Revelíshon 11 - Bokyi Bible

Bantûesé Ashí Afee

¹ Ne ba-kye mě kâng ochí mú byěm ekan, mú mu éné wǎ kiǐré, ne ba-sét mě ba/fu, bûu nensang a-kan kiǐtí-kyise-kyifen-Osówo echi ńkyí Osówo ne kyikit-kyifen-Osówo echi. A-pan to banet ḿbé mbe ba-fâ Osówo ké kiǐtí-kyise ánkyi.

² Nké *dachi a-kan byikit ḿbyí obyî óbyi ḿbyí kiǐtí-kyise-kyifen-Osówo echi*. *Dakan kámbé* ké ebóng, baa/yip kámbé ba-kye banet ḿbé ba*fí banet-Jûs* ḿbé ba/chi ba-cím Jerúsélem mú mu oshê mú o/já Osówo, ba-bên ké bajam-etukáku bafee esim efee.

³ Me n/chi n-twóm bantûesé ejí ashí afee ne byídí-dyikán eta bwábwá ké byiko, ne mbé ba/chi ba-sét kyitwóm-Osówo wǎ bamkpábé ḿbé emen ké égot-ací ányi nyâchât ne bajam bachât.

⁴ Bantûesé ámbe ashí afee ba-chi i asín-byichí afee nyí badakó ólif ne etyuryíkáng efee nyí ba/bi ké bushú-oyén-ejíí.

⁵ Â onet nang obónge o/kan o/fu, nyǐ o-némê e kámbé, okwâ o-byí i kámbé ké ocím o-ju banet-bushwôn ebe. Ne ké bukwóp ḿbún, nang yeě nké o/chi o-kan o/fu, nyǐ o-némê e kámbé, ba/chi ba-ju onet ámu.

⁶ Mbé mbe ne busa ḿbú badacít bubóng, eringe nyí omu oo*ba/chi o-na ké nkéré mú ba-kú ba-sét ng kyitwóm-Osówo*. Mbe ne busa to ḿbú badachi buce bu-bírî baróng. Mbe ne busa to ḿbú nang nkéré orá mú kyi/nyîn kámbé badakye ejíí dyizong-busông nang dyirá.

⁷ Ké nkéré mú baa/sét kyitwóm ebe kyi-man, kyibî-enyam ńkyí nkyi kyi-byí i ké kiǐríbíríbí-dyibíng-busông eri kyi/chi kyi-nwa ne mbé. Kyi/chi kyi-kpógê kámbé kyi-ju kámbé.

⁸ Ne byikwóm-enyam-byiko ebe byi/chi byi-waa ké ótíbingé mú kiǐtí-oshê ánkyi, mú ba/mû ba/mán Otu Kyítá ebe ké kyikwap ńkyí badashwân onet. Dyizîn-oshê ámu dyi/bwom wǎ Sódom, kakíri wǎ Éjip.

⁹ Banet ḿbé ba/fím ké kángkáng eshê nyí nyi ké ejíí, ne ké kángkáng byikim-banet ḿbyí mbyi ké ejíí, ne ké kángkáng azong-banet ḿbé mbe ké ejíí, ne ké kángkáng azong-ejá nyí mbe ba-raa ng ké ejíí ba/chi ba-kûtún achi ké byikwóm-enyam-byiko ḿbyí bantûesé ámbe, ké ací jangjang achât ne kyicê, ne baa*ba/chi ba-bángê ba-ryii kámbé*.

¹⁰ Banet ḿbé mbe ké ejíí ba/chi ba-jêe ké bukyû ḿbú bantûesé ḿbén bafee. Ba/chi ba-chi ajî, ba-twóm m eyáré ba-kyâ barî, ké ebóng, banet ámbe ashí afee ba/bê ne banet ḿbé mbe ké ejíí ne busông chwóó ké byiko.

¹¹ Ké nkéré ací aa/shwôm achât, kiǐnjáng ńkyí dyikpen ekye kyi/chi kyi-fím ké abwô-Osówo kyi-ba-nung ké byikwóm-enyam-byiko-bantûesé ámbe, ne ba-bûu nensang. Kángkáng banet ḿbé ba/ri kámbé bushî bu/chi bu-róng kámbé ké byiko kanong kanong.

¹² Bantûesé ámbe bafee ḿbé mbe bamkpábé ḿbé badasét byiraa-Osówo ba/chi ba-jwo kâng ejá kyíbóng kyíbóng ké e/fím kyíbóng e-raa ne mbé e/fu, bâ n̂g nyín. Ké nkéré banet-bushwôn ebe mbe ányi ba-tún n, mbé ba-nung ké ófíbí ba-yú ba-jâ kyíbóng.

¹³ Ké abe ányi, esí e/chi e-náng kanong kanong. Ké byikim-oshê ámu diǐkpú, kyikim kyibónge kyi/chi kyi-bên kángkáng. Égot-banet bujam esim onyiryiká ba/chi ba-kpú ké esí ányi nyí e/náng. Kyicê-banet ḿbé áku bushî bu/chi bu-róng kámbé, ne ba-kpee eringe Osówo mú kyíbóng mu kiǐtí.

¹⁴ Nnyinyěng-busông oo/shwôm. Nké kûtún. Busông bukíri ké kampén kachât bu/chi bu-bâ abeabe.

Ntán mú Orím mú Onong ké Ashí Káchâtkányi

¹⁵ Ne orím mú onong ké ashí káchâtkányi kâng o-jwá ntán emen. Ne ejá chwóó ké bubóng e-raa kyíbóng kyíbóng e/fu, busa ḿbú ejíí etún bu/firi ḿbú Otu Kyítá eten ne onet mú nyǐ o/kúng ǎ butu. Ne nyǐ o/chi o-waa Otu ne banyá ne banyá.

¹⁶ Ne bachíkpi ámbe bujam ne banyii ḿbé mbe ba-kyú u ké bukyúng-butu ḿbú ebe ké bushú-Osówo ba-myii ne bashú ebe kyísí ba-fé Osówo,

¹⁷ ba-raa ba/fu, Osówo Óburúkpâbí mú kángkáng busa, mú mu, ne mú o/mû. Be byi/kó ǒ asǎma ké kiǐtí-busa eyên ńkyí aa/tông, ne aa/kpet etún ejíí wǎ otu.

¹⁸ Banet ḿbé baa*nyît chwǒm kyi-kim ne wo* ba/mû baa/sú ne kafâ esa ké dyityém, nké nkéré oo/fyi mú kafâ esa eyên kadabyí wááng ne mú adapan bakúsí mpan. Nkéré oo/fyi mú adayárê bǎmgbán eyên ḿbé mbe bamkpábé eyên ḿbé badasét byiraa eyên, ne kángkáng banet eyên ḿbé mbe ba-shî ng ǒ wo, cibicibi ne ḿbé mbe biǐtí ne ḿbé ba*fí biǐtí*. Nkéré oo/fyi mú adaju banet ḿbé mbe ba-bên n ejíí.

¹⁹ Ba/bâa kiǐtí-kyise-kyifen-Osówo echi ńkyí nkyi kyíbóng, ne n-ri mkpukpu-byěm-Osówo ké kafâ-kiǐtí-kyise emen ánkyi. Ne kasabang kâng ka-kpet ekédê, kyicoge kyi-ribi, etare e-kpet esá, esí e-kpet enáng, ne abíp nyí aryên a-kpet eróng.