SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 98 - Bokyi Bible

Osówo nké mu Otu mú Ejíí

¹ Kwán n̂ okwan mú ofyîfî ba-kye Óburúkpâbí. Nyǐ oo/chi byěm-akat. Nyǐ oo/kpógê ne kiǐtí-busa ḿbú bubwô emen ḿbú bu/nwa bu-shwôm.

² Óburúkpâbí o/sét dyikpóge emen, nyǐ o/chi eshê kángkáng e-nyît busa ḿbú onyii emen.

³ Nyǐ o/tî ocím emen mú o/ryí banet ḿbé Ézerel eringe nyí nyǐ mu o-tông ng kámbé kanong emen ne kyijé emen ḿbyí bii*man*. Kángkáng banet nang nyá nang nyá baa/ri dyikpóge ńdyí Osówo eten.

⁴ Kángkáng banet ké ejíí, kwán n̂ ekwan nyí bunyîn-dyityém ba-kye Óburúkpâbí. Kwán n̂ ekwan ké bunyîn-dyityém ne ejá kyíbóng kyíbóng ba-kpee ǎ.

⁵ Kwán n̂ ekwan-akpee ba-kye Óburúkpâbí. Kim m̂ ane ké ácîng.

⁶ Jwá n̂g biintán ké bunyîn-dyityém ne ejá kyíbóng ba-kye Óburúkpâbí mú mu Otu eten.

⁷ Baya, cibicibi ne kángkáng byěm ḿbyí mbyi ǒ ké kafâ, rime ê. Ejíí, cibicibi ne kángkáng banet ḿbé mbe ba-kyú u ǒ ké kafâ, kwán n̂ ekwan.

⁸ Ben, ǎ buce, shwóm m̂ akwâ. Ben, ǎ eku, cibi n̂g ejá ba-kwán ekwan ne bunyîn-dyityém ké bushú ḿbú Óburúkpâbí,

⁹ ké nǎ, nyǐ o-kú o-bâ ejíí mpan epan wǎ Otu. Nyǐ o/chi o-pan ejíí mpan kerededet, acît oo*ryí*.