Rúman 11 - Bokyi Bible

Osówo oo/ri Banet ḿbé Ézerel Bafip

¹ Me mu m-bí ng kâng n/fu, Osówo o/né banet emen dí. Ké ntûntû, kyi*fí éné*. Me oyén n-chi i onet-Ézerel ké kyikû-banet ńkyí Ébarahâm, ké kyikû ńkyí Běnjámin.

² Osówo o*da/né banet emen ḿbé nyǐ o/cá kámbé kyi-fím ké kiimkpet kyikû*. Ben bamu ba-nyît ng ńkyí ejá-Osówo nyí ba/sáng kyísí e/sét ké kyikit ńkyí Elája o/tírîng Osówo o/fu, obírî banet-Ézerel esim.

³ E/fu, Otu Kyítá, banet-Ézerel baa/ju bamkpábé ḿbé badasét byiraa eyên, ba-bên byikit eyên ḿbyí mbe ba-chi i byifen ba-kyâ ǒ. Me kǎnchí nké n/waa, ne mbe ba-ryuu ng ba/fu, mbé ba-ju ng mě.

⁴ Ebóng ejá nyí Osówo o/faa Elája. Osówo o/faa ǎ o/fu, me nn/cá égot-banet bujam esim onyiryiká n-tî byiko ejí ḿbé ba*da/fé osówo mú o*fí ké kafâ* mú badakó Bâl*.

⁵ Nkyi eringe ebónge ne nkéré mú kántîk. Kaǎnyín-ocím-banet nke kô ńké Osówo oo/cá ké bubwô-bafip ḿbé o/ri kámbé.

⁶ Ocâ ámu o/fím ké bubwô ḿbú bafip emen ḿbé o/ri kámbé, *chí ké bubwô ḿbú byěm ḿbyí baa/chi*. Ké ebóng, â Osówo o/mû o-cá ng banet ké bubwô-byěm ḿbyí mbe ba-chi i, bafip ḿbé mu o-ri ng kámbé ba/mû baa*kyú ochíchí-bafip*.

⁷ Ké ntûntû, banet-Ézerel ba*da/ri ńkyí mbé mbe ba-kyé ng*. Kaǎzú-boǒnyín-banet ḿbé Osówo o/cá nké ba/ri kánkyí. Burwám ḿbú áku ba/tim atông ké dyikô ńdyí Osówo mu o-kó ng kámbé.

⁸ Wǎ eringe nyí ejá-Osówo nyí ba/sáng kyísí e/sét e/fu, Osówo o/chi atyém ebe o/fu, a*dachîman ekabe chwǒm*. Tete dyicí ńdyí kurún, baa*man eyip achi ebe ba-ri* ba-yip atông ebe ba-jwo chwǒm*.

⁹ Ne Otu Dívit o/raa o/fu, kyi/bát Osówo okám kámbé, o-níbî kámbé wǎ kaǎtám ké nkéré ba-kú ba-chi i ajî ebe. Kyi/bát ochi kámbé ba-róng, o-kye kámbé busông.

¹⁰ Kyi/bát ocít kámbé achi, eringe nyí baa*rángê to*. Ne kyi/bát ochi kámbé ba-ri busông ké bubwô ḿbú afaníkong ebe.

¹¹ Me mu m-bí ng kâng n/fu, ké nkéré banet-Jûs ba/kpán dyícíring, mbé ba/myii ne banyá ne banyá? Kyi*fí éné*. Ké ebóng, mbé ba/chi byibî, Osówo oo/chi onyii emen o-kâm banet ḿbé ba*fí banet-Jûs* eringe nyǐ odachi banet-Jûs ba-firi ne orêm.

¹² Kyibî ńkyí banet-Jûs ba/chi kyi/bê ne biǐtí-banjware ké ejíí. Ké ebóng, banet-Jûs ba/róng, biǐtí-banjware bii/bê byi-kâm banet ḿbé ba*fí banet-Jûs*. Banjware kâng baa*ba/chi ba-nwa eri* â kángkáng banet-Jûs ba/nung ké burwám-banet ḿbé Osówo o/chi o-nyii kámbé.

Osówo o/nyii Banet ḿbé ba*fí Banet-Jûs*

¹³ Me mu n-raa ng kántîk ne ben mú ba*fí banet-Jûs*. Ké nǎ, me mu onet-kyitwóm-Jisos mú banet ḿbé ba*fí banet-Jûs* me m-man n-tông byiko ké bǎmkpóngé ejí.

¹⁴ Katô me m-man n echi banet-oshê ejí ba-firi ne orêm, eringe nyí Osówo o/chi o-nyii kámbé ké bubwô ejí.

¹⁵ Ké ebóng, ké nkéré Osówo o/né kámbé, Osówo o/chi banet ḿbé ké ejíí ba-firi bacín emen. Kyi/chi kyi-kyú nǎ kâng ké nkéré Osówo oo/koo kámbé. Kyi-kyú u ké ntûntû wǎ banet ḿbé ba/mû baa/kpú nké baa/bwa esim ké dyikpen.

¹⁶ Â ba/kye Osówo mbwôp kashú-kyicê-berêt, ányi kyi/byí, kyirim-berêt kyimúmú kyi/já ǎ to. Ne â ba/yip eriri-kyichí ba-chi kyifen ba-kye Osówo, ányi kyi/byí, byire-kyichí ánkyi to byi/já Osówo.

¹⁷ Baa/két kyicê-byire-kyichí ńkyí badakó ólif, ńkyí ba/kwón okwón ba-twóp, ba-yip mgbang-ólif mú ba*da/kwón okwón* ba-bwá ba-cibi ne mú ba/kwón okwón, eringe nyí mgbang mú ba*da/kwón* o/chi o-kán cibicibi ne mú ba/kwón okwón. Ben banet ḿbé ba*fí banet-Jûs* bamu wǎ dyisín-kyichí-ólif ńdyí ba*da/kwón okwón* ne kántîk ben ba-kú ba-ryí i byěm ḿbyí banet-Jûs.

¹⁸ Ké bubwô ámbu kâng, ben baa*man ba-kûtông byiko ne banet ḿbé Osówo o/két kámbé o-pwó wǎ byire-kyichí*. Ben ba-cen n nǎ ne ba-kûtông byiko. Ben bamu wǎ kyire-kyichí. Ben ba*fí ba-kyâ eriri-byichí byiryíng* eriri nké nyi e-kyâ běn.

¹⁹ Nké kyicê-banet ké burwám enen ba-man n ekán ké dyishí ba/fu, âa, nké Osówo o/két byire o-pwó, eringe nyí be byidajá kyikit byi-kyú.

²⁰ Ńkyín nkyi ntûntû. Osówo o/két kámbé o-twóp, ké ebóng, ba*da/fé dyityém ne nyǐ*. Ne ben ba/waa ké kyikit ńkyí Osówo o/tî běn, ké ebóng, ben ba/fé dyityém ne nyǐ. Nké *da n̂g echi ba-já okabe mú byiko etông kyi-kim ne nkyí*. Kû n̂g ekyú ké bushî.

²¹ Osówo o*da/mîng banet-Jûs ḿbé mbe wǎ byire-kyichí ḿbyí ba/kwón okwón ba-kán n ba-câ*. Kyi-cen n nǎ ne o-mîng běn ben.

²² Nyín be byimu byi-ri ng eringe nyí Osówo o/cángê dyityém, ne eringe nyí odakét mpan o-bên onet, o-kye ǎ busông. Nyǐ mu o-kyâ banet ḿbé baa/róng busông, nké o/cángê dyityém ne ben, â ben bamu ba-câ kashú ne édúú nyí odacángê dyityém ne ben. Nké â ba*da/chi éné* o/chi o-két běn to o-twóp.

²³ Ne banet-Jûs, â ba/yángê atyém ebe ba-kpet ebángê, Osówo o/chi o-bwa ne mbé ké kyikit ńkyí ba/mû, ké ebóng, Osówo o-chî ng eman ebwa ne mbé esim ké kyikit ńkyí ba/mû.

²⁴ Ben banet ḿbé ba*fí banet-Jûs* bamu wǎ kyire-kyichí ńkyí badakó ólif, ńkyí ba*da/kwón okwón* ńkyí baa/két, ne ké bukwóp kâng ḿbú bu*da/tyeem ne eringe nyí kyichí kyidakán* baa/chi běn ba-kú ba-kán n ké okyukyu-kyichí-ólif ńkyí ba/kwón okwón. Banet-Jûs mbe wǎ kyichí ńkyín ńkyí ba/kwón okwón. Kii*ba/chi kyi-sóng Osówo kâng ńkyí odayip byire-kyichí ḿbyí o/mû oo/két o-twóp o-bwa ne mbyí o-lák ké ochíchí-kyichí ńkyí o/mû o/két kámbyí*.

Osówo mu o-ri ng Kángkáng Banet Bafip

²⁵ Ntûntû mu kô, ǎ bwǎn-bané ejí, mú banet ba*da/nyît ne* mú me mu n-ryuu ng n/fu, ben banyît kámú. Ntûntû mún o/chi o-chi běn baa*kabe to ba/fu, ben bamu ba-nyît ng byinyídíng*. Ntûntû ámu mu něen. Dyishí eshwane ńdyí banet-Ézerel dii*ba/chi dyi-waa ne banyá*. Nké dyi/chi dyi-waa tete ocím-banet ḿbé ba*fí banet-Jûs* ḿbé Osówo mu o-ryuu ng ba-bâ ba-kâm Osówo.

²⁶ Něen nké Osówo o/chi o-nyii kángkáng banet-Jûs, wǎ eringe nyí ejá-Osówo nyí ba/sáng kyísí e/sét e/fu, Osówo o/fu, Onet-Onyii o/chi o-fím ké oshê mú badakó Záyon, o-ba-pwoo kángkáng byibî ḿbyí kyikû-banet ńkyí Jekôp.

²⁷ Me n/chi n-ryí ocím mún ne mbé n-sem byiko ejí ké nkéré mú mm/pwoo kámbé ké byibî ebe.

²⁸ Ké ebóng, banet-Jûs mbe ba-né ng Bǎmpém ḿbé Banong, mbé ba/firi banet-bushwôn-Osówo ké dyishí enen, ben banet ḿbé ba*fí banet-Jûs*. Nké ké bubwô ḿbú Osówo o/cá kámbé, mbé ba-chi i bacín-Osówo ké bubwô ḿbú biǐtí-banchí eten ḿbé kpákpá.

²⁹ Ké ebóng, Osówo oo*yángê dyityém emen ne onet mú nyǐ oda ǎ ecá* o-jware ǎ*.

³⁰ Kyi-kim ne ben kâng, ǎ banet ḿbé ba*fí banet-Jûs* ben ba/né ńkyí Osówo o/sét běn ké nkéré mú o/shwôm ké esim. Nké kántîk, Osówo oo/ri běn bafip, ké ebóng, banet-Jûs ba/né echi ńkyí Osówo o/sét kámbé.

³¹ Ké bubwô ámbu to bubónge, ké bubwô ḿbú Osówo o/ri běn bafip, banet-Jûs kántîk ba-kú ba-né ng echi ńkyí Osówo mu o-sét ng kámbé, eringe nyí Osówo to o/chi o-ri kámbé bafip.

³² Ké ebóng, Osówo oo/chi kángkáng banet ba-firi wǎ banet-mgbokobá, ké nǎ, ba/né ńkyí nyǐ o/sét. Nyǐ oo/chi ńkyín, eringe nyí odari kángkáng banet bafip.

Osówo o/kwárê mú bada ǎ ekye Akpee

³³ Osówo ké ntûntû o/cángê dyityém ne banet kángkáng. Osówo mu ne byinyídíng, ne byěm ḿbyí mu o-nyît ng bii*nwa eri*. Onet o*fí mú odaman esét ńkyí Osówo mu o-kabe ng* o-bwa o-nyît nang akwóp emen*.

³⁴ Wǎ eringe nyí ejá-Osówo nyí ba/sáng kyísí e/sét e/fu, yeě mu o-nyît ng dyityém ńdyí Otu Kyítá. Yeě oda ǎ eman ekye bacê.

³⁵ Yeě oo/kye ǎ nang chwǒm ńkyí odabwa ne nkyí o-só ǎ.

³⁶ Ké ebóng, nyǐ nké o/chi kángkáng byěm, ne kángkáng byěm mbyi byi-kpen n byi-tî ng ǎ ké bubwô emen. Osówo o/kwárê mú bada ǎ ekye akpee ne banyá ne banyá. Kyi/bát kyikyú éné.