Revelíshon 13 - Bokyi Bible

Byibî-Enyam Byifee

¹ M-bwa n-chîtún n-ri kâng kyibî-enyam kyibónge ńkyí nkyi kyi-byí i ké kafâ-baya ḿbé baryên kyi-bâ kyíjí. Kyi/mû ne etwóm diǐkpú ne ashí káchâtkányi ne etam-butu ké etwóm ányi kángkáng ne kyibî-dyizîn ńdyí ba/sáng ké ashí emen ányi.

² Kyibî-enyam ánkyi ńkyí n/ri kyi/mû wǎ ekpang, ne byiká wǎ ḿbyí kiinyinyǎm, ne ocím wǎ mú ékyúryu. Mgbalíp ámu o/kye kyibî-enyam ánkyi busa ḿbú emen ne kakyúng-butu emen ne kángkáng busa ḿbú mbu ké bubwô emen.

³ Dyishí dyibónge ńdyí kyibî-enyam ánkyi dyi/mû éné wǎ baa/két kándyí, nké kiimbâng-kyibáp ńkyí ndyi ne nkyí kii/kpú. Byiko byi/kaa ejíí emúmú, ne e-dim ne kyibî-enyam ánkyi ké kyikû.

⁴ Kángkáng banet ba/kye mgbalíp ámu ofê, ké ebóng, oo/kye kyibî-enyam ánkyi busa emen. Ba/kye kyibî-enyam ánkyi busa emen. Ba/kye kyibî-enyam ánkyi ofê to, ba-raa ng ba/fu, yeě mu wǎ kyibî-enyam ńkyín. Yeě odaman enwa ne nkyí.

⁵ Ba/bángê kyibî-enyam ánkyi kyi-raa byibî-byěm, ne ba/bángê kánkyí kyi-kyú ne busa ké bajam-etukáku bafee esim efee.

⁶ Kyibî-enyam ánkyi kyi-kpet Osówo eshû, ne dyizîn-Osówo, ne kyikit ńkyí Osówo mu o-kyú u, ne kángkáng banet ḿbé mbe ba-kyú u kyíbóng.

⁷ Ba/bángê kánkyí ba/fu, kyikûnwa ne banet-Osówo, kyi-kpógê to kámbé. Ne ba/kye kánkyí busa ḿbú kángkáng byikim-banet ḿbyí mbyi ké ejíí, ne kángkáng banet, ne kángkáng azong-ejá nyí mbe ba-raa ng ké ejíí badafiri ké bubwô emen.

⁸ Kángkáng banet ḿbé mbe ba-kyú u ké ejíí ba/chi ba-kye kánkyí ofê. Ányi kyi/byí, nang yeě mú ba*da/sáng dyizîn emen ne Osówo o-kûchi ejíí* ké nwet mú banet ḿbé badakpen ne banyá mú Wǎn-Etám-Ebû mú ba/ju ǎ.

⁹ Fwôo n̂g atông kâng ba-jwo, â bamu ne atông nyí badajwo.

¹⁰ Nang yeě nké mu mú bada ǎ ekám, ba-man ba-kám ǎ ké ntûntû. Nang yeě nké mu mú bada ǎ eju ké kashwám, ba-man ké ntûntû ba-ju ǎ ké kashwám. Ńkyín nkyi kyi-sét ng kyi/fu, banet-Osówo bacíp dyityém ba-fé dyityém ebe ne Osówo.

¹¹ M-bwa n-chîtún n-ri kâng kyibî-enyam kyikíri ké nkyi kyi-byí i ké kafâ-esí kyi-bâ kyíjí. Kyi/mû ne etwóm efee wǎ etwóm nyí wǎn-etám-ebû, ne kyi/raa wǎ mgbalíp.

¹² Kyi/tông bujê-busa ḿbú mbu ké abwô-kyibî-enyam ńkyí mbwôp kashú ké bushú kyibî-enyam ánkyi. Kyibî-enyam ńkyín kyi/chi ejíí ké busa ne kángkáng banet ḿbé mbe ba-kyú u ké nyǐ ba-kpet ekye mbwôp kashú-kyibî-enyam ofê, ńkyí kiimbâng-kyibáp emen kii/kpú.

¹³ Nnyinyěng-kyibî-enyam ńkyín kyi/chi biǐtí-akat. Kyi/chi okwâ o-byí ké bubóng o-bâ ké esí, ké bushú ḿbú kángkáng banet.

¹⁴ Ne kyi/nîm kángkáng banet ḿbé mbe ba-kyú u ké ejíí, ké akat nyí ba/bángê kánkyí kyi-chi ké bushú ḿbú mbwôp kashú-kyibî-enyam. Kyibî-enyam ánkyi kyi/sét kángkáng banet ḿbé ké ejíí kyi/fu, bachi orím-bukye ké ofê mú kyibî-enyam ńkyí baa/némê kánkyí ké kashwám, ne kyi/chîkpen.

¹⁵ Ba/bángê nnyinyěng-kyibî-enyam ánkyi kyi-fé bufú-dyikpen ké orím-bukye mú ba/chi ké ofê mú mbwôp kashú-kyibî-enyam, eringe nyí orím-bukye ámu odaman eraa, ne odaman eju kángkáng banet ḿbé ba*fí ba-fâ kámú*.

¹⁶ Kyibî-enyam ánkyi kyi/chi kángkáng banet ḿbé biǐtí ne ḿbé ba*fí biǐtí* ḿbé mbe ne esang ne ḿbé ba*fí ne esang* ḿbé mbe básóng ne ḿbé ba*fí básóng* ké busa ba-tî kámbé ekap ké abwô-etyebéng ebe ne ké bambwô ebe.

¹⁷ Onet o*fí nang obónge* mú odaman eré* o-shee nang chwǒm* â onet ámu o*fí ne ekap ńnyín*. Ányi kyi/byí, o*fí ne dyizîn ńdyí kyibî-enyam ánkyi* nang ocím-byěm epan mú o/bwom ké dyizîn-kyibî-enyam ánkyi*.

¹⁸ Ńkyín kyi/tông kyi/fu, nang yeě okyú ne bubong. Nang yeě nké mu ne bubong o-man n ekabe o-nyît dyishí ńdyí kyi/byí kyi-kim ne ocím-byěm epan mú kyibî-enyam ánkyi. Ké ebóng, ocím ámu o/bwom ké dyizîn-onet. Ocím emen mu égot echât esim-bajam bachât esim nyâchât.