Revelíshon 6 - Bokyi Bible

Ekap nyí Osówo o/tî ké Nwet ámu

¹ M-bwa n-chîtún n-ri kâng Wǎn-Etám-Ebû o-ját o-bâa mbwôp kashú-ekap ké nwet ámu, nyí Osówo o/tî ké byikit káchâtkányi, ne n-jwo kiǐnyám kyibónge kyi-raa ké ejá nyí nyi wǎ etare kyi/fu, bâ.

² M-bwa n-chîtún n-ri kiǐkpárádádát-kabyî-orá ányi. Onet mú o/mû mu o-yú u kánké o/níbî búre, ne ba/mû ba/kye ǎ etam-butu. Nyǐ o-dim edakpógê wǎ onet mú odanwa bunwa o-kpógê.

³ Ne Wǎn-Etám-Ebû kâng o-ját o-bâa nnyinyěng-ekap, ne n-jwo nnyinyěng-kiǐnyám kyi-raa kyi/fu, bâ.

⁴ Ne kabyî-orá kakíri ńké shíshét ka-byí kyíjí. Onet mú o/mû mu o-yú u kánké ba/mû ba/kye ǎ busa ḿbú odabê ne byití ké ejíí, o/fu, banet baju barî. Nyǐ ba/mû ba/kye ǎ kiimbâng-kashwám.

⁵ Wǎn-Etám-Ebû kâng o-ját o-bâa ekap echât, ne n-jwo nnyinyěng-kiǐnyám, ányi ké biǐnyám byichât, kyi-raa kyi/fu, bâ. M-bwa n-chîtún n-ri kabyî-orá ńké pyampyam ányi. Onet mú o/mû mu o-yú u kánké o/mû ne órúmá ké bubwô.

⁶ Me n-jwo ńkyí kyi/raa éné wǎ ejá nyí nyi e-raa ng ké kyikit ńkyí biǐnyám ámbyi byinyii mbyi. E/raa wǎ nshee byěm e/fu, bankôp-éríshi bachât ké dyicí-bǎmkpóngé dyibónge, ne bankôp garyí nyâchât ké dyicí-bǎmkpóngé dyibónge. Nké *dachi a-bên bakút ne bato*.

⁷ Ne Wǎn-Etám-Ebû kâng o-ját o-bâa ekap enyii, ne n-jwo nnyinyěng-kiǐnyám, ányi ké biǐnyám byinyii, kyi-raa kyi/fu, bâ.

⁸ M-bwa n-chîtún n-ri kabyî-orá ńké enyam-byiko emen e/firi dábe. Onet mú o/mû mu o-yú u kánké o/mû o-bángê e Bukyû. Ne Oshê-Bakúsí o/mû o-bâ ǎ ké kyikû fáráng. Osówo o/kyii ejíí byikim byinyii o-kye kámbé kyikim kyibónge o/fu, kyifiri ké abwô ebe, o/fu, baju kánkyí ké kashwám ne esong ne byirwóm ne byibî-enyam ḿbyí ké ejíí.

⁹ Ne Wǎn-Etám-Ebû kâng o-ját o-bâa nnyinyěng-ekap, ányi ké ekap etánge. Ne n/ri basun ḿbé banet ḿbé baa/ju ké dyifít-ókpákpúrúk mú badachi kyifen-Osówo, ké ebóng, mbé baa/sét byiraa-Osówo kyíjí wááng, ne baa/fé atyém ebe ké byiraa ḿbyí mbé mbe ba-sét ng.

¹⁰ Mbé ba/wonge ké ejá kyíbóng kyíbóng ba/fu, Otu Kyítá mú kángkáng busa, mú mu kanong ne o-sét ng ntûntû, ka-rí i nǎ ne kyi-byí nkéré mú wo a/chi a-pan banet ḿbé ké ejíí mpan a-kye kámbé busông, ké nǎ, mbé ba/ju bě.

¹¹ Nang yeě nang yeě ké burwám ebe Osówo o/kye ǎ ágbádá nyí kpárádádát, ne Osówo o/sét kámbé o/fu, bajáng kaǎnyín ba-ca kashú tete ocím-banet mú bǎmgbán emen ne barî-banet ebe ḿbé ba/bángê ké Jisos, ḿbé ba/chi ba-ju wǎ eringe nyí ba/ju kámbé o-byí.

¹² M-bwa n-chîtún n-ri Wǎn-Etám-Ebû ké o/ját o-bâa nnyinyěng-ekap, ányi ké ekap nyâchât. Esí e-náng kanong kanong, ne óbyísû o-firi pyampyam wǎ kiipyimpyam-kyídí-dyikán eta, ne otukáku omúmú o-firi shíshét wǎ baróng.

¹³ Ékpére e-zûu ké bubóng e-róng kyísí wǎ byirim-byichí ḿbyí byi*da/bwam ne* ḿbyí byidafím kyíbóng-kyichí byi-róng kyísí ké nkéré afú a-kú a-ninge e kánkyí.

¹⁴ Bubóng bu-rím wǎ kiǐbáá-nwet ńkyí mbe ba-fút ng, ne eku emúmú ne esí nyí baya ba/wáp kányí ba-fé ké otyém byi-king byi-mîng byikit ebe.

¹⁵ Ne batu ḿbé ejíí kâng ne banet-ashí ne batu ḿbé basúja ne banfang-banet ne biǐtí-banet ne kángkáng banet ḿbé áku, básóng ne ḿbé ba*fí básóng* ba/rem ké bacim ne ké afít-aká, ké eku.

¹⁶ Mbé ba-kó eku ne aká ba/fu, myii n̂g ba-cít bě, ba-rôo bě, eringe nyí nyǐ mú mu o-kyú u ké kakyúng-butu oo*ri bě*. Ba-rôo bě, eringe nyí kafâ esa ńké Wǎn-Etám-Ebû kaa*ta bě*.

¹⁷ Ké nǎ, kiǐtí-dyicí ándyi ńdyí busa-dyityém ḿbú Osówo ne mbé dii/fyi, ne yeě mú o/chi o-man ebwom ké bushú-dyicí ándyi.