SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 89 - Bokyi Bible

Okwan mú Nkéré mú Oshê mu o-ri ng Afaníkong

¹ Óburúkpâbí, me n/chi n-kwán ekwan kángkáng nkéré n-kim ne kyijé eyên ńkyí kii*man*. Me n/chi n-sét kángkáng nkéré kyi-kim ne eringe nyí wo amu a-tî ng ocím eyên mú a/ryí.

² Me mu n-nyît ng n/fu, kyijé eyên kyi-waa ng kángkáng nkéré. Ocím eyên mú a/ryí o-waa ng ne banyá wǎ bubóng.

³ Wo a/sét a/fu, wo aa/ryí ocím a-sem byiko eyên ne onet mú wo a/cá. Wo aa/ryí Otu Dívit mú ḿgbán eyên ocím a/fu,

⁴ onet-kyikû emen o/chi o-kyú otu kángkáng nkéré. A/fu, wo a/chi a-tî kyikû-butu emen kyi-waa ne banyá.

⁵ Kángkáng barím ḿbé banong kyíbóng mbe ba-kwán n ekwan kyi-kim ne biǐtí-byěm ḿbyí wo amu a-chi i. Mbé mbe ba-kwán n ekwan kyi-kim ne eringe nyí wo amu a-tî ng ocím eyên mú wo a/ryí, ǎ Óburúkpâbí.

⁶ Óburúkpâbí, onet o*fí nang obónge kyíbóng mú mu wǎ wo*. Chwǒm kyi*fí kyíbóng ńkyí nkyi jangjang ne wo*.

⁷ Wo amu ne ofê ké ncibi mú byěm ḿbyí mbyi kyíbóng, ne mbyí kángkáng ba-shî ng ǒ kanong kanong.

⁸ Osówo Óburúkpâbí mú o/rêe o-shwôm, onet o*fí mú o/rêe wǎ wo*. Wo amu a-tî ng ocím eyên mú a/ryí ké kángkáng byěm, ǎ Óburúkpâbí.

⁹ Busa ḿbú baya ḿbé baryên mbu ké abwô eyên. Wo amu a-chi i kámbé ba-mîng enáng.

¹⁰ Wo a/ju kiǐnyám-Ráhap, a-kpógê banet-bushwôn eyên ké kiǐtí-busa eyên.

¹¹ Bubóng ne esí byi/já ǒ wo. Wo a/chi ejíí ne kángkáng byěm ḿbyí mbyi ké nyǐ.

¹² Wo nké a/chi ejíí emúmú. Kaku ńké Tábo ne ńké Hémon mbu bu-kyâ dyizîn eyên akpee ké bunyîn-dyityém.

¹³ Wo amu ne busa ḿbú bu/rêe kanong kanong.

¹⁴ Butu eyên bu/bwom ké kanong echi ne ntûntû. Kángkáng byěm ḿbyí amu a-chi i mbyi byi-tông ng kyijé ne eringe nyí amu a-tî ng ocím eyên mú a/ryí.

¹⁵ Bunyîn-dyityém bu/jê banet ḿbé mbe ba-kyâ ǒ ofê ké ekwan, ḿbé mbe ba-kpen n ké kiinwángé ńkyí kanong eyên.

¹⁶ Ké kyirim-dyicí kángkáng, mbé mbe ba-jêe ng ké dyishí eyên, ne mbe ba-kpee ng ǒ ké kanong eyên.

¹⁷ Wo a-chi i bě byi-kpógê biǐtí-banet-bushwôn eten. Ké kyijé eyên, wo a/chi bě byi-kpógê.

¹⁸ Óburúkpâbí, wo nké a/cá onet-onyii eten. Wo, ǎ Osówo mú Ézerel mú o/nwa o-shwôm nké a/kye bě otu eten.

Ocím mú Osówo o/ryí Otu Dívit

¹⁹ Ké chwǒm-akat ńkyí bǎmgbán eyên ba/ri ké nkéré mú o/shwôm ké esim, wo a/sét kámbé a/fu, wo aa/kye kiǐtí-nnwa byití ochwâp. Wo aa/kye onet mú wo a/cá ké burwám-banet kakyúng-butu.

²⁰ Wo aa/chi Otu Dívit mú ḿgbán eyên otu ké bakút ḿbé banong ḿbé wo a/yip a-jware ǎ.

²¹ Busa eyên bu/chi bu-kyú ne nyǐ kángkáng nkéré. Busa eyên bu/chi bu-chi ǎ o-shwane.

²² Banet-bushwôn emen baa*ba/chi ba-kpógê ǎ ne banyá*. Byibî-banet bii*ba/chi byi-kpógê ǎ*.

²³ Wo a/chi a-man ne banet-ociring emen a-ju nang yeě mú mu o-sa ng kafâ ne nyǐ.

²⁴ Kyijé eyên ńkyí kii*man* ne ocím eyên mú a/ryí byi/chi byi-waa ne nyǐ. Wo a/chi a-chi ǎ o-kpógê kángkáng nkéré.

²⁵ Wo a/chi a-chi butu emen bu-fím ké baya ḿbé Medeterényan bu-nere tete bu-ribi kace ńké Yuférétyis.

²⁶ Nyǐ o/chi o-sét ǒ o/fu, wo a-chi i Bonchí ne Osówo emen, o/fu, wo a-chi i Onet-Oku ne Onet-Onyii emen.

²⁷ Wo a/chi a-chi ǎ mbwôp kashú-wǎn eyên ne otu mú o/rêe o-shwôm kángkáng batu.

²⁸ Wo a/chi a-tî ocím eyên mú a/ryí ne nyǐ a-sem byiko eyên, ne ocím mú a/ryí ne nyǐ o/chi o-waa ne banyá.

²⁹ Wo a/chi a-chi kyikû-butu emen kyi-waa ne banyá wǎ bubóng, ne onet-kyikû emen obónge o/chi o-kyú otu kángkáng nkéré.

^30-31 Nké â bwǎn emen ba/né echi ńkyí byije eyên byi/sét, ne ba*da/kyú eringe nyí wo a/kye busa*

³² wo kâng a/chi a-kye kámbé busông ké dyishí-byibî ebe. Wo a/chi a-chi kámbé ba-ri afaníkong ké chwǒm ńkyí mbé ba*da/man echi*.

³³ Nké Otu Dívit oo*ba/chi o-mîng ǒ wo ejê* a-bên nang ocím eyên mú a/ryí ǎ*.

³⁴ Wo aa*ba/chi a-bên ocím mú a/ryí ne nyǐ* a-yángê ocím nang obónge mú a/ryí ǎ*.

³⁵ Kabónge kyi-man éné nké wo a/ryí ǎ ocím a-sem dyizîn eyên a/fu, wo aa*ba/chi a-sét Otu Dívit kyisédéng ne banyá*.

³⁶ A/fu, nyǐ o/chi o-já banet ké kyikû emen kángkáng nkéré, ne wo a/chi a-kûbám kyibám-butu emen tete óbyísû o-mîng esan.

³⁷ Kyibám-butu emen kyi/chi kyi-waa wǎ otukáku mú mu wǎ ntûesé mú bubóng mú badafé dyityém ne nyǐ.

Bukyû etii ké Otu mú ba/kpógê

³⁸ Nké wo nkyi kyi-sa ng ǒ ne otu mú wo a/cá. Wo aa/né ǎ a-dim a-mîng ǎ.

³⁹ Wo aa/bên ocím eyên mú a/ryí ne a-sem byiko eyên ne ḿgbán eyên, a-pii etam-butu emen a-twóp ké biǐntóng.

⁴⁰ Wo aa/bú ekpe nyí ba/bi ba-wáp oshê emen a-bên kyikit-dyirem emen.

⁴¹ Kángkáng banet ḿbé mbe ba-shwôm m fáráng ba-kú ba-jii ng ǎ byěm, kángkáng barî-banet emen ba-kú ba-jwó ng ǎ.

⁴² Wo aa/chi banet-bushwôn emen ba-kpógê. Wo aa/chi kámbé kángkáng ba-firi ké bunyîn-dyityém.

⁴³ Wo aa/chi byiyám-byití emen byi-waa kyísí dyikáá, a-chi ba-kpógê ǎ ké byití.

⁴⁴ Wo aa/koo [kashwám-butu] emen, a-jê kakyúng-butu emen a-twóp kyísí.

⁴⁵ Wo aa/chi ǎ o-kâa ne nkéré emen o-kûfyi, ne aa/cít ǎ ne éshwân.

Nshwam mú Osówo o/chi o-nyii Bě

⁴⁶ Óburúkpâbí, wo a/chi a-rôo byiko eyên ne banyá? Kafâ eyên ńké nke ka-mang ng ǒ wǎ okwâ ka-rí i nǎ.

⁴⁷ Wo amu a-nyît ng a/fu, dyikpen ńdyí onet dyi*da/tíbî*. Wo amu a-nyît ng a/fu, wo a/chi bě a/fu, byikpú.

⁴⁸ Yeě odakpen oo*kpú ne banyá*. Onet o-cen n nǎ ne o-fem enung ké dyikun.

⁴⁹ Óburúkpâbí, ekap nyí kpákpá nyí nyi e-tông ng kyijé eyên e/jé nyá. Ocím mú a/ryí Otu Dívit o/jé nyá.

⁵⁰ *Daráp ecábé nyí [mbe ba-kyâ mě me mú ḿgbán eyên*.] Me n-cen n nǎ ne m-bwom kángkáng [byibî-banshwam] ḿbyí banshâng bakye mbe ba-fâ ba-kyâ mě.

⁵¹ Óburúkpâbí, banet-bushwôn eyên mbe ba-cábê ng otu eyên mú a/cá. Mbe ba-cábê ng ǎ nang nyá nké nyǐ o/ce.

⁵² Kye Óburúkpâbí akpee ne banyá ne banyá. Kyi/bát kyikyú éné kerededet.