Revelíshon 19 - Bokyi Bible

¹ Ké nkéré ńkyín kii/shwôm, n-jwo chwǒm éné wǎ ejá kyíbóng kyíbóng nyí bujê-banet ḿbé mbe kyíbóng nyi e-raa ng e/fu, kpee n̂g Osówo. Onyii ne busan ḿbú ragerage ne busa byi/já Osówo eten.

² Ké ebóng, bampan emen ḿbé mu o-pan n mbe ntûntû ne ba/kwárê. Nyǐ oo/két mpan o-bên kiǐtí-onyinyi-akpara ámu mú o/mû o-bên n ejíí ké akpara emen. Osówo oo/kye ǎ busông, ké nǎ, o/ju ǎ bǎmgbán.

³ Ba-chîwonge ba/fu, kpee n̂g Osówo. Erúkwâ nyí nyi e-byí i ké okwâ mú mu o-shí i kiǐtí-oshê ánkyi e-yú u e-jâ kyíbóng ne banyá ne banyá.

⁴ Bachíkpi ámbe bujam ne banyii ne biǐnyám ámbyi byinyii kángkáng ba/myii kyísí ba-kye Osówo mú o/mû me ké kakyúng-butu ofê, ne ba-raa ba/fu, kyi/bát kyikyú éné. Kpee n̂g Osówo.

Dyijî-Dyibé ńdyí Wǎn-Etám-Ebû

⁵ Ne ejá e-fím kâng ké kakyúng-butu e-raa e/fu, ben kángkáng mú bamu bǎmgbán-Osówo ne kángkáng banet, cibicibi ne ben mú bamu biǐtí ne ben ḿbé ba*fí biǐtí* ḿbé bamu ba-shî ng Osówo, kye n̂g Osówo eten akpee.

⁶ Ne n-jwo chwǒm ńkyí kyi/raa éné wǎ ejá nyí bujê-banet, wǎ kyirime-kiimbâng-kiintîm puupuu, wǎ etare nké e/sá kakânkakân. N/jwo kámbyí mbyi byi-raa ng byi/fu, kpee n̂g Osówo. Ké nǎ, Osówo Óburúkpâbí mú o/rêe o-shwôm nké mu Otu.

⁷ Bâ n̂g byi-jêe byi-kyú ké bunyîn-dyityém. Bâ n̂g byi-kye ǎ akpee ké butu emen. Ké nǎ, nkéré oo/fyi mú dyijî-dyibé ńdyí Wǎn-Etám-Ebû ne onyi emen mú odabé dyibé ne nyǐ oo/kpá byiko ké ndyí.

⁸ Ba/kye busa ba/fu, onap byiko emen ké byídí-okpówo ḿbyí mbyi kpárádádát byi-san n ragerage. Byídí-okpówo ámbyi byi-chi i édúú nyí kanong echi nyí banet-Osówo.

⁹ Ne orím mú onong ámu o-sét mě o/fu, sáng ńkyín a/fu, bunyîn-dyityém mbu ne banet ḿbé ba/kó kámbé ba/fu, babâ dyijî-dyibé ńdyí Wǎn-Etám-Ebû. Ne orím mú onong ámu o-chîraa o/fu, nyín ejá nyí ntûntû nyí Osówo.

¹⁰ M-myii kyísí n/fu, n-kyâ ǎ ofê. Nké o/raa ne me o/fu, *dachi a-chi éné*. Me n-chi i ónen-ḿgbán ne mú barî-banet eyên ḿbé mbe ba-sét ng wááng kyi-kim ne Jisos. Kye Osówo ofê. Ké nǎ, Busun-Osówo bubónge nké mbu bu-fâ ntûntû ké atyém nyí bantûesé ḿbé Jisos ne nyí bamkpábé ḿbé badasét byiraa emen.

Nyû ké Kiǐkpárádádát-Kabyî-Orá

¹¹ M-bwa n-chîtún kâng n-ri bubóng boo/bâa, ne kiǐkpárádádát-kabyî-orá ányi. Onet mú mu o-yú u kánké o-bángê e Ofê ekye ne Oyén Óyenê. Nyǐ mu o-pan n banet bampan ne mu o-nwa ng byití emen ké bukwóp ḿbú bu/kwárê.

¹² Achi emen a/mû a-san n éné wǎ bumang-okwâ, ne o/cít etam-butu chwóó ké dyishí. Nyǐ o/mû ne dyizîn ńdyí ba/sáng ǎ ké byiko. Nké onet o*fí mú odanyît kándyí* kyi-cibi ne nyǐ oyén*.

¹³ Ágbádá nyí nyǐ o/mû o/fé a/mû aa/cok baróng kángkáng. Dyizîn ńdyí mbe ba-kó ng ǎ dyi-bángê e Ejá nyí Osówo.

¹⁴ Barím ḿbé banong ḿbé mbe bannwa byití ḿbé kyíbóng mbe ne nyǐ ké kyikû, ké biǐkpárádádát-bubyî-orá, ne mbe ne byídí-okpówo kpárádádát ḿbyí mbyi kpárám ké byiko.

¹⁵ Kashwám ńké nke ka-nen n ka/byí ǎ ké ocím. Nké nké o/chi o-kúng o-kpógê eshê. O/chi o-firi Otu ebe, ne o-tún n kányí ne ochí-kiǐré. Ne nyǐ o/chi o-nwárê bato ba-byí ké dyibíng-byirim-byichí enwárê ba-chi bato ḿbé kiǐtí-kafâ esa ńké Osówo mú o/rêe o-shwôm.

¹⁶ Ba/sáng ké ágbádá emen ne ké kyiká emen ba/fu, Otu mú barî-batu ne Otu Kyítá mú barî-batu kyítá.

¹⁷ M-bwa n-chîtún kâng n-ri orím mú onong obónge ké óbyísû cip. O-wonge ké ejá kyíbóng kyíbóng o-kó kángkáng bunurung ḿbú mbu bu-byí i kyíbóng o/fu, bâ n̂g ba-ba-cibi kyikit kyibónge ké kiǐtí-dyijî ńdyí Osówo.

¹⁸ Bâ n̂g ba-ba-ryí enyam-byiko-batu ne nyí batu-ashí-basúja ne nyí basúja ne nyí bubyî-orá ne nyí banet ḿbé mbe ba-yú u kámbú ne nyí kángkáng banet, básóng ne ḿbé ba*fí básóng* nyí biǐtí-banet ne ḿbé ba*fí biǐtí-banet*.

¹⁹ M-bwa n-chîtún kâng n-ri kyibî-enyam ánkyi ne batu ḿbé ké ejíí ne bannwa byití ebe ké baa/cibi kyikit kyibónge ba/fu, mbé ba-nwa ng ne nyǐ mú mu o-yú u ké kabyî-orá ánke ne bannwa byití emen.

²⁰ Ba-kám kyibî-enyam ánkyi ba-fé ké mgbokobá, cibicibi ne mkpábé ámu mú odasét byisédéng, mú oo/chi byěm-akat ké bushú emen. Kyi/mû ké byěm-akat ámbyi nké nyǐ o/nîm banet ḿbé mbe ne ekap nyí kyibî-enyam ánkyi, ne ḿbé ba/kye orím-bukye-kyibî-enyam ánkyi ofê. Ba/twóp kyibî-enyam ánkyi ne mkpábé ámu bakpó ké kiǐdé ńkyí nkyi kyi-mang ng kyibî-okwâ ne aká nyí aa/sóng okwâ a-bwam shéét.

²¹ Ba/ju bannwa byití ebe ké kashwám ńké nke ka-byí i ké ocím mú nyǐ mú mu o-yú u ké kabyî-orá. Ne kángkáng bunurung bu/ryí kángkáng byikwóm-enyam-byiko eringe nyí budaman eryí.