Revelíshon 1 - Bokyi Bible

¹ Nwet mún ba/sáng kyi-kim ne ńkyí Jisos Karâs o/chi banet ba-nyît ńkyí Osówo o/kye ǎ o/fu, otông bǎmgbán-Osówo ńkyí kyi/chi kyi-chi abeabe. Karâs o/chi Jǒn mú ḿgbán emen o-nyît kánkyí ké bubwô ḿbú o/twóm orím emen mú onong o-kâm Jǒn.

² Jǒn to oo/sét kángkáng ńkyí nyǐ o/ri. Nyín něen ńkyí nyǐ o/sét kyi-kim ne kyitwóm ńkyí kyi/fím ne Osówo ne ntûntû mú Jisos Karâs o/chi banet ba-nyît.

³ Bunyîn-dyityém mbu ne onet mú mu o-kó ng nwet mún, ne bunyîn-dyityém mbu to ne banet ḿbé mbe ba-fwôo ng atông ké byiraa ḿbyí kyitwóm-Osówo ńkyín, ne ba-chi eringe nyí ba/sáng ké nwet mún. Ké nǎ, nkéré oo/fárâng mú ńkyín kyi/chi kyi-chi kángkáng.

Jǒn o/sáng o-ta Byise-Ékwâbashi nyí Karâs Káchâtkányi Kyiraa

⁴ Me Jǒn nké mu n-sáng ng n-kye byise-ékwâbashi nyí Karâs káchâtkányi ḿbyí ké Ésha n/fu, kanong ńké Osówo ne bunyîn-dyityém byikyú ne ben ḿbyí byi/fím ké abwô nyí Osówo, mú mu, mú o/mû, ne mú o/chi o-bâ, ne ké abwô nyí basun káchâtkányi ḿbé ba/bwom ké bushú ḿbú kakyúng-butu ńké Osówo.

⁵ Ne byi/fím to ké abwô nyí Jisos Karâs mú mu ntûesé mú ntûntû mú mu mbwôp kashú-Wǎn-Osówo, mú Osówo o/jwóbê ǎ ké bukyû, mú mu o-tún n to batu ḿbé ké ejíí ńnyín. Be byimu byi-jê ng ǎ, ne ké bukyû emen, nyǐ oo/chi bě byi-fem ké byibî eten.

⁶ Nyǐ oo/chi bě kyibám-butu ńkyí be byidakyú wǎ banchi kyifen-Osówo, eringe nyí be byidafé Osówo mú mu Bonchí emen. Busan ḿbú ragerage ne busa byikyú ne Jisos Karâs ne banyá ne banyá. Kyi/bát kyikyú éné.

⁷ Tún n̂ achi ba-ri, nyǐ o-kú o-bâ ké ófíbí. Nang yeě nang yeě o/chi o-ri ǎ, cibicibi ne banet ḿbé ba/tím ǎ byěm ké byiko. Kángkáng banet ḿbé ké ejíí ba/chi ba-tii ǎ. Ké ntûntû, kyi/chi kyi-kyú éné. Kyi/bát kyikyú éné.

⁸ Osówo Óburúkpâbí mú kángkáng busa o/fu, me n-chi i Mbwôp Kashú ne Nryî Esim. Osówo mú mu, mú o/mû, ne mú o/chi o-bâ.

Jǒn o/ri Karâs

⁹ Me Jǒn mú wǎn-boné enen. Ké bubwô ḿbú ocibi ne Jisos, me mu to ne ben ké busông eri ne ké Butu emen ne ké ofit to eryí. Me ba/tî mě ké oshê mú Pátámos, mú baya ḿbé baryên ba/wáp kámú ba-fé ké otyém, ké ebóng, me nn/sét ejá-Osówo ne ntûntû mú Jisos oo/sét wááng.

¹⁰ Ké dyicí-ékwâbashi ńdyí Otu Kyítá, me m/mû ké bubwô ḿbú busa ḿbú Busun-Osówo, ne n-jwo ejá nyí e/raa kakânkakân wǎ ntán ké esim ejí.

¹¹ E/fu, sáng kyísí ńkyí a/ri, a-twóm nwet ámu ba-kye byise-ékwâbashi ḿbyín káchâtkányi, Éfyísus ne Simóna ne Pégámum ne Tayatára ne Sádyis ne Fyiladéfya ne Lehodyisáya.

¹² Ne m-bírî kâng n/fu, n-ri ng onet ámu mú mu o-raa ng ne me éné. Ányi nké n/ri kâng byichí káchâtkányi ḿbyí badatwôom otyuryíkáng, ḿbyí ba/chi ké gûl.

¹³ Chwǒm kyibónge kyi-bwom ányi ké otyém ótyem mú byichí ámbyi wǎ onet, ne ágbádá ké byiko nyí a/ribi ké abe-byiká, ne emâp nyí ba/chi kányí ké gûl, ké okyukyu emen sîtsît.

¹⁴ Eji emen e/mû kpárádádát wǎ eríp-kiǐkpárádádát-bucáng, kakíri wǎ abíp, ne achi emen nyi a-san n éné wǎ okwâ.

¹⁵ Ne byiká emen byi/mû byi-san n éné wǎ kiǐré ńkyí ba/fé ké okwâ-bure ne ba-shí kánkyí kyi-cé. Ejá emen e/róng wǎ kiimbâng-kiintîm puupuu.

¹⁶ Nyǐ o/níbî ékpére káchâtkányi ké bubwô-etyebéng emen ne kashwám ńké kadanen esim emúmú ka/byí ǎ ké ocím. Bushú emen bu/mû bu-san n wǎ óbyísû mú dyicí dii/kán.

¹⁷ Ké nkéré mú me n/ri ǎ, m/myii ǎ ké byiká wǎ onet mú oo/kpú. Nyǐ o-twôom mě bubwô-etyebéng emen ké byiko, ne o-raa o/fu, *dachîshî* me n-chi i Mbwôp Kashú ne Nryî Esim.

¹⁸ Me n-chi i onet mú o/tôong ne dyikpen. Me m/mû mm/kpú, nké kûri, me mu okpó ne banyá ne banyá. Me nké n/níbî agbókóró nyí bukyû ne nyí oshê-bakúsí.

¹⁹ Sáng kâng kyísí byěm ḿbyí wo amu a-ri ng kántîk, ne ḿbyí byi/chi byi-chi ké nkéré mú mu o-bâ.

²⁰ Nyín něen kyikû-chwǒm ńkyí nkyi ké kadip kyi-kim ne ékpére káchâtkányi nyí wo amu a-ri ng ké bubwô-etyebéng ejí, ne byichí káchâtkányi ḿbyí ba/chi ké gûl ḿbyí badatwôom otyuryíkáng. Ékpére ńnyín káchâtkányi, ányi kyi/byí, barím ḿbé banong káchâtkányi ḿbé byise-ékwâbashi ámbyi káchâtkányi nyí Karâs. Byichí káchâtkányi ḿbyí badatwôom otyuryíkáng, ányi byise-ékwâbashi nyí Karâs ámbyi.