Revelíshon 2 - Bokyi Bible

Wǎn-Osówo o/twóm Kyitwóm o-kye Banet-Ékwâbashi nyí Karâs ḿbé mbe ké Éfyísus

¹ Sáng a-kye orím mú onong mú banet-ékwâbashi nyí Karâs ḿbé mbe ké Éfyísus a/fu, nyín něen kyitwóm ńkyí kyi/fím ne nyǐ mú mu o-níbî ng ékpére káchâtkányi ké bubwô-etyebéng emen, mú mu o-cen n o-bám m byichí káchâtkányi ḿbyí badatwôom etyuryíkáng, ḿbyí ba/chi ké gûl.

² Me mu n-nyît ng ńkyí wo aa/chi. Me mu n-nyît ng eringe nyí wo aa/chi bǎmkpóngé ne busa, ne eringe nyí aa/ryí ofit. Me mu n-nyît ng n/fu, wo aa*bángê byibî-banet byi-kim ǒ*. Mu n-nyît ng to n/fu, wo aa/kan banet ḿbé mbe ba-sét ng ba/fu, mbé ba-chi i banet-kyitwóm-Jisos, nké mbé *chí mbé* ne aa/ri a/fu, mbé ba-chi i bansêt kyisédéng.

³ Wo amu a-ryí i ofit, ne aa/ri afaníkong ké dyishí ejí, ne a*da/kyee ne*.

⁴ Nké ńkyí kyi*fí kyi-nyîn n mě ne wo* nkyi něen. Me n*fí to n-jê ng ǒ kántîk* wǎ eringe nyí m/mû n-jê ng ǒ kpákpá* wǎ eringe nyí m/mû n-jê ng ǒ ké nkéré mú mbwôp kashú*.

⁵ Zîim eringe nyí wo aa/róng a-tíbî. Mîng byibî eyên, a-kûchi ńkyí a/mû a-chi i ké nkéré mú mbwôp kashú. Â wo a*da/mîng byibî eyên* me n/chi m-bâ n-kâm ǒ, m-ba-yip kyichí eyên ńkyí badatwôom otyuryíkáng n-dim ne nkyí.

⁶ Nké ńkyí nkyi kyi-nyîn n mě ne ben nkyi něen. Ńkyí banet-ncibi mú badakó Nyíkólus mbe ba-chi i kyi*fí kyi-nyîn n ǒ* wǎ eringe me to kyi*fí kyi-nyîn n mě*.

⁷ Nang yeě mú mu ne atông kâng ofwôo o-jwo ńkyí Busun-Osówo mbu bu-sét ng banet-ékwâbashi nyí Karâs bu/fu, banet ḿbé ba/kpógê nké n/chi n-kye kámbé busa ḿbú badaryí byirim-kyichí ńkyí kyidakye dyikpen, ńkyí nkyi ké kyifát ńkyí Osówo.

Wǎn-Osówo o/twóm Kyitwóm o-kye Banet-Ékwâbashi nyí Karâs ḿbé mbe ké Simóna

⁸ Sáng a-kye orím mú onong mú banet-ékwâbashi nyí Karâs ḿbé mbe ké Simóna a/fu, nyín něen kyitwóm ńkyí kyi/fím ne nyǐ mú mu Mbwôp Kashú ne Nryî Esim, mú o/kpú ne o-chîkpen.

⁹ Me mu n-nyît ng afaníkong eyên. Me mu n-nyît ng n/fu, wo amu kyikpu. Nké ké ntûntû, wo a-chi i nfang-onet. Me mu n-nyît ng byibî-byěm ḿbyí banet ḿbé ba/fu, mbé ba-chi i banet-Jûs mbe ba-sét ng ba-bât ng ǒ. Nké mbé *chí banet-Jûs*. Mbé ba-chi i banet-ncibi mú Sátan.

¹⁰ *Dachi a-shî nang chwǒm kyibónge ńkyí wo amu a-bâ afaníkong eri ké nkyí*. Fwôo atông a-jwo. Otu-Byibî-Barím o/chi o-chi banet ba-fé kyicê-banet eyên kyikíri ké mgbokobá, eringe nyí nyǐ oda běn ekan. Afaníkong eyên a/chi a-rí ací diǐkpú. Waa ké ofê eyên mú amu a-kyâ mě, nang kyi/bwa kyi-byí bukyû ekpú, ne me n/chi n-kye ǒ eyáré nyí dyikpen.

¹¹ Nang yeě mú mu ne atông kâng ofwôo o-jwo ńkyí Busun-Osówo mbu bu-sét ng banet-ékwâbashi nyí Karâs bu/fu, banet ḿbé ba/kpógê, nnyinyěng-bukyû oo*ba/chi o-ta kámbé*.

Wǎn-Osówo o/twóm Kyitwóm o-kye Banet-Ékwâbashi nyí Karâs ḿbé mbe ké Pégámum

¹² Sáng a-kye orím mú onong mú banet-ékwâbashi nyí Karâs ḿbé mbe ké Pégámum a/fu, nyín něen kyitwóm ńkyí kyi/fím ne nyǐ mú mu ne kashwám ńké kadanen esim emúmú.

¹³ Me mu n-nyît ng kyikit ńkyí wo amu a-kyú u. Amu a-kyú u ányi ké kyikit ńkyí Sátan mu ne kakyúng-butu emen. Wo amu a-níbî ng dyizîn ejí shwaneshwane, ne wo a*da mě ené* ké ofê eyên mú amu a-kyâ mě* nang ké nkéré mú ba/ju Ántyípas ké kyikit ńkyí Sátan mu o-kyú u*. Ántyípas mú o/mû ntûesé ejí, ne o/mû o-kyâ mě ofê.

¹⁴ Nyín něen boǒnyín-byěm kyi-kim ne wo ḿbú bu*fí bu-nyîn n mě*. Kyicê-banet mbe ányi ne wo ḿbé mbe ba-chi i byěm ḿbyí Bálim o/mû o-tángê e. Mú o/tángê Otu Bálek bukwóp ḿbú odachi banet-Ézerel ba-chi kyibî ké byiryíng ḿbyí ba/ryí ḿbyí ba/chi kyifen ba-kye erím-bakye ne ké byibî-babép ebép.

¹⁵ Ké dyizong-bukwóp ámbu, wo to amu ne banet ké burwám eyên ḿbé mbe ba-chi i byěm ḿbyí banet-ncibi mú Nyíkólus mbe ba-tángê e.

¹⁶ Mîng kâng byibî eyên. Â kyi*fí éné* me n/chi m-bâ n-kâm ǒ kántîk, m-ba-nwa ne banet ámbe ne kashwám ńké nke ka-byí i mě ké ocím.

¹⁷ Nang yeě mú mu ne atông kâng ofwôo o-jwo ńkyí Busun-Osówo mbu bu-sét ng banet-ékwâbashi nyí Karâs bu/fu, banet ḿbé ba/kpógê nké me n/chi n-kye kámbé berêt mú badakó mána mú mu rôorôo. Me n/chi n-kye to nang yeě nang yeě ké burwám ebe buká ḿbú kpárádádát bubónge bubónge, ḿbú ba/sáng dyizîn ńdyí dyifyîfî ké mbú, ńdyí onet nang obónge o*fí o-nyît ng* kyi-cibi ne nyǐ mú mu o-koo ng kámbú*.

Wǎn-Osówo o/twóm Kyitwóm o-kye Banet-Ékwâbashi nyí Karâs ḿbé mbe ké Tayatára

¹⁸ Sáng a-kye orím mú onong mú banet-ékwâbashi nyí Karâs ḿbé mbe ké Tayatára a/fu, nyín něen kyitwóm ńkyí kyi/fím ne Wǎn-Osówo mú achi emen nyi a-bwam m wǎ amánge-okwâ, mú byiká emen mbyi byi-san n wǎ kiǐré ńkyí baa/shí.

¹⁹ Me mu n-nyît ng ńkyí amu a-chi i. Me mu n-nyît ng kyijé ńkyí wo amu ne nkyí. Mu n-nyît ng ofê eyên mú amu a-kyâ Osówo, ne byitwóm eyên ḿbyí amu a-bángê e, ne ofit eyên mú amu a-ryí i. Me mu n-nyît ng n/fu, wo a-kú a-chi i kántîk a-shwôm ńkyí a/mû a/chi mbwôp kashú.

²⁰ Nké chwǒm ńkyí kyi*fí kyi-nyîn n mě ne wo* nkyi něen. Wo amu a-mîng ng onyinyi ámu mú odabángê Jézébel o-kó ng byiko emen mkpábé mú odasét byiraa-Osówo. Nyǐ mu o-tángê e bǎmgbán ejí byibî-akwóp, ne mu o-chi i kámbé ba-bép byibî-babép, ba-ryí i byiryíng ḿbyí ba/sháng bakye.

²¹ Me nn/kye ǎ nkéré n/fu, byiko byikyú ǎ o-mîng byibî emen, nké nyǐ o*fí o-ryuu ng o/fu, nyǐ o-mîng ng byibî-babép emen ebép*.

²² Ké bubwô ámbu, me n/chi n-twóp ǎ ké karíng ńké nyǐ ne banet ḿbé mbe ba-chi i kyinam ne nyǐ ba/chi ba-ri busông kanong kanong. Ńkyín n/chi n-chi kántîk, â ba*da/saa byiko ba-mîng byibî-byěm ḿbyí mbé ba/chi ne nyǐ*.

²³ Me n/chi n-ju to kángkáng banet emen ḿbé ba/bángê ne nyǐ. Ne kángkáng banet-ékwâbashi nyí Karâs ba/chi ba-nyît ba/fu, me n-chi i nyǐ mú mu o-nyît ng atyém nyí banet, ne byěm ḿbyí mbe ba-ryuu ng. Me n/chi n-ré běn dyifwá ké onet ké onet eringe nyí nang yeě nang yeě o/chi bǎmkpóngé.

²⁴ Nké ben banet ḿbé ba/waa ḿbé mbe ké Tayatára ba*da/chi byibî-byěm ḿbyín* ḿbyí mbe ba-tángê e*. Ben ba*da/kwâa ńkyí banet ḿbé áku mbe ba-kó ng byěm ḿbyí ké kadip kyi-kim ne Sátan*. Me mu n-sét ng běn n/fu, me mm*ba/chi n-chî běn ekye afaníkong akíri*.

²⁵ Nké ba-man ba-níbî ńkyí bamu ne nkyí kíngkíng tete me m-bâ.

^26-28 Me n/chi n-kye banet ḿbé ba/kpógê ḿbé mbe ba-chi i ńkyí me mu n-ryuu ng ba-câ kashú tete ké nkuli kyikû-nkéré dyizong-busa dyibónge ńdyí me n/koo ne Bonchí ejí. Me n/chi n-kye kámbé busa ḿbú eshê nyí ké ejíí edafiri ké bubwô ebe, eringe nyí badaníbî kányí ne ochí-kiǐré, ne eringe nyí badasé kányí boǒcê boǒcê wǎ katí-ecing. Me n/chi n-kye to kámbé ókpére-dyicófóróng.

²⁹ Nang yeě mú mu ne atông kâng ofwôo o-jwo ńkyí Busun-Osówo mbu bu-sét ng banet-ékwâbashi nyí Karâs.