Rúman 10 - Bokyi Bible

¹ Bwǎn-bané ejí, me mu n-ryuu ng ne dyityém ejí kángkáng n/fu, Osówo onyii banet-oshê ejí. Me mu n-fâ nshwam kanong kanong n-kyâ Osówo ké bubwô ebe.

² Ké ebóng, me m-man n ebwom kámbé ntûesé n/fu, mbé mbe ba-ryuu ng kanong kanong ba/fu, mbé ba-fâ Osówo. Nké ńkyí mbé mbe ba-nyît ng kyi-kim ne Osówo efé kyi*fí ké bukwóp ḿbú ntûntû*.

³ Ba*da/nyît ne bukwóp ḿbú Osówo mu o-két ng mpan o-nwa banet*. Ne baa/kan ba/fu, mbé ba-chi i bukwóp ḿbú ebe. Ké bubwô ámbu kâng, ba*da/kúng byiko ebe ba-tî ké bukwóp ḿbú Osówo mu o-két ng mpan o-nwa banet*.

⁴ Ké ebóng, Karâs oo/chi Byije-Músis byi*fí to ne busa* ne ké bubwô ámbu, Osówo o-kú o-két ng mpan o-nwa nang yeě nang yeě mú o/bángê ne dyityém emen.

Osówo o-man n enyii nang yeě nang yeě

⁵ Nyín něen ńkyí Músis o/sáng kyi-kim ne onet ekwárê ké bushú ḿbú Osówo, ké bubwô ḿbú byije etî, o/fu, nang yeě nké mu o-chi i ńkyí Byije-Músis byi/sét, onet ámu o-kyú u ké bukwóp ḿbú byije.

⁶ Nké nyín ńkyí ba/sét kyi-kim ne onet ekwárê ké bushú ḿbú Osówo, ké bubwô ḿbú dyityém efé ne Osówo, ba/fu, *dachi a-sét byiko eyên a/fu, yeě o/chi o-ca kyíbóng*. Ányi kyi/byí, o-da-yip Karâs o-shû ne nyǐ kyísí.

⁷ *Dachi a-raa to a/fu, yeě o/chi o-ca ké oshê-bakúsí*. Ányi kyi/byí, o-da-yip Karâs ké burwám-banet ḿbé baa/kpú o-bâ ne nyǐ.

⁸ Ńkyí ejá-Osówo nyí ba/sáng kyísí nyi e-sét ng nkyi něen. Kyitwóm ńkyí Osówo nkyi běn fáráng. Ben ba-man n enyît kánkyí ké byibî-ocím enen, ba-koo kánkyí ké atyém enen. Ányi kyi/byí, kyitwóm ńkyí dyityém efé ne Osówo, ńkyí be byimu byi-sét ng.

⁹ Â ben bamu ba-sét ng wááng ké ejá enen ba/fu, Jisos o-chi i Otu Kyítá, ba-bángê e to ké atyém enen ba/fu, Osówo o/jwóbê ǎ ké bukyû, Osówo o/chi o-nyii běn.

¹⁰ Ké ebóng, obánge ké atyém eten mu o-cen n ne Osówo o-két mpan o-nwa bě, ne osêt wááng kyi-kim ne dyityém eten ńdyí byi/fé ne Osówo mu o-cen n ne Osówo o-nyii bě.

¹¹ Ké ebóng, ejá-Osówo nyí ba/sáng kyísí e/fu, nang yeě nké o/tî dyityém emen ne nyǐ kii*ba/chi kyi-tánê ǎ kyísí*.

¹² Ńkyín kyi/ta kángkáng banet, ké ebóng, banet-Jûs ne ḿbé ba*fí banet-Jûs* ba*da/yángê ne barî ké bushú ḿbú Osówo*. Osówo obónge nké mu Óburúkpâbí ebe ashí amúmú. Ne nyǐ mu o-jware ng nang yeě nang yeě kanong kanong mú mu o-fâ nshwam o-kyâ ǎ.

¹³ Wǎ eringe nyí ejá-Osówo nyí ba/sáng kyísí e/raa e/fu, nang yeě nké mu o-fâ nshwam o-kó ng dyizîn ńdyí Óburúkpâbí, Osówo o/chi o-nyii ǎ.

¹⁴ Nké mbé ba-cen n nǎ ne ba-kó dyizîn emen, â mbé ba*da/bángê ne nyǐ*. Aa mbé ba-cen n nǎ ne ba-bángê ne nyǐ, â mbé ba*da/jwo ne kyitwóm emen*. Ne mbé ba-cen n nǎ ne ba-jwo kyitwóm emen, â banet ba*da/sét kánkyí*.

¹⁵ Ne ba-cen n nǎ ne ba-sét kyitwóm emen, â ba*da/twóm banet-kyitwóm esét*. Wǎ eringe nyí ejá-Osówo nyí ba/sáng kyísí e/sét e/fu, obê mú banet ḿbé ba/chi ba-sét Bǎmpém ḿbé Banong o/chi o-nwa kanong kanong.

¹⁶ Nké mbé ashí kángkáng ba*da/koo ne Bǎmpém ḿbé Banong*. Azáya oyén o/sét o/fu, Otu Kyítá, yeě o/bángê ké kyitwóm eten.

¹⁷ Ké bubwô ámbu kâng, dyityém efé dyi-fím m ké kyitwóm ejwo, ne kyitwóm kyi-bâ ké bubwô-banet esét kyi-kim ne Karâs.

¹⁸ Nké me mu m-bí ng n/fu, nkyi ntûntû ba/fu, mbé ba*da/jwo kyitwóm dí*. Kyi*fí éné*. Ba/jwo, wǎ eringe nyí ejá-Osówo nyí ba/sáng kyísí e/sét e/fu, byiraa ḿbyí byi/fím ké ejá ebe byi/cen byi-káng ejíí emúmú, byiraa ebe byi/ribi bakô-ejíí bamúmú.

¹⁹ M-bwa n-chîbí n/fu, banet-Ézerel ba/mû ba*da/nyît dí*. Músis oyén o/mû mbwôp kashú-onet mú o/faa ejá o/fu, Osówo o/raa o/fu, me n-chi i atyém enen a-bírî běn ne banet ḿbé ba*fí wǎ ochíchí-oshê*. Me n-chi i běn ba-kûsa kafâ ne oshê mú enyam-banet.

²⁰ Ne Azáya o/mû o/cíp dyityém o-raa kyíjí gbúúl o-shwôm ké nkéré mú o/raa o/fu, Osówo o/fu, banet ḿbé ba/mû ba*fí ba-kyé ng mě* nké ba/ba mě ejá. Me m/byí n-kâm banet ḿbé ba/mû ba*fí ba-kyé ng mě*.

²¹ Nké kyi-kim ne Ézerel, Azáya o/fu, Osówo o/raa o/fu, me m/bwom ké kyirim-dyicí kyimúmú n/fu, n-chi i bunyîn-dyityém ne banet ḿbé ba*fí ba-chi i ńkyí mu n-sét ng kámbé* ne ḿbé mbe ba-ryuu ng ba/fu, me n*dachîkyú otu*.