Revelíshon 7 - Bokyi Bible

Bajam-Égot-Banet-Ézerel Bujam Esim Onyiryiká ne Din

¹ Ké nkéré ńkyín kii/shwôm, n-ri barím ḿbé banong banyii cip ké bakô-ejíí banyii, ba-kám m afú nyí nyi a-tugi ng ké bakô-ejíí ámbe banyii, eringe nyí bufú boo*chi* ḿbú budatugi ké esí* nang ké kace* nang ké kyichí nang kyibónge*.

² Ne n-ri orím mú onong okíri ké mu o-byí i o-bâ ne chwǒm-ekap etî ńkyí Osówo mú mu okpó ké kyicê ńkyí esû edabyí. O-kó barím ḿbé banong ámbe banyii ḿbé Osówo oo/kye kámbé busa ḿbú badabên esí ne kace, ké ejá kyíbóng kyíbóng

³ o/fu, *da n̂g echi ba-bên esí* nang kace* nang byichí* tete byi-tî bǎmgbán ḿbé Osówo eten ekap ké bambwô ebe.

⁴ Ne ba/sét mě ocím-banet ḿbé ba/tî kámbé ekap nyí Osówo ké bambwô ebe. Ocím-banet mú o/fím ké byikû-banet-Ézerel byimúmú o/mû bajam-égot bujam esim onyiryiká ne din.

⁵ Banet ḿbé ba/fím ké kyikû ńkyí Júda, ḿbé ba/tî kámbé ekap ba/mû bajam-égot bachât. Ḿbé ba/fím ké kyikû ńkyí Rúben ba/mû bajam-égot bachât. Ḿbé ba/fím ké kyikû ńkyí Gât ba/mû bajam-égot bachât.

⁶ Ḿbé ba/fím ké kyikû ńkyí Ásha ba/mû bajam-égot bachât. Ḿbé ba/fím ké kyikû ńkyí Nafatályi ba/mû bajam-égot bachât. Ḿbé ba/fím ké kyikû ńkyí Manáse ba/mû bajam-égot bachât.

⁷ Ḿbé ba/fím ké kyikû ńkyí Syímyon ba/mû bajam-égot bachât. Ḿbé ba/fím ké kyikû ńkyí Lyíva ba/mû bajam-égot bachât. Ḿbé ba/fím ké kyikû ńkyí Ézaka ba/mû bajam-égot bachât.

⁸ Ḿbé ba/fím ké kyikû ńkyí Zébélon ba/mû bajam-égot bachât. Ḿbé ba/fím ké kyikû ńkyí Josêf ba/mû bajam-égot bachât, ne ḿbé ba/fím ké kyikû ńkyí Běnjámin ba/mû bajam-égot bachât.

Bujê-Banet Chwóó

⁹ Ké nkéré ńkyín kii/shwôm, n-tún achi n-ri bujê-banet chwóó. Onet o*fí nang obónge mú odaman epan banet ámbe kángkáng*. Mbé ba/fím ké eshê emúmú ké ejíí, ne ké kángkáng byikim-banet ḿbyí mbyi ké ejíí, ne ké kángkáng azong-banet ḿbé mbe ké ejíí, ne ké kángkáng azong-ejá nyí mbe ba-raa ng ké ejíí. Ba-bwom ké bushú ḿbú kakyúng-butu ne ḿbú Wǎn-Etám-Ebû. Mbé ba/mû ba/fé ágbádá nyí kpárádádát ké byiko, ne ba/mû ba/níbî achiche ké abwô.

¹⁰ Ba-wonge ne ejá kyíbóng kyíbóng ba/fu, onyii eten mu o-fím m ne Osówo eten mú mu o-kyú u ké kakyúng-butu, ne mu o-fím m to ne Wǎn-Etám-Ebû.

¹¹ Kángkáng barím ḿbé banong ba/bwom ba-wáp kakyúng-butu ne bachíkpi ne biǐnyám byinyii ba-fé ké kafâ. Ne mbé kâng ba-tíngê bashú ebe kyísí ké kashú-kakyúng-butu ba-kye Osówo ofê,

¹² ba-raa ba/fu, kyi/bát kyikyú éné. Akpee ne busan ḿbú ragerage ne bubong ne asǎma ne ofê ne busa ne busa ḿbú bu/rêe bu-shwôm byijá Osówo eten ne banyá ne banyá. Kyi/bát kyikyú éné.

¹³ Ne ochíkpi obónge o-bí mě o/fu, ebóng banet něen ḿbé ba/fé ágbádá nyí kpárádádát ké byiko. Mbé ba/fím nyá.

¹⁴ Me n-faa ǎ n/fu, me n*fí n-nyît ng kámbé* ǎ bonchí*. Wo nké amu a-nyît ng kámbé. Nyǐ o-sét mě o/fu, banet ḿbén ba-chi i banet ḿbé baa/fem ké kiǐtí-afaníkong. Mbé ba/soo ágbádá ebe ba-chi kányí a-firi kpárádádát ké baróng ḿbé Wǎn-Etám-Ebû.

¹⁵ Nkyí nké kyi/chi mbé mbe ba-bwom m ké kashú-kakyúng-butu ńké Osówo, ba-kyâ ǎ ofê ké kiǐtí-kyise-kyifen-Osówo echi, buchú ne esû. Nyǐ mú mu o-kyú u ké kakyúng-butu o/chi o-bám kámbé kanong ké bushú emen.

¹⁶ Esong ee*ba/chi e-chînwa kámbé* nang omu oo*ba/chi o-chîjê kámbé ne banyá* nang esû nang kiinsóngé kii*ba/chi kyi-shí kámbé ne banyá*.

¹⁷ Ké ebóng, Wǎn-Etám-Ebû mú o/bwom kámbé ké otyém mú kakyúng-butu o/chi o-kyú kámbé wǎ mbâm ebû. Ne o/chi o-tông kámbé kiǐfáng tata ba-ribi ké buce ḿbú budakye dyikpen. Ne Osówo o/chi o-shî kámbé kángkáng batíí ké achi.