SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 91 - Bokyi Bible

Osówo, Onet-Onyii Eten

¹ Nang yeě mú o/ce o-kâm Osówo mú kyíbóng kyíbóng, ne nang yeě to mú mu ké onyii mú Osówo mú o/rêe o-shwôm,

² onet ámu o-man n esét Óburúkpâbí o/fu, wo nké amu onet mú mu o-ku ng mě, ne Onet-Onyii ejí. Wo nké amu Osówo ejí. Wo nké me n/fé dyityém.

³ Osówo o/chi o-chi ǒ a-fem ké kángkáng efene ne ké kángkáng byirwóm-bukyû.

⁴ Nyǐ o/chi o-cít ǒ abyibabang emen. Chwǒm kii*ba/chi kyi-ta ǒ* ké obâm emen*. O/chi o-ku ǒ ne o-nyii ǒ to eringe nyí nyǐ o/ryí ocím.

⁵ Kyi*fí ńkyí adashî ofene nang obónge ne buchú* nang ba/rim bunwa ne wo ne esû*

⁶ nang kyirwóm ekám ne kyifip* nang kyibî-chwǒm ńkyí kyida ǒ eju ne esû*.

⁷ Nang bajam-égot-banet ba/kpú ké bukô eyên, nang bajam-égot-banet diǐkpú ba/kpú ǒ wângwâng, wo chwǒm kii*ta ǒ*.

⁸ Wo a/chi a-tún a-ri eringe nyí Osówo o/chi o-kye byibî-banet busông.

⁹ Wo aa/chi Óburúkpâbí Onet-Mbâm eyên, a-chi Osówo mú kyíbóng kyíbóng Onet-Onyii [eyên.]

¹⁰ Ké bubwô ámbu, kyibî-chwǒm kii*ta ǒ*. Afaníkong a*fí nyí a/chi a-bâ ké kyise eyên*.

¹¹ Osówo o/chi o-kye barím emen busa ba-tún ǒ kanong kanong, ba-bám ǒ nang nyá nké a/ce.

¹² Mbé ba/chi ba-níbî ǒ kyíbóng zírízírí ké abwô ebe eringe nyí wo aa*ba/chi a-némê byiká eyên ké aká*.

¹³ Wo a/chi a-cím ekpang ne efyi a-ju.

¹⁴ Osówo o/raa o/fu, me n/chi n-nyii banet ḿbé me mu n-jê ng kámbé. Me n/chi n-kûtún banet ḿbé mbe ba-nyît ng dyizîn ejí.

¹⁵ Me n/chi n-faa kámbé ké nkéré mú mbé baa/kó mě. Me n/chi n-kyú ne mbé ké nkéré mú ba/firi ké afaníkong. Me n/chi n-nyii kámbé n-kye kámbé ofê.

¹⁶ Me n/chi n-chi kámbé ba-kpen kanong kanong. Me n/chi n-nyii kámbé.