SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 86 - Bokyi Bible

Nshwam-Ochwâp

¹ Óburúkpâbí, fwôo atông a-jwo mě, a-faa mě ojá, ké nǎ, me mu kyeekyee ne n*fí ne ochwâp*.

² Nyii mě ké bukyû ekpú, ké nǎ, me mu n-chi i ńkyí wo a/sét. Nyii mě, ké nǎ, me mu ḿgbán eyên ne n/tî dyityém ejí ké wo.

³ Wo a-chi i Osówo ejí, ké bubwô ámbu, ri mě bafip. Me mu n-fâ nshwam kyirim-dyicí kángkáng n-kyâ ǒ.

⁴ Ô Óburúkpâbí, chi dyityém dyi-nyîn ḿgbán eyên, ké nǎ, banshwam ejí mbe ba-jâ kyíbóng ba-kâm ǒ.

⁵ Wo a/nwa dyityém ne be, ne amu a-pwoo ng bě, ne kyijé ńkyí kii*man* kii/sú ǒ pwat ne banet kángkáng ḿbé mbe ba-fâ nshwam ba-kyâ ǒ.

⁶ Óburúkpâbí, fwôo atông ké nshwam ejí. Jwo bukyû ejí ḿbú mu n-tii ng n/fu, chwáp mě.

⁷ Me mu n-kó ng ǒ ké nkéré afaníkong, ké nǎ, wo amu a-faa ng mě ojá ké banshwam ejí.

⁸ Ô Óburúkpâbí, osówo o*fí mú mu wǎ wo*. O*fí nang obónge mú oo/chi ńkyí wo aa/chi*.

⁹ Eshê kángkáng nyí wo a/chi e/chi e-bâ e-ba-tíngê kyísí e-fé ǒ. Mbé ba/chi ba-kpee dyizîn eyên ńdyí dyi/rêe dyi-shwôm.

¹⁰ Wo a/rêe ne amu a-chi i byěm-akat. Wo kǎnchí nké amu Osówo.

¹¹ Óburúkpâbí, tángê mě ńkyí amu a-ryuu ng a/fu, me nchi, ne n/chi n-chi ńkyí wo a/sét ne dyityém ejí. Tángê mě eringe nyí ndashî dyizîn eyên ne dyityém ejí kángkáng.

¹² Ô Osówo Óburúkpâbí ejí, me n/chi n-kye ǒ akpee ne dyityém ejí kángkáng. Me n/chi m-kpee dyizîn eyên ne banyá.

¹³ Ké nǎ, kyijé eyên ne me ńkyí kii*man* kyi/rêe kyi-shwôm. Wo aa/nyii mě n-fem ké dyikun enung.

¹⁴ Ô Osówo, bantông byiko-banet baa/bûu bunwa ne me. Dyizu-bambên atyém-banet ḿbé ba*fí ba-kérê ng kyi-kim ne wo* mbe ba-kan n ba/fu, mbé ba-ju ng mě.

¹⁵ Nké wo, ǎ Óburúkpâbí, nké amu Osówo mú amu a-ri ng banet bafip, ne amu a-tông ng kyijé eyên kángkáng nkéré, ne amu ne dyityém chee. Wo a/cángê dyityém kángkáng nkéré, ne amu a-tî ng ocím eyên mú a/ryí.

¹⁶ Bírî a-kâm mě a-ri mě bafip. Chi mě n-shwane a-nyii mě, ké nǎ, me mu n-chi i ńkyí wo a/sét, éné wǎ eringe nyí boné ejí o/mû o/chi.

¹⁷ Óburúkpâbí, tông mě ekap nyí kanong eyên, eringe nyí éshwân e/chi e-wuri banet ḿbé me mu n-sa ng kámbé kafâ ké nkéré mbé baa/ri ba/fu, wo aa/kye mě bunyîn-dyityém ne ochwâp.