Rúman 1 - Bokyi Bible

^1-7 Me Pôl mú ḿgbán mú Jisos Karâs ne onet-kyitwóm emen mú Osówo o/fîm ǎ, o-kó ǎ o/fu, osét Bǎmpém emen ḿbé Banong nké mu n-sáng ng n-kye běn ben kángkáng banet-Rûm ḿbé bamu ba-jê ng Osówo ne oo/kó běn o/fu, ben bakyú banet emen. Kyi/bát Osówo mú Bonchí eten ne Jisos Karâs, Otu Kyítá bakye běn ochwâp ne bunyîn-dyityém. Osówo o/mû o/ryí banet ocím kyi-kim ne Bǎmpém ḿbé Banong ké nkéré mú oo/shwôm ké esim chwóó, ké ocím mú bamkpábé ḿbé badasét byiraa-Osówo. Ne bamkpábé ámbe ba-kúng ocím ámu ba-sáng kyísí ké nwet-ejá-Osówo nyí ba/sáng kyísí. Bǎmpém ḿbé Banong ámbe ba/kim ne Wǎn-Osówo Jisos Karâs, Otu Kyítá eten. Wǎ onet ba/mû ba/fwon ǎ ké kyikû-banet ńkyí Otu Dívit. Kyi-kim ne eringe nyí nyǐ o/fím ne Osówo, ne eringe nyí nyǐ mu kanong, Osówo o/tông ne kiǐtí-busa o/fu, mú mǔ o-chi i Wǎn emen ké ojwóbe mú o/jwóbê ǎ ké bukyû. Ké bubwô emen, Osówo o/kye mě kiǐtí-bǎmkpóngé ḿbé n/firi onet-kyitwóm-Jisos, eringe nyí n/chi n-tông kángkáng banet ḿbé ké ejíí kiǐfáng ńkyí badabángê, ba-chi to ńkyí nyǐ o/sét. Ńkyín kyi/ta běn to, ben banet-Rûm ḿbé Osówo oo/kó běn o/fu, ben ba-chi i banet ḿbé Jisos Karâs.

Pôl o/fé Nshwam o-kye Osówo, o-kó ǎ Asǎma

⁸ Ké mbwôp kashú, me mu n-kó ng Osówo ejí asǎma ké bubwô-Jisos Karâs, ké dyishí enen kángkáng, ké ebóng, ejíí emúmú nyi e-jwo ng kyi-kim ne dyityém enen ńdyí ba/fé ne Jisos Karâs.

⁹ Osówo o-man n etông kanong kanong o/fu, ńkyí me mu n-sét ng nkyi ntûntû, Osówo mú me mu n-kyâ ǎ ofê ne dyityém ejí kángkáng ké Bǎmpém ḿbé Banong ḿbé mu n-sét ng kyi-kim ne Wǎn emen. Osówo mu o-nyît ng o/fu, me mu n-zîim m běn kángkáng nkéré,

¹⁰ nang nkéré orá nké n-kú n-fâ nshwam. Me mu n-fâ nshwam n/fu, Osówo ochi mě ké nkuli kyikû m-ba-ri běn, â mu o-ryuu ng o/fu, me mbâ.

¹¹ Ké ebóng, me mu n-ryuu ng kanong kanong n/fu, n-ri ng běn, eringe nyí me n/chi n-kyú ne ben kyikit kyibónge, byi-koo kanong ńké Osówo mu o-kyâ bě ké abwô nyí Busun emen, o-chi běn ba-shwane ké atyém enen.

¹² Ńkyí n/fu něen, kyi/byí něen kyi/fu, me n/chi n-chwáp, n-fé běn busa, ben to ba-chwáp ba-fé mě busa. Ben ba/chi ba-firi shwaneshwane, ké ebóng, ben bamu ba-nyît ng eringe nyí me n/fé dyityém ne Karâs, me to n-firi shwaneshwane, ké ebóng, me mu n-nyît ng eringe nyí ben ba/fé dyityém ne Karâs.

¹³ Ben ba-man ba-zîim ńkyín, ǎ bwǎn-bané ejí, ba/fu, me nn/kabe kampén chwóó n/fu, m-bâ ng běn eri, nké n*da/man ne ebê*. Me mu n-ryuu ng n/fu, n-chi i banet ké burwám enen ba-bángê ké Jisos Karâs, wǎ eringe nyí nn/chi ké burwám-banet bakíri ḿbé ba*fí banet-Jûs*.

¹⁴ Ké ebóng, me mu ḿgbán, eringe nyí ndachwáp kángkáng banet ḿbé baa/wángê achi ne ḿbé ba*da/wángê ne* ḿbé badanyît nwet ne ḿbé baa*nyît*.

¹⁵ Ké bubwô ámbu kâng, me nkyi kyi-nyîn n mě n/fu, n-sét ng běn to mú bamu ba-kyú u ké Rûm Bǎmpém ḿbé Banong.

Bǎmpém ḿbé Banong mbe ne Busa

¹⁶ Me n/fé dyityém kanong kanong ké Bǎmpém ḿbé Banong. Ké bubwô ḿbú Bǎmpém ḿbé Banong, Osówo o-man n enyii kángkáng banet ḿbé ba/bángê ne nyǐ ne atyém ebe. Ké mbwôp kashú, banet-Jûs ne banet to ḿbé ba*fí banet-Jûs*.

¹⁷ Ké ebóng, Bǎmpém ḿbé Banong mbe ba-tông ng wááng eringe nyí Osówo mu o-két ng mpan o-nwa banet. Nkyi ké dyityém efé ne Osówo, kyi-fím ké kiimkpet kyikû tete kyi-byí ké nkuli kyikû. Wǎ eringe ejá-Osówo nyí ba/sáng kyísí e/sét e/fu, onet mú Osówo oo/két mpan o-nwa ǎ ké bubwô-dyityém efé ne nyǐ o/chi o-kpen ké ntûntû.

Ké Bushú ḿbú Osówo, nang yeě nang yeě oo/róng Kyije

¹⁸ Osówo oo/tông busa-dyityém emen ké mbu bu-fím m kyíbóng bu-kâm kángkáng byibî ḿbyí banet mbe ba-chi i ké kafâ-dyityém ne kyíjí. Banet ḿbé byibî-akwóp ebe mbyi byi-ku ng banet byi/fu, ba*dachi ba-nyît ntûntû*.

¹⁹ Osówo mu o-kyâ kámbé busông, ké ebóng, ńkyí banet badaman enyît kyi-kim ne Osówo nkyi kámbé wááng. Osówo oyén o/chi kánkyí kyi-firi kámbé wááng.

²⁰ Kyi-fím ké nkéré mú Osówo o/chi ejíí, ba-man n enyît kanong kanong ba/fu, busa ḿbú Osówo boo*man* ne nyǐ ké ntûntû o-chi i Osówo. Byěm ḿbyín ḿbyí byi/kim něen ne Osówo bii*man eri kámbyí* nké byi-man n enyît kyi-kim ne mbyí. Banet ba-man n enyît kyi-kim ne mbyí ké byěm ḿbyí Osówo oo/chi. Ké bubwô ámbu kâng, mbé ba*fí ne bukwóp ḿbú badapan mpan o-nwa kámbé*.

²¹ Mbé mbe ba-nyît ng Osówo, nké ba*fí ba-kyâ ǎ ofê mú o/já ǎ* nang asǎma to ba*fí ba-kó ng ǎ*. Nké okabe ebe mu enyam ényam, ne kyifip nkyi kyi-cít ng biǐfâa-atyém ebe.

²² Mbé mbe ba-raa ng ba/fu, mbé mbe ba-nyît ng byinyídíng, nké mbe enyam.

²³ Ńkyí ba/mû ba/chi ba-kûfé Osówo mú oo*kpú* ba/bwa mbe ba-fâ erím-bakye nyí ba/chi kányí wǎ onet mú odakpú ne wǎ bunurung ne enyam ḿbyí byidakpú.

²⁴ Ké bubwô ḿbú banet mbe enyam, Osówo oo/mîng kámbé o/fu, bakûchi banunut-byěm ḿbyí atyém ebe nyi a-ryuu ng, ne mbe ba-chi i byěm-éshwân ne barî.

²⁵ Mbe ba-yip ng ntûntû mú Osówo ba-yángê ba-koo kyisédéng. Mbé mbe ba-fâ byěm ḿbyí Osówo o/chi, ba-bángê e kámbyí byitwóm, ba-mîng efé Ochíchí-Oyén mú o/chi kámbyí, mú o/kwárê mú banet bada ǎ ekye akpee ne banyá ne banyá. Kyi/bát kyikyú éné.

²⁶ Ké bubwô ḿbú banet mbe ba-chi i ńkyín, Osówo oo/mîng kámbé o/fu, bachi byibî-édúú kyi-kim ne banet erí. Banyinyi ba-kú ba-rí i ne barî, ńkyí nkyi chwǒm ńkyí ba/mû baa*ba/chi ba-chi*.

²⁷ Ké bukwóp ámbu to bubónge, banyinchéng baa/mîng ne banyinyi erí, ba-bwa ba-kûrí ne barî. Ńkyín nkyi chwǒm-éshwân ńkyí ba/mû baa*ba/chi ba-chi*. Banyinchéng mbe ba-chi i byěm-éshwân ne barî, ne ké bubwô ámbu, Osówo mu o-kyâ kámbé busông ḿbú bu/kwárê ne byibî ebe.

²⁸ Ké bubwô ḿbú banet baa/né etî ké dyityém ńkyí mbé mbe ba-nyît ng ba/fu, nkyi ntûntû kyi-kim ne Osówo, Osówo oo/yip kámbé o-kye atyém nyí nyi a-kabe ng kyibî kyíbi, eringe nyí badachi byěm ḿbyí ba/mû baa*ba/chi ba-chi*.

²⁹ Atyém ebe aa/sú ne kángkáng azong-byěm nyí aa*nwa* dyityém ebên ne byěm-éshwân ne byibî-acáá echi. Baa/sú ne orêm ne banet eju ne anwa enwa ne banet enîm ne kyibî ké byiko-banet eryuu. Ba-ram m banet,

³⁰ ba-sét ng barî byibî-byiraa ké byiko. Osówo o-sa ng kámbé kafâ, ba-raa ng ocím, ba-tông ng byiko, ba-yip ng esim. Okabe mú ebe oo/jé chwóó ké akwóp nyí byibî echi, ba-né ng banet ḿbé ba/fwon kámbé byitwóm.

³¹ Ba-chi i byibî-byěm, baa*tî ocím ebe mú badaryí* ne baa*tông dyityém ecángê nang bafip eri ne barî-banet*.

³² Mbé mbe ba-nyît ng ba/fu, kyije ńkyí Osówo kyi/fu, banet ḿbé mbe ba-kyú u ké dyizong-bukwóp ḿbún ba/kwárê mú badakpú. Nang ké mbe ba-nyît ng éné, mbé ba*fí ba-chi i bachíchí-byěm ḿbyín ba-câ kashú nké nke* nké nkyi kyi-nyîn n kámbé to ne banet bakíri ḿbé mbe ba-chi i kámbyí.