Revelíshon 8 - Bokyi Bible

Nryî Esim-Ekap, ányi ké Ekap Káchâtkányi

¹ Ké nkéré mú Wǎn-Etám-Ebû o/ját o-bâa nnyinyěng-ekap, ányi ké ekap káchâtkányi, byikit byi/mû pyêp ké bubóng, ké kyikim-nkéré.

² M-bwa n-chîtún n-ri kâng barím ḿbé banong ámbe káchâtkányi ḿbé mbe ba-bwom m ké bushú-Osówo. Ba/kye kámbé biintán káchâtkányi.

³ Ne orím mú onong okíri mú mu ne kyiféng ńkyí ba/chi ké gûl, ńkyí nkyi ne burwan o/bê o-ba-bwom ké ókpákpúrúk mú badashí burwan, mú ba/chi ké gûl, mú mu cip ké kashú-kakyúng-butu. Ba/kye ǎ burwan chwóó ba/fu, oshí kámbú ké ókpákpúrúk ámu, eringe nyí odacibi ké banshwam ḿbé kángkáng banet-Osówo mbe ba-fâ.

⁴ Erúkwâ nyí burwan ḿbú mbu bu-shí i e/fím ké abwô nyí orím mú onong mú mu o-bwom m ké bushú-Osówo, e-yú e-jâ kyíbóng ne banshwam ḿbé banet-Osówo.

⁵ Ne orím mú onong ámu kâng o-yip kyiféng ánkyi ńkyí nkyi ne burwan, o-fé okwâ mú o/fím ké ókpákpúrúk ámu ké nkyí pwat, ne o-bírî kámú o-pwó ké ejíí. Ne etare e-kpet esá, kyicoge kyi-kpet, kasabang ka-kpet ekédê, ne esí e-kpet enáng.

Ba/jwá Biintán ámbyi Káchâtkányi

⁶ Barím ḿbé banong ámbe ashí káchâtkányi ne biintán ámbyi káchâtkányi ba-kpá byiko kâng ḿbyí badajwá kámbyí.

⁷ Mbwôp kashú-orím mú onong o/jwá ntán emen. Abíp ne okwâ, cibicibi ne baróng byi-fím kyíbóng byi-kpet epwôo ké ejíí. Kyikim-ejíí kyibónge, â a/kyii ejíí ké byikim byichât, kyi/shí gbât! Kyikim-asín-byichí kyibónge, â a/kyii kányí ké byikim byichât, ne kángkáng biǐbyâa byi/shí byimúmú.

⁸ Ne nnyinyěng-orím mú onong o-jwá kâng ntán emen. Ba-twóp chwǒm ńkyí nkyi éné wǎ kiimbâng-kaku ńkyí nkyi kyi-mang ng okwâ ké kafâ-baya ḿbé baryên. Kyikim-baya kyibónge, â a/kyii kámbé ké byikim byichât, kyi-bírî baróng.

⁹ Kyikim-byěm kyibónge, â a/kyii kámbyí ké byikim byichât, ḿbyí mbyi byi-kpen n ké kafâ-baya byi-kpú, ne kyikim-bǎnsukyíkang kyibónge, â a/kyii kámbé ké byikim byichât, ba/bên kángkáng.

¹⁰ Orím mú onong ké ashí achât o-jwá kâng ntán mú emen. Kiimbâng-ókpére ńkyí nkyi kyi-mang ng wǎ buka kyi-zûu ké bubóng kyi-róng ké kyikim-kace kyibónge, â a/kyii buce ké byikim byichât.

¹¹ Dyizîn-ókpére ámu dyi-bángê e Buruu. Omu mú mu ké kyikim-buce ánkyi o-bírî buruu. Banet chwóó ba/kpú ké omu ámu mú ba/jwáp, ké ebóng, omu ámu oo/bírî buruu.

¹² Orím mú onong ké ashí anyii o-jwá kâng ntán mú emen. Chwǒm kyi-kíbî kyicê-óbyísû kyibónge ne kyicê-otukáku kyibónge ne kyicê-ékpére kyibónge, â a/kyii kámbyí ké byicê byichât, kyi-chi kyikim-kiinwángé ebe kyibónge, â a/kyii kánkyí ké byikim byichât, kyi-firi kyifip. Kiinwángé kyi/mû kyi*fí ké kyikim-dyicí kyibónge* â a/kyii kándyí ké byikim byichât. Eringe ebónge to ne kyikim-buchú kyibónge, â a/kyii kámbú ké byikim byichât.

¹³ M-bwa n-chîtún n-ri, ne n-jwo kiinkwa ńkyí nkyi kyi-byí i kyíbóng ké kyi/raa ké ejá kyíbóng kyíbóng kyi/fu, busông, busông, busông bu/chi bu-kâm banet ḿbé mbe ba-kyú u ké ejíí, ké nkéré byirime-biintán byi-kú byi-rime e ḿbyí barím ḿbé banong ḿbé áku ba/chi ba-man ba-jwá.