SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 99 - Bokyi Bible

Osówo nké mu Otu mú o/rêe o-shwôm

¹ Osówo nké mu Otu. Banet ba-tím m banê ké bushú emen. Nyǐ mu me ké kakyúng-butu emen twóóm ké biǐnyám byifee ḿbyí ba/mee ké gûl ne abyibabang ebe táttát, ejíí to e-náng ng.

² Óburúkpâbí o/rêe ké Záyon. Nyǐ o/rêe o-shwôm ejíí emúmú.

³ Nang yeě o/chi o-kpee kiǐtí-dyizîn emen ńdyí dyidachi bushî. Nyǐ nké mu kanong. [

⁴ Otu mú o/rêe o-shwôm,] wo ńkyí nkyi ntûntû nké kyida ǒ ejê. Wo aa/chi ntûntû esét o-firi ké Ézerel. Wo aa/bê ne kanong echi ne bukerededet.

⁵ Kpee n̂g Osówo Óburúkpâbí eten. Kye n̂g ǎ ofê ké kashú-kakyúng-butu emen. Nyǐ nké o/nwa.

⁶ Músis ne Éron ba/mû banchi kyifen emen, ne Sámwel o/mû onet mú o/mû o/fé nshwam o-kye ǎ. Mbé ba/kó Óburúkpâbí, ne nyǐ o/faa kámbé.

⁷ Nyǐ o/bwom ké ófíbí o-raa ne mbé. Mbé ba/tî byije emen ba-chi ńkyí nyǐ o/fu, bachi.

⁸ Ô Osówo Óburúkpâbí ejí, wo a/faa banet eyên ojá, ne wo a/tông kámbé a/fu, wo a-chi i Osówo mú odapwoo banet, nang a/kye banet busông ké byibî ebe.

⁹ Kpee n̂g Osówo Óburúkpâbí eten. Bakye ǎ ofê ké kaku emen ńké ociring. Osówo Óburúkpâbí eten nké mu kanong.