Revelíshon 21 - Bokyi Bible

Bubóng ḿbú Bufyîfî ne Esí to nyí Efyîfî

¹ M-bwa n-chîtún n-ri kâng bubóng ḿbú bufyîfî ne esí to nyí efyîfî. Ké ebóng, bubóng ḿbú mbwôp kashú ne esí to nyí mbwôp kashú bii/rím, kace to ka*fí to*.

² Ne n-ri oshê mú o/já Osówo, ányi Jerúsélem mú ofyîfî ké oo/fím kyíbóng ké kyikit ńkyí Osówo mu, o-byí i o-bâ. Oo/kpá byiko wǎ onyinyi mú o-kú o-bâ ebabé dyibé, mú oo/nap byiko ḿbyí odakâm otyép emen.

³ N-jwo ejá nyí e/fím ké kakyúng-butu e-raa kakânkakân e/fu, kántîk, oshê mú Osówo o/firi kyikit kyibónge ne banet. Osówo o/chi o-kûkyú ne mbé, ne banet ba/chi ba-firi ḿbé emen. Osówo nyǐ oyén o/chi o-kûkyú ne mbé, ne nyǐ o/chi o-firi to Osówo ebe.

⁴ Nyǐ o/chi o-shî kámbé kángkáng batíí ké achi. Bukyû ekpú ne bafip eri ne bukyû etii ne bubân ejwo bii*ba/chi byi-chîkyú*. Byěm ḿbyí kpákpá byi/chi byi-man.

⁵ Nyǐ kâng mú mu o-kyú u ké kakyúng-butu o-raa o/fu, kántîk, n-chi i kángkáng byěm byi-firi ḿbyí byifyîfî. Nyǐ o-sét mě to o/fu, sáng ńkyín kyísí, ké ebóng, byiraa ḿbyín něen mbyi ntûntû, ne onet o-man n efé dyityém emen ké mbyí.

⁶ Ne o-raa o/fu, kii/chi. Me n-chi i Mbwôp Kashú ne Nryî Esim, Kiimkpet Kyikû ne Kiinkuli Kyikû. Nang yeě nké omu mu o-jê ng ǎ, me n/chi n-kye ǎ omu dyikáá o-jwáp mú o/fím ké kace ńké nke ka-byí i ké mbwo, ńké nke ne omu mú odakye dyikpen.

⁷ Nang yeě nké o/kpógê o/chi o-koo eyáré ne me nyí me n/chi n-firi Osówo emen ne nyí nyǐ o/chi o-firi wǎn ejí.

⁸ Nké kyikit ńkyí banshî bushî, ne banet ḿbé ba*da/fé dyityém ne Osówo* ne bancen ne byěm-ociring ne banju banet ne banchi byibî-byěm kyi-kim ne banet erí ne banet ḿbé mbe ba-chi i bambirirím ne ḿbé mbe ba-fâ erím-bakye ne kángkáng bansêt byisédéng, kyi-chi i kiǐdé ńkyí nkyi kyi-mang ng kyibî-okwâ ne aká nyí aa/sóng okwâ a-bwam shéét, ńkyí nkyi nnyinyěng-bukyû.

Oshê-Jerúsélem mú Ofyîfî

⁹ Orím mú onong ké burwám-barím ḿbé banong ámbe káchâtkányi ḿbé ba/mû ne acáng káchâtkányi pwat ne bankuli kyikû-byěm-busông káchâtkányi o/bê o-kâm mě, ne o-raa o/fu, bâ ne n/chi n-tông ǒ onyinyi mú o/bé dyibé, onyi-Wǎn-Etám-Ebû.

¹⁰ Ké nkéré me n/firi ké busa ḿbú Busun-Osówo, orím mú onong ámu o-kúng mě byi-wâa kyíbóng-kaku ńké ka/nyâam kanong kanong. O-tông mě Jerúsélem, oshê mú o/já Osówo, ké oo/fím kyíbóng ké kyikit ńkyí Osówo mu, o-byí i o-bâ.

¹¹ O-san n ne busan-Osówo ḿbú ragerage. Oshê ámu o-san n wǎ buká ḿbú kpárádádát ne wǎ buká ḿbú ragerage, ne o-cé ng wǎ omu.

¹² O/mû ne kiimbâng-ekpe ńkyí kyi/nyâam kyíbóng kyíbóng, ńkyí ba/bi ba-wáp kámú ba-fé ké kafâ, ne afyi diǐkpú ne afee, ne barím ḿbé banong to diǐkpú ne bafee ḿbé mbe ba-bám m afyi ányi. Ké afyi ányi, ba/sáng azîn nyí byikû-banet ḿbyí Ézerel diǐkpú ne byifee.

¹³ Afyi a/mû achât achât ké kyicê-ekpe nang kyirá. Achât ké kyicê ńkyí bubwô-etyebéng, achât ké kyicê ńkyí bubwô-eku, achât ké kashú, ne achât to ké esim.

¹⁴ Ekpe nyí oshê-Jerúsélem ba/bi kányí twóóm kyíbóng-aká diǐkpú ne afee, nyí ba/sáng to azîn nyí banet-kyitwóm-Wǎn-Etám-Ebû diǐkpú ne afee ké nyǐ.

¹⁵ Orím ámu mú o/raa ne me o/mû ne ochí mú ba/chi ké gûl mú badakan byěm, o/fu, nyǐ o-kan n oshê-Jerúsélem ne afyi emen ne ekpe.

¹⁶ Oshê o/mû kerededet kerékeré, butang jangjang ne baryên. Orím mú onong ámu o/kan oshê ámu ne ochí emen mú byěm ekan. O/mû o/kwóp égot-bakyilómyíta diǐkpú ne efee. Ne baryên ne bunyâam byi/mû wǎ eringe nyí o/kwóp.

¹⁷ Orím mú onong ámu o/kan to ekpe, ne e/mû bajam-bamyíta nyâchât esim diǐkpú ne bafee ké bunyâam, ké ochíchí-chwǒm ńkyí banet badakan byěm ńkyí nyǐ o/mû o-kan n byěm.

¹⁸ Ba/bi ekpe ányi ké aká nyí adashwane kasî, nyí badakó kányí jásapa, ne ba/yip gûl oyén óyenê mú mu o-san n wǎ éyên ba-bi oshê ámu oyén.

¹⁹ Ba/yip kángkáng azong-aká nyí adashwane kasî ba-bi kyikû-ekpe nyí e/wáp oshê ámu e-fé ké kafâ. Mbwôp kashú-buká-kyikû-ekpe bu/mû buká ḿbú badakó jásapa, nnyinyěng bu/mû buká ḿbú badakó safára, ké achât, bu/mû buká ḿbú badakó ágat, ké anyii, bu/mû buká ḿbú badakó émárol,

²⁰ ké atánge, bu/mû buká ḿbú badakó ónik, ké nyâchât, bu/mû buká ḿbú badakó kanyílyan, ké káchâtkányi, bu/mû buká ḿbú badakó kwôt, ḿbú mbu bukwa búkwa, ké nyíryinyi, bu/mû buká ḿbú badakó búrol, ké kátángekányi, bu/mû buká ḿbú badakó tópas, ké diǐkpú, bu/mû buká ḿbú badakó kasyidónyi, ké diǐkpú ne din, bu/mû buká ḿbú badakó túkos, ké diǐkpú ne afee, bu/mû buká ḿbú badakó ámátyis.

²¹ Afyi ányi diǐkpú ne afee ba/chi ké aká diǐkpú ne afee nyí adashwane kasî. Ba/chi dyifyi nang dyirá ké buká bubónge ḿbú budashwane kasî. Ba/chi ótíbingé-oshê ámu ké gûl oyén óyenê, ne o/mû o-san n wǎ éyên.

²² Me n*da/ri kiǐtí-kyise-kyifen-Osówo echi ányi ké oshê ámu* ké nǎ, kiǐtí-kyise-kyifen-Osówo echi ńkyí oshê ámu, ányi Osówo Óburúkpâbí mú kángkáng busa, ne Wǎn-Etám-Ebû.

²³ Oshê-Jerúsélem o*fí o-ryuu ng o/fu, nang esû nang otukáku byikûsan ké mǔ*. Ké ebóng, busan-Osówo ḿbú ragerage mbu bu-san n ké mǔ, ne Wǎn-Etám-Ebû o-chi i otyuryíkáng mú emen.

²⁴ Banet ḿbé ké ejíí ba/chi ba-kûcen ké kiinwángé emen, ne batu ḿbé ejíí ba/chi ba-bâ ne efang ebe ké mǔ.

²⁵ Ecím-afyi nyí oshê ámu e/chi e-waa fúú kyirim-dyicí dyimúmú. Baa*ba/chi ba-cít kányí* ké nǎ, buchú boo*ba/chi bu-jí ányi*.

²⁶ Ba/chi ba-bâ ne butu ne efang nyí eshê nyí ké ejíí ké kafâ-oshê ámu.

²⁷ Nké chwǒm nang kyibónge ńkyí nkyi ké ociring kii*nung ké kafâ-oshê ámu*. Nang onet obónge to mú mu o-chi i byěm-ociring nang mú mu o-sét ng byisédéng oo*nung ké oshê ámu*. Banet nké nke ḿbé baa/sáng kámbé azîn ké nwet mú banet ḿbé badakpen ne banyá, mú Wǎn-Etám-Ebû nké ba/chi ba-nung ké kafâ-oshê ámu.