Revelíshon 10 - Bokyi Bible

Orím mú Onong ne Nwet mú Kaǎníng

¹ M-bwa n-chîtún n-ri kâng orím mú onong okíri mú mu ne busa ké mu o-fím m ké bubóng o-bâ kyísí. Ófíbí o/mû o/cít ǎ wǎ byídí, ne o/mû ne busáng-eshwa kerékeré ké dyishí. Bushú emen bu/mû wǎ óbyísû, ne byiká emen byi/mû wǎ bumang-okwâ.

² Nyǐ o/mû ne nwet mú kaǎníng bâabâa ké bubwô. O-fé kyiká emen ńkyí bubwô-etyebéng ké baya ḿbé baryên, kyiká-bubwô-eku emen kyíjí ké ecing.

³ Ne o-kó ké ejá kyíbóng kyíbóng nyí e/raa éné wǎ ekpang chwóó nké nyi e-fém m. Ké nkéré oo/kó, etare káchâtkányi e/faa ne kyirime.

⁴ M/mû n-kú m-bâ ebasáng ńdyí etare ányi e-raa ng e-bâ. Nké n/jwo ejá e/fím kyíbóng e-raa e/fu, tî ńkyí etare ńnyín káchâtkányi e/raa ké kadip. *Dachi a-sáng kánkyí kyísí*.

⁵ Ne orím mú onong kâng mú me n/ri cip, kyiká kyibónge ké baya, kyibónge kyíjí, o-nabe bubwô-etyebéng emen kyíbóng.

⁶ Ne o-ryí ocím o-sem byiko emen o-kó dyizîn-Osówo mú mu ne banyá ne banyá, mú o/chi bubóng ne kángkáng byěm ḿbyí mbyi ké mbú, mú o/chi ejíí ne kángkáng byěm ḿbyí mbyi ké nyǐ ne baya ne kángkáng byěm ḿbyí mbyi ké mbé. Orím mú onong ámu o-raa o/fu, ádángê a*fí to*.

⁷ Ké nkéré orím mú onong ké ashí káchâtkányi o-kú o-jwá ng ntán emen, Osówo o/chi o-chi ńkyí nkyi ké okabe emen mú mu ké kadip wǎ eringe nyí nyǐ o/sét bǎmgbán emen ḿbé mbe bamkpábé ḿbé badasét byiraa emen.

⁸ Ne ejá kâng nyí me m/mû nn/jwo e-chîraa ne me e/fu, ca a-da-koo nwet mú mu bâabâa, mú mu ké bubwô ḿbú orím mú onong mú mu cip, kyiká kyibónge ké baya, kyibónge kyíjí.

⁹ N-dim n-kâm orím mú onong ámu, n-da-bí ǎ n/fu, okye mě nwet ámu. Orím ámu o-raa ne me o/fu, koo kámú a-ryí. O/chi o-myám ké kafâ-dyifít eyên, nké ké ocím eyên, o/chi o-nyîn wǎ bakút-bukwan.

¹⁰ N-koo nwet ámu ké bubwô emen, n-ryí kámú, ne o/mû ne bunyîn ké ocím ejí wǎ bakút-bukwan. Nké ké nkéré mú mm/myii kámú, o/myám mě ké kafâ-dyifít.

¹¹ Ne ba-sét mě kâng ba/fu, a-man a-chîsét kyitwóm-Osówo wǎ mkpábé mú emen kyi-kim ne eshê chwóó, ne kyi-kim ne banet chwóó, ne kyi-kim ne byire chwóó ḿbyí banet mbe ba-raa ng, ne kyi-kim to ne batu chwóó.