SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 97 - Bokyi Bible

Osówo nké mu Otu mú o/rêe o-shwôm

¹ Óburúkpâbí nké mu Otu. Ejíí, kyú ké bunyîn-dyityém. Ben, ǎ esí nyí baya ḿbé baryên ba/wáp kányí, jêe n̂g.

² Bubóng ḿbú boo/jîi bu/wâng ǎ. Kanong echi ne ntûntû esét nké mbyi wǎ kyikû-ekpe ńkyí kakyúng-butu emen.

³ Okwâ mu o-mang ng o-câ ǎ ké kashú, ne mu o-shí i banet-bushwôn emen ḿbé ba/wâng ǎ.

⁴ Kasabang emen nke ka-kyâ ejíí kiinwángé. Ejíí nyi e-ri ng kánké e-tím m banê.

⁵ Eku nyi e-nyange e ké bushú-Óburúkpâbí wǎ burwan ḿbú ba/fé ké okwâ, ké bushú ḿbú Óburúkpâbí mú ejíí emúmú.

⁶ Bubóng mbu bu-sét ng kyi-kim ne kanong emen echi, ne ejíí emúmú nyi e-ri ng busa emen.

⁷ Nang yeě mú mu o-kyâ erím-bakye ofê ba/chi ba-wuri ǎ éshwân. [Kángkáng esówo, e-tíngê e kyísí] ké bushú ḿbú Óburúkpâbí.

⁸ Banet ḿbé Záyon mbe ké bunyîn-dyityém, ne eshê nyí Júda nyi e-jêe ng ké bubwô ḿbú mpan eyên ekét, ǎ Óburúkpâbí.

⁹ Óburúkpâbí mú o/rêe o-shwôm, wo amu Otu mú ejíí emúmú. Wo a/rêe a-shwôm kángkáng esówo. [

¹⁰ Banet ḿbé kyibî kii*nyîn kámbé* nké badajê Óburúkpâbí.] Nyǐ mu o-bám m akpen nyí banet emen. Nyǐ mu o-nyii ng kámbé ké abwô nyí bambên atyém.

¹¹ Kiinwángé nkyi kyi-san n banet ḿbé mbe ba-chi i kanong, ne bunyîn-dyityém mbu ne banet ḿbé banong.

¹² Ben kángkáng mú bamu ba-chi i kanong, kyú n̂g ké bunyîn-dyityém ké bubwô ḿbú ńkyí Óburúkpâbí oo/chi. Zîim m̂ ńkyí Osówo mú o/nwa o-shwôm oo/chi, ba-kó ǎ asǎma.