Revelíshon 3 - Bokyi Bible

Wǎn-Osówo o/twóm Kyitwóm o-kye Banet-Ékwâbashi nyí Karâs ḿbé mbe ké Sádyis

¹ Sáng a-kye orím mú onong mú banet-ékwâbashi nyí Karâs ḿbé mbe ké Sádyis a/fu, nyín něen kyitwóm ńkyí kyi/fím ne nyǐ mú mu ne basun ámbe káchâtkányi ḿbé Osówo ne ékpére káchâtkányi. Me mu n-nyît ng ńkyí wo amu a-chi i. Me mu n-nyît ng n/fu, wo amu ne dyizîn ńdyí adawaa okpó, nang ké wo aa/kpú.

² Nké jwóbê, a-chi ńkyí amu ne nkyí kyi-shwane, ne kyi-kûkpú kyimúmú. Ké ebóng, me nn/ri n/fu, ńkyí wo aa/chi kyi*da/kwárê ne kerededet ké bushú ḿbú Osówo ejí*.

³ Zîim kâng ńkyí ba/mû ba/tángê ǒ ne eringe nyí a/jwo kánkyí. Chi eringe kyi/sét, a-mîng byibî eyên. Â wo a*fí a-jwóbê ng* me n/chi m-bâ n-kâm ǒ wǎ onet-kajii, ne aa*ba/chi a-nyît nang nkéré mú n/chi m-bâ*.

⁴ Nké boǒnyín-banet ké burwám enen ányi ké Sádyis baa/tî byídí enen kpárádádát. Ben ba/chi ba-cen ne me ké kyikû ne byídí kpárádádát ké byiko, ké ebóng, ben ba/kwárê mú badacen ne me.

⁵ Me n/chi n-fé banet ḿbé ba/kpógê byídí ké byiko wǎ ḿbyín kpárádádát, ne me mm*ba/chi n-fîm azîn ebe ké nwet mú banet ḿbé badakpen ne banyá*. Me n/chi n-sét wááng ké bushú ḿbú Bonchí ejí ne ké ḿbú barím emen n/fu, mbé ba-chi i banet ḿbé ejí.

⁶ Nang yeě mú mu ne atông kâng ofwôo o-jwo ńkyí Busun-Osówo mbu bu-sét ng banet-ékwâbashi nyí Karâs.

Wǎn-Osówo o/twóm Kyitwóm o-kye Banet-Ékwâbashi nyí Karâs ḿbé mbe ké Fyiladéfya

⁷ Sáng a-kye orím mú onong mú banet-ékwâbashi nyí Karâs ḿbé mbe ké Fyiladéfya a/fu, nyín něen kyitwóm ńkyí kyi/fím ne nyǐ mú mu kanong ne oyén óyenê, mú mu o-níbî ng agbókóró nyí Otu Dívit, mú mu o-bâa ng eringe nyí onet nang obónge oo*man ecít* mú mu o-cít ng eringe nyí onet nang obónge oo*man ebâa*.

⁸ Me mu n-nyît ng ńkyí amu a-chi i. Me mu n-nyît ng n/fu, wo amu ne kaǎnyín-busa. Wo aa/chi eringe nyí me n/tángê, ne aa/kye mě ofê. Me mm/bâa dyifyi n-tî ǒ ńdyí onet nang obónge oo*man ecít*.

⁹ Fwôo atông a-jwo kyi-kim ne banet-ncibi mú Sátan, bansêt byisédéng ámbe ḿbé mbe ba-sét ng ba/fu, mbé ba-chi i banet-Jûs, nké mbé *chí banet-Jûs*. Me n/chi n-chi kámbé ba-ba-bwom ǒ ké bushú, ba-tíngê kyísí ké byiká eyên ba-kye ǒ ofê. Mbé ashí amúmú ba/chi ba-nyît ba/fu, wo amu a-jê ng mě.

¹⁰ Me n/chi n-tî ǒ kanong ké nkéré mú afaníkong nyí nyi a-bâ eróng ejíí emúmú, eringe nyí adakan kángkáng banet ḿbé ké ejíí, ké ebóng, wo aa/tî busa ejí ḿbú n/kye n/fu, ryí ofit.

¹¹ Me mu m-bâ abeabe. Tî ńkyí amu ne nkyí kanong kanong, eringe onet nang obónge oo*ba/chi o-bam ǒ o-koo eyáré eyên nyí a/kpógê*.

¹² Me n/chi n-chi onet mú o/kpógê o-firi kyikwap ké kafâ-kiǐtí-kyise-kyifen-Osówo echi ńkyí Osówo ejí, ne onet ámu oo*ba/chi o-chîmîng kánkyí ne banyá*. Me n/chi n-sáng ǎ dyizîn ńdyí Osówo ejí ne ńdyí oshê mú Osówo ejí ké byiko, ányi Jerúsélem mú ofyîfî, mú o/chi o-fím kyíbóng ké abwô nyí Osówo ejí o-bâ kyísí. Me n/chi n-sáng ǎ to dyizîn ejí ńdyí dyifyîfî ké byiko.

¹³ Nang yeě mú mu ne atông kâng ofwôo o-jwo ńkyí Busun-Osówo mbu bu-sét ng banet-ékwâbashi nyí Karâs.

Wǎn-Osówo o/twóm Kyitwóm o-kye Banet-Ékwâbashi nyí Karâs ḿbé mbe ké Lehodyisáya

¹⁴ Sáng a-kye orím mú onong mú banet-ékwâbashi nyí Karâs ḿbé mbe ké Lehodyisáya a/fu, nyín něen kyitwóm ńkyí kyi/fím ne nyǐ mú odabángê Kyi/bát Kyikyú Éné, mú mu o-kyâ Osówo ofê, ne mu ntûesé mú ntûntû. Nyǐ mú mu kiimkpet kyikû kángkáng byěm ḿbyí Osówo o/chi.

¹⁵ Me mu n-nyît ng n/fu, wo a*fí a-kyâ mě ofê kerededet* onê to a*da mě ené*. Kyi-nyîn n mě kyi-shwôm ńkyí ada mě ekye ofê kerededet, nang ńkyí ada mě ené kángkáng.

¹⁶ Nké ké amu otyém ótyem, me n/chi n-né ǒ kángkáng.

¹⁷ Ké ebóng, wo amu a-raa ng a/fu, me mu ne esang, ne ka/nwa mě. Me mu ne kángkáng byěm ḿbyí me mu n-ryuu ng. Nké wo a*fí a-nyît ng eringe nyí wo amu a-kpú u byiko* ne amu a-chi i bafip*. Wo amu kyikpu, amu osíndyíbang, ne amu to achi kpínkpín.

¹⁸ Nké me mu n-kyâ ǒ bacê kâng n/fu, ré gûl ne me, gûl oyén óyenê, eringe a/chi a-firi ne esang. Ré to byídí ḿbyí kpárádádát ḿbyí adakûnap byiko eyên, a-cít osíndyíbang eyên mú éshwân. Ré to bukye ḿbú adafé ké achi eyên, eringe nyí adakûri.

¹⁹ Me mu m-bîn n kángkáng banet ḿbé mbe ba-jê ng mě, ne mu n-tángê e to kámbé dyishí. Tigi ne busa kâng, byiko byikpú ǒ, a-mîng byibî eyên.

²⁰ Fwôo atông a-jwo. Me m/bwom ké dyifyi n-kíbî. Nang yeě mú o/jwo ejá ejí ne o-kuu mě dyifyi, me n/chi m-bâ ké kafâ-kyise emen byi-ryí byiryíng burwám.

²¹ Me n/chi n-kye banet ḿbé ba/kpógê busa ḿbú badakyú ne me fáráng ké kakyúng-butu ejí wǎ eringe nyí me mm/kpógê, ne kántîk n-kú n-kyú u fáráng ne Bonchí ejí ké kakyúng-butu emen.

²² Nang yeě mú mu ne atông kâng ofwôo o-jwo ńkyí Busun-Osówo mbu bu-sét ng banet-ékwâbashi nyí Karâs.