Revelíshon 5 - Bokyi Bible

Nwet ne Wǎn-Etám-Ebû

¹ M-bwa n-chîtún n-ri nwet obónge ké bubwô-etyebéng ḿbú nyǐ mú o/kyú ké kakyúng-butu. Ba/sáng byěm ké mǔ esim emúmú, ne ba/tî ekap ké mǔ ké byikit káchâtkányi.

² M-bwa n-chîtún n-ri orím mú onong mú mu ne busa o-shwôm, mú o/bí ké ejá kyíbóng kyíbóng o/fu, yeě o/kwárê mú odaját ekap nyí ba/tî ké nwet mún, o-bâa kámú.

³ Nké onet o/mû o*fí nang obónge ké bubóng* nang ké ejíí ńnyín* nang ké oshê-bakúsí* mú odaman ebâa nwet ámu o-tún achi ké mǔ*.

⁴ N/tii bukyû chwóó, ké ebóng, onet o/mû o*fí nang obónge* mú o/kwárê mú odabâa nwet ámu o-tún nang achi ké mǔ*.

⁵ Ochíkpi obónge kâng o-raa ne me o/fu, *dachîtii* kûri, nyǐ mú mu ekpang nyí kyikû-banet ńkyí Júda, mú mu kiǐtí-onet ké kyikû-banet ńkyí Otu Dívit, oo/kpógê, ne o-man n eját ekap ányi káchâtkányi nyí ba/tî ké nwet ámu o-bâa kámú.

⁶ M-bwa n-chîtún n-ri kâng Wǎn-Etám-Ebû éné wǎ baa/ju ǎ ba-chi kyifen, cip ké otyém, ké kakyúng-butu, ne biǐnyám ámbyi byinyii ne bachíkpi ámbe wângwâng. Wǎn-Etám-Ebû ámu o/mû ne etwóm káchâtkányi ne achi káchâtkányi ḿbyí basun ámbe káchâtkányi ḿbé Osówo oo/twóm ké ejíí emúmú.

⁷ Wǎn-Etám-Ebû o-dim o-da-koo nwet ámu ké bubwô-etyebéng ḿbú nyǐ mú mu me ké kakyúng-butu.

⁸ Ńdyí mu o-koo ng nwet ámu éné, biǐnyám ámbyi byinyii ne bachíkpi ámbe bujam ne banyii ba-myii ké bushú-Wǎn-Etám-Ebû. Ochíkpi nang orá o/mû ne dyícîng ne acáng nyí ba/chi ké gûl ne burwan ké kafâ, nyí nyi banshwam efé ḿbé banet-Osówo.

⁹ Mbé ba/kwán okwan mú ofyîfî ba/fu, wo a/kwárê mú adakoo nwet a-ját byikit ḿbyí ba/tî kámú ekap. Ké ebóng, ba/mû ba/ju ǒ wo ba-chi kyifen, ne ké bubwô-baróng eyên, wo a/pá banet a-kye Osówo, ḿbé ba/fím ké eshê emúmú ne byire byimúmú ne esí emúmú ne byikû-banet byimúmú.

¹⁰ Wo aa/kúng kámbé butu wǎ banchi kyifen-Osówo, a/fu, bakûfé Osówo eten, ne bakyú to batu-ashí ḿbé ejíí.

¹¹ M-bwa n-chîtún n-ri, ne n-jwo bajam-égot-barím ḿbé banong ḿbé baa*nwa epan*. Ba-bwom ba-wáp kakyúng-butu ne biǐnyám ámbyi byinyii ne bachíkpi ámbe ba-fé ké otyém,

¹² mbe ba-kwán n kakânkakân ba/fu, Wǎn-Etám-Ebû mú ba/ju o/kwárê mú odakoo busa ne efang ne byinyídíng ne bushwane ne ofê ne busan ḿbú ragerage ne akpee.

¹³ Ne n-jwo kángkáng byěm ḿbyí mbyi kyíbóng ne ḿbyí ké ejíí ne ḿbyí ké oshê-bakúsí ne ḿbyí ké kace ne ḿbyí ké bubóng ne esí mbyi byi-kwán n byi/fu, akpee ne ofê ne busan ḿbú ragerage ne busa byikyú ne nyǐ mú o/kyú ké kakyúng-butu ne Wǎn-Etám-Ebû ne banyá ne banyá.

¹⁴ Biǐnyám ámbyi byinyii byi-nene byi/fu, kyi/bát kyikyú éné. Ne bachíkpi ámbe ba-tím arông kyísí ba-kye ofê.