Revelíshon 15 - Bokyi Bible

Barím ḿbé Banong ne Bankuli Kyikû-Busông eri

¹ M-bwa n-chîtún n-ri kâng kiimbâng ne kiinkaa byiko-chwǒm-akat kyikíri kyíbóng. Barím ḿbé banong ba/mû ányi káchâtkányi ne byěm káchâtkányi ḿbyí byidakye banet busông, ḿbyí mbyi bankuli kyikû, ké nǎ, mbyí nké mbyi byi-man n kafâ esa ńké Osówo.

² M-bwa n-chîtún n-ri kâng chwǒm ńkyí nkyi éné wǎ kace ńké nke cángénéné, ne okwâ ké nké. N/ri to banet ḿbé ba/kpógê kyibî-enyam ánkyi ne orím-bukye mú ba/mee kánkyí, ne ńkyí ba/kye kányí dyizîn ándyi ńdyí ocím-byěm epan. Ba/mû ba/bwom cip ké bukô-kace ńké éyên éyen, ne ácîng ké abwô nyí Osówo oo/kye kámbé.

³ Mbé ba/mû mbe ba-kwán n okwan mú Músis mú ḿgbán-Osówo, ne okwan mú Wǎn-Etám-Ebû, ba/fu, Osówo Óburúkpâbí mú o/rêe o-shwôm, byěm eyên ḿbyí amu a-chi i mbyi biǐtí ne biinkaa byiko. Otu mú kángkáng eshê nyí nyi ké ejíí, édúú eyên nyi kanong ne nyi ntûntû.

⁴ Yeě, ǎ Otu Kyítá, mú oo*ba/chi o-shî ǒ* yeě o/chi o-né esét o/fu, wo a/rêe a-shwôm. Wo kǎnchí nké amu kanong. Kángkáng eshê nyí nyi ké ejíí e/chi e-bâ e-ba-kye ǒ ofê ké bushú eyên, ké nǎ, kángkáng banet mbe ba-ri ng byěm-kanong echi eyên.

⁵ Ké nkéré mú ńkyín kii/shwôm, n/ri ké kyise-kyifen-Osówo echi ńkyí nkyi kyíbóng ńkyí Osówo mu ké nkyí kyi/bâa.

⁶ Barím ḿbé banong ámbe káchâtkányi ḿbé mbe ne byěm ámbyi káchâtkányi ḿbyí byidakye banet busông ba/byí ké kyise-kyifen-Osówo echi ánkyi ba-bâ kyíjí. Ba/mû ba/fé byídí-okpówo ḿbyí ragerage ne mbyi kpárádádát, ne ba/mû ne emâp nyí ba/chi kányí ké gûl ké ekyukyu ebe sîtsît.

⁷ Ne kiǐnyám kyibónge kyi-kye barím ḿbé banong ámbe káchâtkányi acáng nyí ba/chi ké gûl, ne kafâ esa ńké Osówo mú mu ne dyikpen ne banyá ne banyá ké acáng ányi pwat.

⁸ Ne arúkwâ nyí nyi a-fím m ké busan-Osówo ḿbú ragerage ne ké busa ḿbú Osówo a-sú ké kiǐtí-kyise-kyifen-Osówo echi ánkyi. Ne onet nang obónge oo*man ece ké kafâ-kiǐtí-kyise ánkyi* tete byěm ámbyi káchâtkányi ḿbyí byidakye banet busông ḿbyí barím ḿbé banong ámbe káchâtkányi ba/bê ne mbyí byi-man.