SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 90 - Bokyi Bible

Eringe nyí Osówo ne Onet mbe

¹ Óburúkpâbí, wo nké amu bě [kyikit] ńkyí byidakyú kángkáng nkéré.

² Wo a/mû Osówo mú ne banyá ne a-kûchi eku ne ejíí, ne wo a/chi a-waa Osówo ne banyá.

³ Wo amu a-sét ng onet a/fu, oyángê o-firi eringe nyí o/mû. Wo a-yángê e ǎ o-bírî ecing.

⁴ Égot-aje etánge nyi ǒ wǎ dyicí dyibónge. Nyǐ nyi wǎ kyísóng mú oo/shwôm. Nyi wǎ kaǎkím-nkéré ńké buchú.

⁵ Wo amu a-kpaa ng bě wǎ kiǐsúsú-kace ńké kadakpaa byěm. Dyikpen eten ndyi kaǎkím wǎ burê eri. Be byimu éné wǎ biǐbyâa ḿbyí byidabyí ké dyicófóróng,

⁶ ḿbyí byidakán byi-chi ekong nyí enong, ne ké dyikurúku byi-jwóm byi-kpú.

⁷ Kafâ eyên esa nké nke ka-ju ng bě. Kafâ eyên esa nké nke ka-chi i bě byi-shî.

⁸ Wo amu a-yip ng byibî eten a-tî ké kashú eyên, ké kyikit ńkyí adari byibî eten ḿbyí byi/chi ké kadip.

⁹ Kafâ eyên esa kaa/chi akpen eten a-firi boǒkím. A-kú a-rím m éné wǎ byiraa-booju.

¹⁰ Aje nyí dyikpen eten nyi bajam bachât esim diǐkpú. Bajam banyii â byimu byi-shwane e. Nang ké nkyi éné, nyǐ nyi a-bâ bě ne afaníkong ne bafip. Kaǎnyín-nkéré, dyikpen dyi-man, ne be byi-jâ.

¹¹ Yeě oo/fwôo kángkáng busa ḿbú kafâ esa eyên. Yeě mu o-nyît ng dyizong-bushî ḿbú kafâ esa eyên nke ka-bâ ne mbú.

¹² Tángê bě byi-nyît byi/fu, akpen eten nyi boǒkím eringe be byidakyú ne bubong.

¹³ Kafâ eyên esa ka/chi ka-chîrí nǎ. Óburúkpâbí, ri bǎmgbán eyên bafip.

¹⁴ Chi atyém eten a-sú ne kyijé eyên ńkyí kii*man* kángkáng dyicófóróng, eringe nyí be byi/chi byi-kûkwán ké bunyîn-dyityém kángkáng dyikpen eten.

¹⁵ Kye bě bunyîn-dyityém chwóó kántîk wǎ eringe nyí aa/kye bě bafip ké kángkáng aje eten nyí afaníkong.

¹⁶ Mîng bě be mú bǎmgbán eyên byi-ri biǐtí-byěm eyên ḿbyí amu a-chi i. Mîng bwǎn eten ba-ri kiǐtí-busa eyên.

¹⁷ Osówo Óburúkpâbí eten, kyi/bát ojware eyên okyú ne be. Chi bě byi-kpógê ké kángkáng byěm ḿbyí byimu byi-chi i.