-ashí-oshê Osówo nké o/tî kámbé.

² Nang yeě nké o/kán onet-dyishí-oshê ké dyishí, ányi onet ámu mu o-kán n ké dyishí ne onet mú Osówo o/tî. Ne nang yeě nké o/chi éné, Osówo o/chi o-pan ǎ mpan.

³ Ké ebóng, banet ḿbé mbe ba-chi i kanong baa*shî banet-ashí-oshê*. Banchi byibî nké badashî kámbé. Â ben bamu ba-ryuu ng ba/fu, ben baa*shî onet-dyishí-oshê* ba-man ba-kûchi kanong, ne onet-dyishí-oshê ámu o/chi o-kpee běn.

⁴ Ké ebóng, onet-dyishí-oshê ámu o-chi i ḿgbán-Osówo mú mu o-chi i kanong o-kyâ běn. Nké â bamu ba-chi i kyibî, kû n̂g ǎ eshî, ké ebóng, busa emen ḿbú odakye onet busông, o-man n eyip kámbú o-kye onet busông. Nyǐ o-chi i ḿgbán-Osówo, ne o-man o-chi banet ḿbé mbe ba-chi i byibî ba-ri busông.

⁵ Ké bubwô ḿbún, ben ba-man ba-fé banet-ashí-oshê. *Chí ké bubwô ḿbú Osówo oda běn ekye busông nké nke* nké ké ebóng, ké dyityém enen, ben bamu ba-nyît ng ba/fu, kyi-nwa ng ńkyí badachi éné.

⁶ Ńkyín to nké nkyi dyishí-chwǒm ńdyí bamu ba-kyâ akpuga-dyishí. Ké ebóng, banet-ashí-oshê mbe ba-chi i bǎmkpóngé ba-kyâ Osówo ké bǎmkpóngé ebe ḿbé mbe ba-chi i.

⁷ Kye n̂g kámbé kâng ńkyí ba/ryí kámbé. Kye n̂g kámbé akpuga-dyishí nang ará nang ará. Kye n̂g kámbé kángkáng ofê.

Banet ba-man ba-kyú ne Kyijé ne Barî

⁸ *Da n̂g echi ba-ryí onet nang obónge dyifwá*. Dyifwá dyikíri dyi*fí to ńdyí ben badaryí* kyi-cibi ne kyijé ekyú ne barî-banet*. Nang yeě nké orî-onet mu o-jê ng ǎ, ányi onet ámu mu o-chi i ńkyí byije-Osówo byi/sét.

⁹ Byije-Osówo ḿbyí byi/fu, *dachi kyinam* *daju onet* *dajii kajii* *datî dyityém eyên ké chwǒm-onet* ne kángkáng byije-Osówo ḿbyí áku mbyi kángkáng ké kyije ńkyí ba/fu, orî-onet ojê ǒ wǎ eringe nyí byiko eyên mbyi byi-jê ng ǒ.

¹⁰ Nang yeě nké orî-onet mu o-jê ng ǎ, oo*man echi orî-onet ámu kyibî*. Â barî-banet mbe ba-jê ǒ kâng, ányi amu a-tî ng kángkáng byije-Osówo.

¹¹ Ba-man ba-chi ńkyín, ké ebóng, ben bamu ba-nyît ng eringe nyí nkéré mú kántîk mu. Nkéré oo/fyi mú ben badajwóbê ké burê. Ké ebóng, nkéré mú Osówo oda bě enyii oo/fárâng kántîk o-shwôm eringe nyí o/mû ké nkéré mú byi/kpet dyityém efé ne Karâs.

¹² Buchú boo/tíbî, dyicófóróng dyi/firi jwángjwáng. Mîng n̂g byi-mîng kâng echi byěm ḿbyí kyifip, byi-bwá byěm-bunwa ḿbyí byidanwa bunwa ké kiinwángé.

¹³ Byitî n̂g byiko eten kanong wǎ banet ḿbé mbe ba-kyú u ké kiinwángé ńkyí dyicí. Mîng n̂g enyam-byiryíng eryí ne bato ebwóm ne kyibî echi ńkyí badarí ne banet ḿbé ba*da/bé ne dyibé* ne byibî-acáá echi ne anwa enwa ne kafâ esa ké byěm-banet.

¹⁴ Nké bwá n̂g byěm-bunwa ḿbyí Jisos Karâs, Otu Kyítá, ba-mîng etún achi ké enyam-byiko enen nyí nyi ne byibî, ba/fu, ba-chi i ńkyí kyidanyîn kányí.