Revelíshon 14 - Bokyi Bible

Okwan mú Banet ḿbé baa/nyii Kámbé

¹ M-bwa n-chîtún kâng n-ri áku ké Wǎn-Etám-Ebû ámu mu cip ké kaku ńké Záyon, ne bajam-égot-banet bujam esim onyiryiká ne din ḿbé mbe ne nyǐ, ḿbé ba/sáng kámbé dyizîn ńdyí emen ne ńdyí Bonchí emen ké bambwô ebe.

² Ne n-jwo ejá e-fím kyíbóng nyí e/raa wǎ kyirime-kiimbâng-kiintîm puupuu ne wǎ etare nké e/sá kakân kakân. Ejá nyí n/jwo e/mû wǎ ane nyí bankim dyícîng nké mbe ba-kim m ácîng ebe.

³ Égot-banet ányi e/bwom e-bírî kakyúng-butu ánke ne biǐnyám byinyii ámbyi ne bachíkpi ámbe kashú. Ne mbé ba/kwán okwan mú ofyîfî mú onet oo*man ekwâa o-nyît okwan ámu* kyi-cibi ne bajam-égot-banet bujam esim onyiryiká ne din* ḿbé Wǎn-Etám-Ebû oo/nyii kámbé ké busông ḿbú ejíí*.

⁴ Mbé ba-chi i banyinchéng ḿbé baa/tî byiko ebe kpárám, ba*da/bên kámbyí ké banyinyi erí*. Mbé ba*da/nyît onyinyi*. Mbé mbe ba-cen n ne Wǎn-Etám-Ebû ké kyikû nang o-wâa nyá. Osówo oo/nyii kámbé ké burwám-banet ḿbé áku, ne mbé ba-chi i bambwôp kashú-banet ḿbé ba/yip kámbé ba-kye Osówo ne Wǎn-Etám-Ebû.

⁵ Ba*da/ri kyisédéng nang kyibónge ké ocím ebe* mbé dyikpât dyi*fí kámbé*.

Barím ḿbé Banong Bachât

⁶ M-bwa n-chîtún n-ri kâng orím mú onong okíri ké mu o-byí i kyíbóng, ne kyitwóm ńkyí Bǎmpém ḿbé Banong ḿbé ba/kim ne nkéré mú ne banyá edasét kángkáng banet ḿbé mbe ké ejíí, ne kángkáng eshê nyí nyi ké ejíí, ne kángkáng byikim-banet ḿbyí mbyi ké ejíí, ne kángkáng azong-ejá nyí mbe ba-raa ng ké ejíí, ne kángkáng banet.

⁷ Orím mú onong ámu o-raa ne ejá kyíbóng kyíbóng o/fu, kû n̂g eshî Osówo. Ba-kye ǎ to akpee, ké nǎ, nyǐ mu kiǐtí o-shwôm. Ké ebóng, nkéré oo/fyi mú nyǐ odapan banet mpan. Fé n̂g ǎ nyǐ mú o/chi bubóng ne esí ne kace ne boǒbwán-booce ḿbú mbu bu-byí i ké bambwo.

⁸ Nnyinyěng-orím mú onong o/mû ne mbwôp kashú-orím mú onong ké kyikû, o-raa ng o/fu, oo/róng. Kiǐtí-oshê ńkyí Bábyílon kii/róng. Bábyílon o/kye kángkáng banet bato emen, ne o/chi kámbé ba-jwáp bato ámbe. Kiǐbwómbwóm-bato ámbe ḿbé byibî-babép emen ebép.

⁹ Orím mú onong ké ashí achât o/bê ne bambwôp kashú-barím ḿbé áku bafee ké kyikû, o-raa ké ejá kyíbóng kyíbóng o/fu, nang yeě nké mu o-kyâ kyibî-enyam ánkyi ne orím-bukye mú kyibî-enyam ánkyi ofê, ne mu o-mîng ng ba-tî ǎ ekap ké mbwô emen nang ké bubwô emen,

¹⁰ onet ámu nyǐ oyén o/chi o-jwáp bato ḿbé Osówo ḿbé kafâ emen esa, ḿbé nyǐ oo/fé kámbé ké mmîk-kafâ esa emen, chwǒm kyikíri o*da/chwáp ké mbé*. Onet ámu to ba/chi ba-kye ǎ busông ké kafâ-okwâ, ne ké aká nyí aa/bwam okwâ, ké bushú-barím ḿbé banong ne ḿbú Wǎn-Etám-Ebû.

¹¹ Arúkwâ nyí nyi a-fím m ké okwâ mú mbe ba-ri ng busông nyi a-yú u a-jâ kyíbóng ne banyá ne banyá. Banet ḿbén ḿbé mbe ba-kyâ kyibî-enyam ánkyi ne orím-bukye mú kyibî-enyam mú ba/chi ofê, baa*ba/chi ba-kyú ne dyijâng nang ne esû nang ne buchú* ne nang yeě mú ba/tî ǎ ekap nyí dyizîn-kyibî-enyam ánkyi*.

¹² Ńkyín nkyi kyi-sét ng kyi/fu, banet-Osówo ḿbé mbe ba-chi i eringe nyí byije-Osówo byi/sét, ne mbe ba-kyâ Jisos ofê, bacíp dyityém.

¹³ Ne n-jwo ejá e-fím kyíbóng e-raa e/fu, sáng kyísí a/fu, bunyîn-dyityém mbu ne banet ḿbé ba/chi ba-kpú ké bubwô-bǎmkpóngé echi ḿbé Otu Kyítá kyi-fím kántîk kyi-ca kashú. Busun-Osówo bu-faa bu/fu, ntûntû nkyi éné. Mbé ba/chi ba-kyú ké dyijâng ńdyí bunyîn-dyityém, ké bǎmkpóngé ebe ḿbé ba/jáng echi, ké ebóng, ńkyí ba/chi nkyi ne mbé ké kyikû.

Byíkwôn ebóng ḿbyí ké Ejíí

¹⁴ M-bwa n-chîtún n-ri kâng kiǐkpárádádát-ófíbí, ne chwǒm éné wǎ onet me ké ófíbí ámu, ne etam-butu ké dyishí nyí ba/chi ké gûl, ne kiininen-kashwám ké bubwô.

¹⁵ Ne orím mú onong okíri kâng o-dim ké kiǐtí-kyise-kyifen-Osówo echi o-byí kyíjí, ne o-raa ne orím mú o/kyú ké ófíbí ne ejá kyíbóng kyíbóng o/fu, bóng byíkwôn ne kashwám eyên, ké ebóng, ochíchí-nkéré oo/fyi. Ejíí ee/kán e-kwárê ké byíkwôn ebóng.

¹⁶ Ne nyǐ kâng mú mu me ké ófíbí ámu o-fugi kashwám ké ejíí, ne o-bóng byíkwôn ḿbyí ejíí.

¹⁷ Ne n-ri orím mú onong okíri ké o/byí kyíjí ké kiǐtí-kyise-kyifen-Osówo echi ńkyí kyíbóng. Orím ámu to o/mû ne kiininen-kashwám.

¹⁸ Ne orím mú onong okíri kâng mú mu o-bám m ókâp-okwâ o-byí kyíjí ké kyikit-kyifen-Osówo echi. Orím ámu o-nyán orím mú onong mú o/mû ne kiininen-kashwám kakânkakân o/fu, yip kashwám eyên a-két byirim-byichí ké kyifát-asín-byichí ńkyí ejíí, ké ebóng, byirim-byichí ámbyi bii/kán.

¹⁹ Ne orím ámu kâng o-fugi kashwám emen ké ejíí, o-két byirim-byichí ámbyi, ne o-fé kámbyí ké dyibíng ńdyí badanwárê byirim-byichí ba-chi bato, ńdyí kiǐtí-kafâ esa ńké Osówo.

²⁰ Ba-nwárê byirim-byichí ámbyi ké dyibíng ándyi, ké dyishí-bukwóp-oshê, ne baróng ba-byí ba-sú dyibíng ándyi ḿbé ba/byí nang égot-bakyilómyíta efee ké butang, ne nang bamyíta bafee ké buríbi.