Revelíshon 9 - Bokyi Bible

¹ Orím mú onong ké ashí atánge o-jwá kâng ntán mú emen. M-bwa n-chîtún n-ri ókpére mú oo/fím kyíbóng o-róng kyísí. Ba/mû ba/kye kámú agbókóró-kiǐríbíríbí-dyibíng-busông eri.

² Ókpére ámu o-bâa dyibíng ándyi, ne erúkwâ e-byí ké ndyí wǎ erúkwâ nyí nyi e-fím m ké kiǐkâp-okwâ. Erúkwâ ányi e/chi bubóng ne óbyísû byi-róng kyifip.

³ Agurubí a-fím kyíbóng ké erúkwâ ányi, a-ba-cít ejíí. Osówo o/kye kányí busa wǎ ḿbú boonang-aro.

⁴ Osówo o/sét kányí o/fu, a*dachi a-bên kiǐbyâa nang kyibónge* nang kyichí nang kyirá nang kyirá*. Anémê banet ḿbé ba*fí ne ekap nyí Osówo ké bambwô ebe* nké nke.

⁵ Osówo o*da/bángê agurubí ányi a-ju banet ámbe* nké o/bángê o/fu, akye kámbé busông ké byiko nké nke ké etukáku etánge. Bubân ḿbú bu/fím ké busông ámbu mbu wǎ bubân ḿbú onet odajwo ké nkéré kaanang-aro kaa/ché ǎ.

⁶ Ké etukáku ányi etánge, banet ámbe ba/chi ba-kûkyé bukyû, nké baa*ba/chi ba-ri kámbú*. Ba-kû ng eryuu ekpú, nké bukyû bu/chi bu-chêe bu-mîng kámbé.

⁷ Agurubí ányi a-rángê e éné wǎ bubyî-orá ḿbú boo/kpá byiko-byití. A/mû ne byěm ké ashí ebe ḿbyí mbyi wǎ etam-butu nyí ba/chi ké gûl, ne bashú ebe ba/mû wǎ bashú ḿbé banet.

⁸ Eji ebe e/mû wǎ eji nyí banyinyi. Asháng ebe a/mû wǎ asháng-ekpang.

⁹ Bukim ebe bu/mû cítcít ne byěm éné wǎ bankyû-byití, ne kyicoge ńkyí abyibabang ebe nyi a-chi i kyi/mû wǎ kyicoge ńkyí bamútu chwóó ḿbé bubyî-orá budatut nké mbu bu-tut ng babap bu-dim byití.

¹⁰ Nyi ne ecî ne byikit ḿbyí adaché éné wǎ ḿbyí boonang-aro. Ké ecî ebe ányi nké nyǐ nyi ne busa ḿbú adakye banet busông ké etukáku etánge.

¹¹ Nyi ne otu mú mu o-tún n kányí, mú mu kyibî-orím mú mu o-bám m kiǐríbíríbí-dyibíng-busông eri. Dyizîn emen ké ejá-Hyíburu, dyi-bángê e Ábadon. Ké ejá-Girîk, dyi-bángê e Apólyon, ányi kyi/byí, Mbên Byěm.

¹² Mbwôp kashú-busông oo/man. Â ḿbún boo/shwôm, bu/waa kampén kafee ḿbú budachîbê.

¹³ Orím mú onong ké ashí nyâchât o-jwá ntán emen kâng. Ne n-jwo ejá ké nyi e-fím m ké etwóm enyii nyí ké bakô-ókpákpúrúk ámu mú badashí burwan, mú ba/chi ké gûl, mú mu cip ké kashú-Osówo.

¹⁴ Ejá ányi e/raa ne orím mú onong ámu ké ashí nyâchât, mú mu ne ntán ámu e/fu, pii barím ḿbé banong banyii ḿbé ba/bwá kámbé ba-tî ké kiǐtí-baya ḿbé badakó Yuférétyis.

¹⁵ Orím mú onong ámu o-pii barím ḿbé banong ámbe banyii ḿbé Osówo o/mû o/tî kámbé tîtî, ba-kûbám ochíchí-kyikim-nkéré ńkyín ńkyí ochíchí-dyicí ńdyín ńdyí ochíchí-otukáku mú ké ochíchí-dyije ńdyín, o/fu, ké byikim-banet byichât, baju kyikim kyibónge.

¹⁶ Ba/sét mě ocím-basúja ḿbé mbe kyíbóng-bubyî-orá. Ba/mû bajam-égot ḿbé baa*nwa epan*.

¹⁷ Ne ké chwǒm-akat ejí ńkyí n/ri, n/ri bubyî-orá ámbu ne banet ḿbé mbe ba-yú u kámbú. Banet ámbe ba/mû ne bankyû-byití ké byiko, shíshét wǎ okwâ, bulûbulu wǎ bubóng ne bukwa búkwa wǎ kákerêng. Ashí nyí bubyî-orá ámbu a/mû wǎ ashí-ekpang. Okwâ ne erúkwâ ne aká nyí aa/sóng okwâ a-bwam shéét byi/mû mbyi byi-byí i kámbú ké ocím.

¹⁸ Ké byikim-banet byichât, byibî-byěm ámbyi ne okwâ ne erúkwâ ne aká nyí aa/bwam okwâ ḿbyí mbyi byi-byí i ké ecím nyí bubyî-orá ámbu byi/ju kyikim-banet kyibónge.

¹⁹ Ké ebóng, busa ḿbú bubyî-orá bu/mû ké ecím ebe ne ké ecî ebe to. Ecî ebe e/mû ne ashí ne e/mû wǎ efyi, ne bu-yip ng ecî ebe bu-kûnémê banet.

²⁰ Banet ḿbé áku ḿbé ba/waa, kángkáng banet ḿbé byibî-byěm ámbyi byi*da/ju* ba*da/bírî esim ké ńkyí mbé baa/chi mbé bayén*. Ba*da/mîng ofê mú mbe ba-kyâ byibî-bací* ne erím-bakye nyí ba/chi ké gûl* ne ké syílyíba* ne ké biǐré-agut* ne ké aká* ne ké byichí* ḿbyí bii*rángê* bii*jwo atông* nang ocen bii*man ecen*.

²¹ Nang byiko to byi*da/kpú banet ámbe ké banet ḿbé ba/ju* nang ké bambirirím ebe ḿbé ba/chi* nang ké byibî-byěm ḿbyí ba/chi kyi-kim ne banet erí* nang ké bujii ḿbú ba/jii*.