Revelíshon 18 - Bokyi Bible

Orím mú Onong o/fu, Bábyílon oo/róng

¹ Ké nkéré ńkyín kii/shwôm, n/ri orím mú onong okíri ké o/fím kyíbóng mu o-shû ng o-bâ. O/mû ne kiǐtí-busa, ne busan emen bu/san ejíí emúmú.

² O-wonge ne ejá kyíbóng kyíbóng o/fu, Bábyílon oo/róng. Kiǐtí-oshê-Bábyílon kii/róng. Kántîk o/firi kyikit ńkyí byibî-bací ne kángkáng byibî-barím ne kángkáng bunurung ḿbú boo*nwa* byi-kú byi-kyú u.

³ Ké ebóng, mǔ oo/kye kángkáng azong-banet bato emen, ne o-chi kámbé ba-jwáp bato emen ámbe ḿbé akpara emen. Batu ḿbé ejíí ba/rí ne onyinyi-akpara ámu, ne banet-busî ecen ḿbé ké ejíí ba/firi banfang-banet ké babép emen ebép ḿbé oo*kám byiko*.

⁴ Ne n-jwo kâng ejá ekíri nyí e/fím kyíbóng ké nyi e-raa ng e/fu, banet ejí, byí n̂g kyíjí. Byí n̂g kyíjí ba-mîng kámú. Baa*man ba-kyú ne abwô ké byibî emen*. Baa*man ba-ri busông ne mǔ ké kyikû*.

⁵ Ké ebóng, byibî emen bii/sú dyibwôm nyáám wǎ bubóng, ne Osówo mu o-zîim m byibî-akwóp emen.

⁶ Chi n̂g kámú kerededet wǎ eringe nyí mǔ o/chi běn. Só n̂g kámú kampén kafee kyi-shwôm ńkyí mǔ oo/chi. Fé n̂g kámú bato ḿbé mbe ba-shwane e kampén kafee ba-shwôm ḿbé mǔ o/kye běn.

⁷ Kye n̂g kámú busông ne bafip chwóó wǎ akpee ne byěm-bunyîn-dyityém ḿbyí o/kye byiko emen. Ké nǎ, kángkáng nkéré, mu o-sét ng byiko emen o/fu, me onyinyi mú mu otu nké mu nyín me. Me *chí onyǐnkú*. Me mm*ba/chi n-ri bafip*.

⁸ Ké bubwô ḿbún, byirwóm ne bafip ne esong ḿbyí mbyi byibî-afaníkong emen byi/chi byi-bam kámú dyicí dyibónge. Ba/chi ba-shí kámú ké okwâ. Ké nǎ, Osówo Óburúkpâbí mú mu o-pan n kámú mpan o/rêe o-shwôm.

⁹ Batu ḿbé ké ejíí ḿbé mbe ne bubwô ké akpara emen ne babép emen ba/chi ba-tii ba-ta dyikán ké bubwô-oshê ámu, ké nkéré baa/ri arúkwâ nyí okwâ mú mu o-shí i kámú.

¹⁰ Mbé ba-bwom m tíbítíbí, ké nǎ, mbé mbe ba-shî ng busông emen, ba-raa ba/fu, kyi/bên kyi-shwôm. Kii*nwa eri*. Kiǐtí ne kiimbâng-oshê mún mú Bábyílon. Ké kyikim-nkéré kyibónge nké mpan eyên oo/ribi.

¹¹ Banet-busî ecen ḿbé ké ejíí to ba-tii ng, ba-ta ng dyikán ké dyishí emen. Ké nǎ, onet o*fí to nang obónge mú mu o-chî ng eré byěm ebe*.

¹² Onet o*fí nang obónge mú mu o-ré ng atû-bagûl ebe ne nyí basyílyíba ne nyí aká nyí adashwane kasî* ne nyí byibwáng ḿbyí byidashwane kasî* ne nyí byídí-okpówo* ne nyí byídí ḿbyí batu wǎ mbúket* ne ḿbyí shíshét* ne nyí kángkáng azong-byichí nyí adakaa* ne nyí kángkáng azong-byěm nyí ba/chi ké asháng-eshwa* ne ké byichí ḿbyí byidashwane kasî* ne ké biǐré-agut* ne ké biǐré ne ké aká nyí adanwa bunong*

¹³ ne nyí biintaa-kyichí ḿbyí badarám kasu* ne nyí bakút-kyinung* ne nyí burwan* ne nyí burwan ḿbú badakó mîi* ne nyí burwan ḿbú badakó faránkínsen* ne nyí bato ne bakút* ne nyí filáwa mú badachi berêt* ne nyí esang-byichí* ne nyí bampong* ne nyí ebû* ne nyí bubyî-orá* ne nyí bamútu ḿbé bampong badatut* ne nyí básóng* nang ne nyí basun ḿbé banet*.

¹⁴ Banet ḿbé mbe ba-cen n busî ba-raa ne mǔ ba/fu, kángkáng byěm ḿbyí byinong ḿbyí amu a-ryuu ng a/fu, byikyú ḿbyí eyên bii/rím, ne kángkáng efang eyên ne bunong eyên bii/tánê. Ne aa*ba/chi a-chîri kámbyí*.

¹⁵ Banet ḿbé mbe ba-cen n busî ḿbé ba/firi banfang-banet ké kasî ńké mbe ba-cen n ké oshê ámu ba/chi ba-bwom tíbítíbí, ké ebóng, mbé mbe ba-shî ng busông emen. Ba/chi ba-tii ba-ta dyikán,

¹⁶ ne ba-kûraa ba/fu, kyi/bên kyi-shwôm. Kii*nwa eri kyi-kim ne kiǐtí-oshê ámu*. O/mû o-fwam m efé byídí-okpówo ne ḿbyí butu ḿbyí mbyi shíshét ne mu o-fâ byěm-gûl ne byěm-aká nyí adashwane kasî ne byibwáng ḿbyí byidashwane kasî ké byiko byimúmú.

¹⁷ Ne kyikim-nkéré kyibónge kángkáng efang emen ee/tánê. Kángkáng banet-ashí-bǎmkpóngé-ńsukyíkang ne kángkáng banet ḿbé mbe ba-cen n ké mǔ ne kángkáng banet-bǎmkpóngé-ńsukyíkang ne kángkáng banet ḿbé áku ḿbé dyikpen ebe ndyi ké baya ḿbé baryên ba/bwom tíbítíbí

¹⁸ ba-wonge kakânkakân ké nkéré ba/ri erúkwâ nyí nyi e-shí i kámú, ba/fu, oshê okíri o*fí mú o/mû wǎ kiǐtí-oshê ńkyín*.

¹⁹ Ba-pwó ecing ké ashí ebe. Ba-tii ba-ta dyikán ba-raa ba/fu, kyi/bên kyi-shwôm. Kii*nwa eri kyi-kim ne kiǐtí-oshê ámu*. O-chi i oshê mú kángkáng banet ḿbé mbe ne bǎnsukyíkang ḿbé mbe ba-cen n ké baya ḿbé baryên ba/firi ne efang ké efang emen. Ne ké kyikim-nkéré kyibónge, byěm emen kángkáng bii/tánê.

²⁰ Jêe n̂g, ǎ barím ḿbé banong ḿbé mbe kyíbóng, kyi-kim ne obên emen. Jêe n̂g, ǎ banet ḿbé Osówo ne banet-kyitwóm-Jisos ne bamkpábé ḿbé badasét byiraa-Osówo. Ké nǎ, Osówo oo/pan mpan o-bên kámú ké ńkyí mǔ o/chi běn.

²¹ Ne orím mú onong mú o/rêe o-yip kâng buká ḿbú bu/rêe kanong kanong o-twóp ké kafâ-baya ḿbé baryên o-raa o/fu, něen nké ba/chi ba-twóp kiǐtí-oshê ńkyí Bábyílon kyísí ne busa, ne baa*ba/chi ba-chîri kámú*.

²² Ane nyí bankim ácîng ne bankim ane, nyí banjwâ boontán ne biintán baa*ba/chi ba-chîjwo kányí ké kyikit eyên*. Baa*ba/chi ba-chîri onet-bǎmkpóngé ké bǎmkpóngé emen nang bará* ne kyirime ńkyí kiinkwa byěm baa*ba/chi ba-chîjwo*.

²³ Baa*ba/chi ba-chîri kiinwángé-otyuryíkáng ké kyikit eyên*. Baa*ba/chi ba-chîjwo ejá ké kyikit eyên nyí onyi ne otyép mú baa/bé dyibé*. Banet ḿbé ba/mû ba-cen n busî ké kyikit eyên ba/mû ne busa ba-shwôm ké ejíí emúmú, ne wo a/nîm kángkáng banet ḿbé ké ejíí ké bambirirím eyên.

²⁴ Osówo o/kye oshê mú Bábyílon busông, ké nǎ, Osówo o/ri baróng ḿbé bamkpábé emen ḿbé badasét byiraa emen ne ḿbé banet emen ne ḿbé kángkáng banet ḿbé baa/ju kámbé ké ejíí ké mǔ. O/ri baróng ḿbé kángkáng banet ḿbé baa/ju kámbé ké ejíí.