Revelíshon 16 - Bokyi Bible

Acáng-Kafâ esa ńké Osówo

¹ N-jwo kâng ejá kyíbóng kyíbóng nyí nyi e-fím m ké kyise-kyifen-Osówo echi e-raa ne barím ḿbé banong káchâtkányi e/fu, ca n̂g ba-da-pwó acáng-kafâ esa ńké Osówo ányi káchâtkányi ké ejíí.

² Mbwôp kashú-orím mú onong o-dim o-da-bírî dyicáng ńdyí emen o-pwó ké ejíí. Byibáp ḿbyí bii*nwa eri* ne ḿbyí byidabán byi-byí ké byiko-banet ḿbé mbe ne ekap nyí kyibî-enyam ánkyi ne ké byiko-banet to ḿbé baa/kye orím-bukye-kyibî-enyam ánkyi ofê.

³ Ne nnyinyěng-orím mú onong o-pwó dyicáng ńdyí emen ké baya ḿbé baryên. Omu mú baya ámbe o-firi wǎ baróng ḿbé onet mú oo/kpú, ne kángkáng byěm ḿbyí mbyi ké baya ámbe byi-kpú.

⁴ Nnyinyěng-orím mú onong ké ashí achât o-pwó kâng dyicáng ńdyí emen ké buce ne ké buce ḿbú budabyí ké bambwo. Buce ámbu bu-bírî bu-firi baróng bárong.

⁵ N-jwo orím mú onong mú buce mbu ké bubwô emen o-raa o/fu, ô, nyǐ mú o/nwa o-shwôm, mú mu, ne mú o/mû. Wo amu a-chi i kanong ké bampan ḿbén ḿbé aa/két.

⁶ Mbé ba/chi baróng ḿbé banet-Osówo ne ḿbé bamkpábé ḿbé badasét byiraa-Osówo ba-byí, ne ké bubwô ámbu, wo aa/kye kámbé baróng a/fu, bajwáp. Mbé mbe ba-koo ng ńkyí kyi/kwárê ne mbé.

⁷ Ne n-jwo kâng ejá nyí nyi e-fím m ké kyikit ńkyí badachi kyifen-Osówo e-raa e/fu, Osówo Óburúkpâbí mú o/rêe o-shwôm, wo amu a-két ng bampan kanong ne ké bukwóp ḿbú ntûntû.

⁸ Ne orím mú onong ké ashí anyii o-pwó kâng dyicáng ńdyí emen ké óbyísû. Ne Osówo o-kye óbyísû busa o/fu, oshí banet ne kiinsóngé emen ńkyí nkyi wǎ okwâ.

⁹ Kyibî-kiinsóngé ánkyi kyi-shí banet, ne mbé ba-kpet eshú dyizîn-Osówo mú byibî-busông ḿbyín mbyi ké bubwô emen. Nké banet ámbe ba*da/man esaa byiko ba-mîng byibî ebe* ba-kpee eringe nyí Osówo mu kiǐtí*.

¹⁰ Ne orím mú onong ké ashí atánge o-pwó kâng dyicáng ńdyí emen ké kakyúng-butu ńké kyibî-enyam ánkyi. Kyifip kyi-róng ké butu ḿbú kyibî-enyam ánkyi, ne banet ba-kpet asháng ejwóm ké bubyíbabang ebe, ké bubân ḿbú mbe ba-jwo ng.

¹¹ Ne ba-shú Osówo mú mu kyíbóng ké bubân ebe ne ké byibáp ebe. Nké ba*da/saa byiko ba-mîng byibî-akwóp ebe*.

¹² Ne orím mú onong ké ashí nyâchât o-pwó kâng dyicáng ńdyí emen ké kiǐtí-kace ńké badakó Yuférétyis. Kace ánke ka-núng gbât, eringe nyí kadachi bukwóp ka-tî batu ḿbé ba/fím ké kyicê ńkyí esû nyi e-byí i.

¹³ M-bwa n-chîtún n-ri kâng byibî-bací byichât ḿbyí mbyi éné wǎ ékpânshwabang, ké mbe ba-byí i ké ocím mú mgbalíp ámu, ne ké mú kyibî-enyam ánkyi, ne ké mú mkpábé mú odasét byisédéng.

¹⁴ Byibî-bací ámbyi byi-chi i byibî-barím ḿbyí mbyi byi-chi i byěm-akat. Byibî-bací ḿbyín byichât mbyi byi-byí i byi-kâm m batu ké ejíí emúmú, byi-kpî ng kámbé byi-tî ng kyikit kyibónge ké byití enwa, ké kiǐtí-dyicí ńdyí Osówo mú o/rêe o-shwôm.

¹⁵ Osówo o-kpet eraa o/fu, fwôo n̂g atông ba-jwo, me mu m-bâ wǎ onet-kajii. Bunyîn-dyityém mbu ne onet mú mu o-kyú u achi fúú, ne mu o-tî ng byídí emen kanong, eringe nyí oo*ba/chi o-cen osíndyíbang* éshwân e-wuri ǎ ké ótíbingé*.

¹⁶ Ne byibî-bací ámbyi kâng byi-da-kpî batu ámbe byi-tî ké kyikit kyibónge, ké kyikit ńkyí badakó ké ejá-Hyíburu Amagédon.

¹⁷ Ne orím mú onong ké ashí káchâtkányi o-pwó kâng dyicáng ńdyí emen ké bufú. Ejá e-fím kakânkakân ké kyise-kyifen-Osówo echi ánkyi e-raa e/fu, kii/chi.

¹⁸ Ne kasabang ka-kpet ekédê, byicoge byi-ribi, etare e-kpet esá, ne esí e-kpet enáng kanong kanong. Esí e*da/náng ne dyizong ándyi kyi-fím ké nkéré mú Osówo o/chi onet*. Ńnyín e/mû e/bên e-shwôm kángkáng.

¹⁹ Kiǐtí-oshê ánkyi kyi-kyii byicê byichât, ne eshê ké ejíí emúmú e-bên. Osówo o-zîim kiǐtí-oshê ńkyí Bábyílon, ne o-chi kámú o-jwáp bato ké mmîk emen. Bato ḿbé kyibî-kafâ esa ńké Osówo.

²⁰ Kángkáng esí nyí baya ba/wáp kányí ba-fé ké kafâ e-rím, ne eku emúmú e-rím to.

²¹ Biimbâng-abíp, dyibónge dyi-ró ng wǎ bǎncáng-bakút bafee, a/fím kyíbóng a-róng banet ké byiko. Ne banet ba-kpet Osówo eshú ké busông-abíp ányi, ké nǎ, busông ámbu bu/mû boo*nwa kafwa efé*.