Revelíshon 22 - Bokyi Bible

¹ Orím mú onong ámu to o/tông mě kace ńké omu mú odakye dyikpen, ńké nke ka-cé ng kpárám ka-san n wǎ éyên, ńké nke ka-fím m ké kakyúng-butu ńké Osówo ne Wǎn-Etám-Ebû,

² ne nke ka-sen n ka-jâ busyísen ké otyém-ótíbingé-oshê ámu. Asín-byichí nyí adakye dyikpen a/mû ké bakô-kace ánke nyí nyi a-zím m byirim kampén diǐkpú ne kafee ké dyije dyibónge, kabónge ké otukáku. Ne eshǎan ebe nyi nyí badachi banet ḿbé ké ejíí ba-nyange.

³ Aa*ri chwǒm nang kyibónge ké kafâ-oshê ámu ńkyí Osówo o/shú kánkyí*. Kakyúng-butu ńké Osówo ne Wǎn-Etám-Ebû nké ka/chi ka-kyú ké oshê ámu, ne bǎmgbán-Osówo ba/chi ba-kye ǎ ofê.

⁴ Ba/chi ba-ri bushú emen, ne o/chi o-sáng dyizîn emen ké bambwô ebe.

⁵ Buchú boo*ba/chi bu-chîjí* ne mbé baa*ba/chi ba-chîryuu etyuryíkáng nang kiinwángé ńkyí óbyísû* ké nǎ, Osówo Óburúkpâbí o/chi o-firi kiinwángé ebe, ne mbé ba/chi ba-kyú wǎ batu ne banyá ne banyá.

Obê mú Jisos

⁶ Ne orím mú onong ámu o-sét mě o/fu, byiraa ḿbyín mbyi ntûntû, ne a-man n efé dyityém eyên ké mbyí. Ne Osówo Óburúkpâbí mú mu o-kyâ bamkpábé ḿbé badasét byiraa emen Busun emen o/twóm orím emen mú onong o/fu, oba-tông bǎmgbán emen ńkyí kyi/chi kyi-man kyi-chi abeabe.

⁷ Jisos o-raa o/fu, fwôo n̂g atông ba-jwo. Me mu m-bâ abeabe. Bunyîn-dyityém mbu ne banet ḿbé mbe ba-tî ng byiraa ḿbyí bamkpábé ḿbé badasét byiraa-Osówo, ḿbyí ba/sáng ké nwet mún.

⁸ Me Jǒn nn/jwo, ne nn/ri kángkáng byěm ḿbyín. Ne ké nkéré mú nn/jwo ne nn/ri kámbyí kpók, m/myii kyísí ké byiká ḿbyí orím mú onong ámu mú o/tông mě byěm ḿbyín n/fu, n-kyâ ǎ ofê.

⁹ Nké o/raa ne me o/fu, wo aa*man a-chi éné*. Me n-chi i orî-ḿgbán eyên ne mú barî-banet eyên ḿbé mbe bamkpábé ḿbé badasét byiraa-Osówo ne mú kángkáng banet ḿbé mbe ba-tî ng byiraa ḿbyí mbyi ké nwet mún. Kye Osówo ofê.

¹⁰ Ne o-raa ne me o/fu, *dachi a-tî byiraa-ekpábé ḿbyín ké kadip* ké nǎ, nkéré oo/fárâng mú kángkáng byěm ḿbyín byi/chi byi-chi.

¹¹ Nang yeě nké mu kyibî o-man o-chi kyibî o-ca kashú, ne nang yeě nké mu ne babat o-man o-ca kashú ne babat. Nang yeě nké mu kanong o-man o-chi kanong o-ca kashú, ne nang yeě nké o/nwa o-shwôm ké bushú ḿbú Osówo o-man o-nwa o-ca kashú.

¹² Jisos o-raa o/fu, fwôo n̂g atông ba-jwo. Me mu m-bâ abeabe. N/chi m-bâ ne eyáré ejí nyí ndakye nang yeě nang yeě ké eringe nyí onet ámu oo/chi.

¹³ Me n-chi i Mbwôp Kashú ne Nryî Esim, Kiimkpet Kyikû ne Nkuli Kyikû.

¹⁴ Bunyîn-dyityém mbu ne banet ḿbé mbe ba-soo ng ágbádá ebe a-cé, eringe nyí mbé badaman eryí kyirim-kyichí ńkyí kyi/fím ké kyichí ńkyí kyidakye dyikpen, ne eringe nyí badaman eshwôm ké ecím-afyi ba-nung ké oshê ámu.

¹⁵ Nké ké esim-oshê ámu, a-ri ng bancen ne byěm-ociring ne banet ḿbé mbe ba-chi i bambirirím ne ḿbé mbe ba-chi i byibî-byěm kyi-kim ne banet erí ne ḿbé mbe ba-ju ng banet. A-ri ng to banet ḿbé mbe ba-sháng ng bakye ne banet ḿbé mbe bansêt byisédéng ké ejá ne ké byěm echi.

¹⁶ Me Jisos nké nn/twóm orím mú onong ejí n/fu, oda-sét byěm ḿbyín ké byise-ékwâbashi ejí. Me onet mú o/fím ké kyikû-banet ńkyí Otu Dívit. Me n-chi i ókpére-dyicófóróng mú ragerage.

¹⁷ Busun-Osówo ne onyinyi ámu mú mu o-bé ng dyibé ba/raa ba/fu, bâ kâng, ǎ Kyítá. Nang yeě nké mu o-jwo ng ńkyín o-man o-raa o/fu, bâ kâng. Nang yeě mú omu mu o-jê ng ǎ, mú mu o-ryuu ng kámú, obâ o-koo omu mú odakye dyikpen wǎ eyáré.

Nkuli Kyikû

¹⁸ Me Jǒn mu n-kuri ng nang yeě mú mu o-jwo ng byiraa-ekpábé ḿbyí mbyi ké nwet mún ekó kanong kanong. Â nang yeě nké mu o-sû ng nang chwǒm kyibónge ké mbyí, Osówo o/chi o-sû busông ḿbú ba/sáng ké nwet mún ké afaníkong emen.

¹⁹ Nké â nang yeě nké mu o-fîm m nang chwǒm kyibónge ké byiraa-ekpábé ḿbyí ké nwet mún o-twóp kú, Osówo o/chi o-koo ǎ kyirim-kyichí emen ńkyí kyi/fím ké kyichí ńkyí kyidakye dyikpen ne oshê emen mú o/já Osówo, ḿbyí ba/sét byi-kim ne mbyí ké nwet mún.

²⁰ Nyǐ mú mu o-sét ng kyi-kim ne kángkáng byěm ḿbyín o/raa o/fu, nkyi éné ntûntû. Me mu m-bâ abeabe. Kyi/bát kyikyú éné. Bâ, ǎ Jisos, Otu Kyítá.

²¹ Kyi/bát ochwâp mú Jisos, Otu Kyítá okyú ne kángkáng banet.